އިސްލާމިކް މިނިސްޓްރީއިން އިންތިޒާމްކޮށްގެން މާލޭގައި ބާއްވާ އިސްލާމިކް ފެއާ މާދަމާ ބޭއްވުމަށް ހަމަޖައްސައިފިއެވެ.
މި ފެއާ ފެށުމަށް ހަމަޖެހިފައިވަނީ މާދަމާ ހަވީރުއެވެ.
ހުރިހާ އުމުރެއްގެ މީހުންނަށް އެކަށޭނެހެން ރޭވިގެން ކުރިއަށް ގެންދަން ހަމަޖެހިފައިވާ މި ފެއާ އަކީ އެހެން އަހަރުތަކުގެ އިސްލާމިކް ފެއާ ތަކަށް ވުރެ ތަފާތު ފެއާއަކަށްވާނެކަމަށާ މިފަހަރު ފެއާ ހަވީރުގެ އިތުރުން ރޭގަނޑުވެސް ކުރިއަށް ގެންދިޔުމަށް ވަނީ ހަމަޖެހިފައެވެ.
އިސްލާމީ ހުދޫދުގެ ތެރެއިން ރައްޔިތުންނަށް މުނިފޫހިލިފިވުމުގެ ފުރުސަތު ހުޅުވައިދީ، މިނިސްޓްރީ އޮފް އިސްލާމިކް އެފެއާޒްގެ ފަރާތުން ރައްޔިތުންނަށް ފޯރުކޮށްދޭ ދީނީ ހިދުމަތްތަކާއި ބެހޭ ގޮތުން ރައްޔިތުން އިތުރަށް ހޭލުންތެރި ކުރުމުގެ މަޤްސަދުގައި ކުރިއަށް ގެންދަން ނިންމާފައިވާ މި ފެއާއަށް ގިނަ ކުންފުނިތަކެއްގެ އެހީތެރިކަން ލިބިފައިވާކަމަށް މިނިސްޓްރީ އޮފް އިސްލާމިކް އެފެއާޒުން ބުނެއެވެ.
އޮކްޓޫބަރު 29، 30 އަދި 31 މިތިން ދުވަހު އިސްލާމީ މަރުކަޒުގެ މައިދާނާއި ޖުމްހޫރީ މައިދާން ހިމެނޭހެން ބޮޑު ސަރަޙައްދެއްގައި ބާއްވާ މި ފެއަރ ގައި ގިނަ ސްޓޯލްތަކެއްގެ އިތުރުން ސްޓޭޖް ހަރަކާތްތަކާއި ކެންޓީންގެ ހިދުމަތްވެސް ލިބެން ހުންނާނެއެވެ.
މީގެ އިތުރުންވެސް ރީތި އަދަބުތަކާ ބެހޭ ފޮތްތަކާއި، ދީނީ އެހެނިހެން ދާއިރާތަކުގެ ފޮތްތައްވެސް މިފެއަރ އިން ލިބެން ހުންނާނެއެވެ.
އަދި ދީނީ ކަންކަމުގައި މައުލޫމާތެއް އޮޅުންފިލުވުމަށް ބޭނުންފުޚުވާ ބޭފުޅެއް ހުންނެވި ނަަމަ، ދީނީ ޢިލްމުވެރިއެއްގެ ފަރާތުން އެކަމަކާއި ބެހޭ މައުލޫމާތު ހޯދުމަށް ދީނީ ޢިލްމްވެރިއަކާއި ބައްދަލުކުރުމުގެ ފުރުސަތުވެސް މި ފެއަރގެ ތެރެއިން ލިބިގެން ދާނެއެވެ.
މިފަހަރުގެ އިސްލާމިކް ފެއަރގައި ކުރެހުމުގެ ހުނަރުތައް ތަފާތު ގޮތަކަށްް ދައްކާލުމާއި ދެ ދުވަހުގެ މުއްދަތަށް ބަހާލައިގެން މަދަހަ މުބާރާތެއްވެސް ކުރިއަށް ގެންދިއުމަށް ވަނީ ހަމަޖެހިފައެވެ.
މި ފެއާއަށް ވީހާވެސް ގިނަ ފަރާތްތަކުން ޒިޔާރަތްކުރުމަށް މިނިސްޓަރު ޑރ އަހުމަދު ޒިއާދު ވަނީ އެދިވަޑައިގެންފައެވެ.