މަރުވި ބިން ނޫން އެހެން ބިމަކަށް މައްޔިތާ އުފުލާ ހެދުމަކީ ކޮން ކަހަލަ ކަމެއްތޯ؟ އެއްރަށުން އަނެއް ރަށަށް  ނުވަތަ އެއްޤައުމުން އަނެއް ޤައުމަށް؟ 
މަކުރޫހަ ކަމެކޭ ބުނެވިދާނެ. އެއީ އެގޮތަށް ރަސޫލުﷲ ޞައްލަﷲ ޢަލައިހި ވަސައްލަމް ބާރު އަޅުއްވާފައިވަނީ އެ ބިމެއްގަ މަރުވެއްޖެއްޔާ އެ ބިމެއްގަ އޭނާ ވަޅުލާށޭ. އެ މުއުމިނު މީހާ އޭނާގެ ވަޠަނާ ދުރުވި ވަރަކަށް ސުވަރުގެއިން ލިބޭ ބިން ބޮޑުވެގެން ދާނެ. އެހެންމަ ރަނގަޅުތާ. ވަޠަނާ އޭނަ ދުރުވި ވަރަކަށް. އޭނަ މަރުވި ސަރަޙައްދު އެއީ ޤިޔާމަތް ދުވަހުގަ އޭނާ މާލާއިކަތުންނަށް ދެންނެވޭނޭ އެތަނުގެ މިން އަޅާށޭ. އޭނާ އެ މަރުވި ސަރަޙައްދާ އޭނާގެ ވަޠަނާ ހުރި ދުރުމިން ބަލާށޭ. ބަލާފަ އެވަރަށް އޭނާއަށް ބިން ދޭށޭ ސުވަރުގެއިން. އެހެންވީމާ އެގޮތަށް އެ މަރުވި ތަނުގަ ވަޅުލަން، އެ މަރުވި ރަށެއްގަ ވަޅުލަން ބޮޑަށް ބާރު އަޅުއްވާފަ މިއޮތީ. އެހެންވީމާ އެ މަރުވި ރަށެއްގަ ޒަރޫރީ ހާލަތެއް ޖެހިއްޖެއްޔާ މެނުވީ އެހެން ރަށަކަށް ގެނައުން ރަނގަޅެއް ނޫން. 
ޢައިޝަތުގެފާނުގެ އަޚާ އަބްދުއްރަޙްމާނު، ޢަބްދުއްރަޙްމާނު ބުން އަބޫބަކުރު، އެކަލޭގެފާނު ގެނެވުނީ ޝަޙީދުވެ ވަޑައިގަތީމަ ކަންނޭންގެ އަޅުގަނޑު ހަނދާން ވަނީ، ގެނެވުނީ މަދީނާއަށް. ޢައިޝަތުގެފާނު ވިދާޅުވަނީ ތިމަންނަ އެތަނުގަ ހުރިނަމަ އެކަލޭގެފާނު ގެނަޔަކު ނުދިނީމުހޭ. އެތާންގައޭ ވަޅުލެއްވީހީ. މަރުވިތާންގައޭ ވަޅުލެއްވީހީ. ތިމަންނަ އެތާ ހުރިނަމަ ގެނަޔަކަ ނުދިނީމުހޭ މަދީނާއަކަށް. އެހެންވީމާ އެ ވަޠަނަށް އަނބުރާ އެހެން ރަށެއްގަ މަރުވީމަ އެ މައްޔިތާ އަނބުރާ ރަށަށް ގެނައުން އެހާ ރަގަޅުކަމެއް ނޫން އެއީކީއެއް، ކޮންމެހެން ބޭނުމެއް ޖެހިއްޖެއްޔާ ނޫނީ.
 
- ޝައިޚް މުޙައްމަދު އިބްރާހީމް