މޯލްޑިވިއަންގެ ވައިޑް ބޮޑީ އެއާކްރާފްޓްގެ ފުރަތަމަ ދަތުރު އަންނަ ބުރާސްފަތި ދުވަހު ޗައިނާގެ ޗެންގްޑޫއިން ރާއްޖެއަށް ކުރުމަށް ހަމަޖެހިފައިވާ ކަމަށް މޯލްޑިވިއަންއިން ބުނެފިއެވެ.
މޯލްޑިވިއަންގެ ފުރަތަމަ ވައިޑް ބޮޑީ އެއާކްރާފްޓް ރާއްޖެއަށް ގެނެސްފައި ވަނީ މި މަހުގެ 6 ވަނަ ދުވަހުއެވެ. އެއާބަސް އޭ330 މަރުކައިގެ މި ބޯޓަކީ 264 މީހުންގެ ޖާގައިގެ މަތިންދާބޯޓެކެވެ.
ފުރަތަމަ ދަތުރުތައް ޗައިނާގެ 3 މަންޒިލަކަށް ކުރަން ނިންމާފައިވާ އިރު ޗައިނާގެ ޗެންގްޑޫއަށް 2 ކޮޅު ޓިކެޓުގެ އަގަކީ 688 އެމެރިކާ ޑޮލަރެވެ.
ވައިޑް ބޮޑީގެ 2 ވަނަ ދަތުރު ކުރަން ހަމަޖެހިފައި ވަނީ މި މަހުގެ 24 ވަނަ ދުވަހު ރާއްޖެއިން ޗައިނާގެ ބެއިޖިންއަށެވެ. ބެއިޖިންގެ 2 ކޮޅު ޓިކެޓުގެ އަގަކީ 788 އެމެރިކާ ޑޮލަރެވެ. ޗައިނާގެ ޝެންހާއީއަށް ފުރަތަމަ ދަތުރު ކުރާނީ މި މަހުގެ 27 ވަނަ ދުވަހުއެވެ. ޝެންހާއީ 2 ކޮޅު ޓިކެޓުގެ އަގަކީ 777 އެމެރިކާ ޑޮލަރެވެ.
މީޑިއާއަށް ދިން އިންޓަވިއުއެއްގައި ޓްރާންސްޕޯޓް މިނިސްޓަރު އަމީން ވިދާޅުވެފައި ވަނީ މޯލްޑިވިއަންގެ ފްލީޓްގައި ވައިޑް ބޮޑީ މަތިންދާބޯޓުތައް ހިމެނުމަކީ މޯލްޑިވިއަންގެ ބައިލްއަގްވާމީ ދަތުރުތައް ފުޅާކުރުމަށް ހިފާފައިވާ އަމާޒުގެ މުހިއްމު ހިއްސާއެއްކަމުގައެވެ. މޯލްޑިވިއަން އެއާލައިނަށް ވައިޑް-ބޮޑީ ދެ އެއާކްރާފްޓް ގެންނަން ހަމަޖެހިފައިވާކަން ހާމަކޮށް އަމީން ވިދާޅުވީ އެ ބޯޓުތަކާ އެކު އާ 7 މަންޒިލަކަށް ދަތުރުތައް ފަށާނެކަމަށެވެ.