ޑިފެންސް މިނިސްޓަރު މުހައްމަދު ޣައްސާން މައުމޫން އިންޑިއާ އަށް ގެންދަނީ ކުޑަކަކޫ ޖައްސުވަން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ފޮރިން މިނިސްޓަރު ޑރ. އަބްދުﷲ ހަލީލް ދާދިފަހުން އިންޑިއާ އަށް ދަތުރެއް ކުރެއްވިއިރު، ޣައްސާން ވެސް ވަރަށް އަވަހަށް އިންޑިއާ އަށް ރަސްމީ ދަތުރެއް ކުރެއްވުމަށް ވަނީ ހަމަޖެހިފަ އެވެ. މިއީ ޣައްސާން އިންޑިއާ އަށް ކުރައްވާ ފުރަތަމަ ރަސްމީ ދަތުރެވެ.
ޕީއެންއެފްގެ ފްރޮންޓް އޮފީހުގެ ޖަލްސާގައި ވާހަކަފުޅުދައްކަވަމުން ޔާމީން ވިދާޅުވީ މި ސަރުކާރުގެ އިސްވެރިން އިންޑިއާ އައުޓް ކެމްޕޭނާއި ފެޔަށް ޖެހުމުން ހާމަވަނީ އެ ބޭފުޅުންގެ ހުރި މުނާފިގުކަން ކަމަށާއި މިހާރު ފެންނަމުންދަނީ އަސްލު އެ ބޭފުޅުންގެ އެތެރޭގައި ހުރި ސިފަތައް ކަމަށެވެ. އަދި "އިންޑިއާ އައުޓް" އާއި "ދިވެހިންގެރާއްޖެ ދިވެހިންނަށް" ކިޔައިގެން އުޅުނަސް މި ސަރުކާރުގެ އިސްވެރިންނަކީ މުނާފިގު ބައެއް ކަމަށާއި، ރާއްޖޭގެ އިސްތިގުލާލު ދެމެހެއްޓުމުގައި އެ ބޭފުޅުންގެ އެއްވެސް އިހުލާސްތެރި ކަމެއް ނެތް ކަމަށްވެސް ޔާމީން ވިދާޅުވި އެވެ.
"މާދަން ކަން ނޭނގޭ ޣައްސާން އެދަނީ (އިންޑިއާ އަށް)، ތަހުގީގަށް ހާޒިރު އެކުރަނީ. ކުޑަކަކޫ ޖައްސަން ގެންދަނީ އިނގޭތޯ،" ޔާމީން ވިދާޅުވި އެވެ.
ޔާމީން ވިދާޅުވީ ރާއްޖޭގެ މިނިވަންކަމާއި، އިސްތިގުލާލާއި، ދިވެހިންނަށް ދިވެހިރާއްޖެ މުހިއްމު ވާނެކަން އިންޑިއާ އިން ގަބޫލުކުރާނަމަ، އިންޑިއާގެ އަސްކަރިއްޔާ ރާއްޖެއިން ފައިބައި، ގެއްލުނު ކަނޑުގެ ސަރަހައްދު ހޯދަން އިންޑިއާ އިން އިސްވެ ރާއްޖެ އަށް މަސައްކަތްކޮށްދޭންޖެހޭނެ ކަމަށެވެ. އެކަން އެގޮތަށް ކުރާނަމަ ޕީއެންއެފް އަށް ވުރެ އިތުބާރު ކުރެވޭ ޕާޓީއެއް އިންޑިއާ އަށް ނުފެންނާނެ ކަމަށްވެސް ޔާމީން ވިދާޅުވި އެވެ.