ތަކުރާރުކޮށް އެކި ސަބަބުތަކާ ހެދި ފަސްކުރަން ޖެހުނު، ސައުތު އޭޝިއަން ގޭމްސް އަންނަ އަހަރުގެ މާޗް މަހު ޕާކިސްތާންގައި ބާއްވާ ގޮތަށް ތާވަލުކޮށްފި އެވެ.
ޕާކިސްތާން އާއި ދެކުނު އޭޝިއާގެ އެކި މީޑިއާތަކުގައި ރިޕޯޓްކޮށްފައިވާ ގޮތުގައި، ދެކުނު އޭޝިއާގެ ގައުމުތަކުން ދާދި ފަހުން، އުޒްބެކިސްތާންގައި ކުރިއަށްދިޔަ އޮލިމްޕިކް ކައުންސިލް އޮފް އޭޝިއާ (އޯސީއޭ)ގެ ޖެނެރަލް އެސެމްބްލީގެ ހަވާސާފައި ވަނީ ބައްދަލުކޮށްފަ އެވެ. އަދި، އެ ބައްދަލުވުމުގައި ނިންމާފައިވަނީ، އަންނަ އަހަރު މާޗް މަހުގެ 23-31 އަށް ކުރިން ވެސް ރޭވުނު ގޮތަށް ޕާކިސްތާނުގައި ސައުތު އޭޝިއަން ގޭމްސް ހޯސްޓްކުރުމަށެވެ.
މި ބައްދަލުވުމުގައި، ޕާކިސްތާނުން ވަނީ ގައުމުތަކުގެ އޮފިޝަލުންނަށް މި އަހަރުގެ މެއި މަހު އެ ގައުމަށް ދިއުމަށް ދައުވަތު ދީފަ އެވެ. އެއީ، ގޭމްސްގެ ތައްޔާރީތަކާ ގުޅޭ ފަހުގެ މައުލޫމާތު ހިއްސާކުރުމުގެ ގޮތުންނެވެ.
އެންމެ ފަހުން، ސައުތު އޭޝިއަން ގޭމްސް ބޭއްވީ 2019 ވަަނަ އަހަރުގެ ޑިސެމްބަރު މަހު ނޭޕާލްގެ ކަތުމަންޑޫ އާއި ޕޮކާރާގަ އެވެ. އެ އަށް ފަހު، އެންމެ ފުރަތަމަ 2023 ވަނަ އަހަރު ބާއްވަން ނިންމި ސައުތު އޭޝިއަން ގޭމްސްގެ 14 ވަނަ އެޑިޝަން، އެކި ސަބަބުތަކާ ހުރެ ހަ ފަހަރެއްގެ މަތިން މި ވަނީ ފަސްކޮށްފަ އެވެ.
ކުރިން ތާވަލުކުރި ގޮތަށް މި އަހަރު ސައުތު އޭޝިއަން ގޭމްސް ބޭއްވޭތޯ ޕާކިސްތާނުން ގިނަ މަސައްކަތްތަކެއް ކުރި ނަމަވެސް ކާމިޔާބުވާ ގޮތެއްނުވި އެވެ. އެ ގޮތުން، ގޭމްސްގެ ކަންކަން ހަމަޖައްސަން، ޕާކިސްތާން ސަރުކާރުން މިދިޔަ އަހަރުގެ ފަހުކޮޅުގައި ކޮމިޓީއެއް އެކުލަވާލި އެވެ. އެއީ، ޕާކިސްތާންގެ ސަރުކާރުގެ އިސް އޮފިޝަލުންނާއި އޮލިމްޕިކް ކޮމިޓީގެ ރައީސް، ރާނާ މަޝްއޫދު އަހުމަދު ހާން ހިމެނޭ ގޮތަށް ހެދި ކޮމިޓީ އެކެވެ.
ރިޕޯޓްތައް ބުނާގޮތުން، ގޭމްސް ފަސްކުރަން އެ ކޮމިޓީގެ ފުރަތަމަ ބައްދަލުވުމުގައި ވެސް ސަރުކާރުން ހުށަހެޅިއެވެ.
ސައުތު އޭޝިއަން ގޭމްސްގައި، ޖުމްލަ އެކު، 27 ކުޅިވަރު ހިމަނާފައިވާ ކަމަށް ޕާކިސްތާން އޮލިމްޕިކް އެސޯސިއޭޝަން (ޕީއޯއޭ)އާ ހަވާލާދީ އެ ގައުމުގެ މީޑިއާ އިން ވަނީ މި އަހަރު ރިޕޯޓްކޮށްފަ އެވެ.
މީގެ ކުރިން، ޕާކިސްތާނުގައި ސައުތު އޭޝިއަން ގޭމްސް ބޭއްވީ 1989 ވަނަ އަހަރާއި 2004 ވަނަ އަހަރު އެވެ.