އެފޮށިގަނޑުން ވަނީ 989.1 ގުރާމުގެ މެފެޑްރޯން ފެނިފަ
ޕޯސްޓު މެދުވެރިކޮށް ރާއްޖެ އެތެރެކުރި މަސްތުވާތަކެތި އަޅާފައިހުރި ފޮށިގަނޑަކާ ހަވާލުވުމުން ސ. ހިތަދޫ، ޖިބްރޯލްޓާ ޝަރުވާން ސަލީމް، މަސްތުވާ ތަކެތި ޓްރެފިކު ކުރުމުގެ ކުށުގައި 22 އަހަރަށް ޖަލަށްލުމަށް ކްރިމިނަލް ކޯޓުން އިއްޔެ ހުކުމްކޮށްފިއެވެ.
 އޭނާގެ މައްޗަށް ދައުވާ އުފުލާފައިވަނީ މިދިޔަ އަހަރުގެ މާރިޗުމަހުގެ ދެވަނަ ދުވަހު ފެޑެކްސް މެދުވެރިކޮށް ރާއްޖެ އެތެރެކުރި ފޮށިގަނޑެއްގައި ހުރި ތަކެއްޗާމެދު ޝައްކުވެގެން ކޮންޓްރޯލް ޑެލިވަރީ އޮޕްރޭޝަނެއް ހިންގާ، ޝަރުވާން އެ ފޮށިގަނޑާ ހަވާލުވުމުންނެވެ. އެފޮށިގަނޑުން ވަނީ 989.1 ގުރާމުގެ މެފެޑްރޯން ފެނިފައެވެ. 
ޝަރުވާން، ދައުވާއަށް އިންކާރުކޮށް ބުނެފައިވަނީ މަސްތުވާތަކެތި ރާއްޖެއަށް އެތެރެކުރުމުގައި އަމަލީ ގޮތުން އެއްވެސް ސިފައެއްގައި ބައިވެރިވެފައިނުވާނެކަމަށެވެ. އަދި މަސްތުވާތަކެތި ހުރި ކަމަށް ބުނާ ފޮށިގަނޑާއި ޕެކޭޖާއި ނުވަތަ އެ މަސްތުވާތަކެތި ގެނައުމުގެ އެއްވެސް ބޭނުމެއް ނެތް ކަމަށެވެ. 
ގާޒީ އަލީ ނަދީމް ވަނީ ޝަރުވާންގެ މައްޗަށް ދައުވާ ސާބިތުވާކަމަށް ހުކުމްކުރައްވާ، 22 އަހަރާ ދެމަހާއި ތިންދުވަހަށް އޭނާ ޖަލަށްލުމުގެ އިތުރުން އެއްލައްކަ ރުފިޔާއިން ޖޫރިމަނާކުރުމަށް ހުކުމްކުރައްވާފައެވެ. އަދި އިއްޔެއިން ފެށިގެން 12 ދުވަސްތެރޭގައި މީރާއަށް ފައިސާދައްކާ ހަލާސްކުރުމަށް ހުކުމްކުރައްވާފައެވެ.
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ