ރައީސް މުހައްމަދު ނަޝީދު އަވަހާރަކޮށްލަން ބޮން ގޮއްވާލާ ދިން ހަމަލާގައި އެމަނިކުފާނަށް ފަރުވާދެމުން ދަނިކޮށް ނަޝީދުގެ ވިންދުވެސް ހުއްޓުނު ކަމަށް އޭޑީކޭ ހޮސްޕިޓަލްގެ ޑރ. އަބްދުﷲ ނިޔާފް ކްރިމިނަލް ކޯޓުގައި މިއަދު ވިދާޅުވެއްޖެއެވެ.
ނަޝީދަށް ދިން ބޮމުގެ ހަމަލާއާ ގުޅިގެން ހިންގާ ޝަރީއަތުގައި ހެކިބަސް ދެމުން ޑރ. ނިޔާފް ވަނީ ނަޝީދަށް ލިބުނު ޒަހަމްތަކާއި ކުރަން ޖެހުނު ސާޖަރީތަކުގެ ތަފުސީލް ކިޔައިދެއްވާފައެވެ. އެގޮތުން ނިޔާފް ވިދާޅުވީ އެމެޖެންސީ ރޫމަށް ނަޝީދު ގެނައިރު ގަމީހުގެ އެއް ފަޅި އާއި ފަޓުލޫނުގެ އެއް ފަޅީގައި ގިނަ އަދަދަކަށް ލޭ ހުރިކަމަށާއި ހަށިގަނޑުގެ އެކި ތަންތަނުގައި ގިނަ ޒަހަމްތަކެއް ހުރެ ލޭ އޮހޮރެމުންދިޔަ ކަމަށެވެ.
އަދި ނަޝީދުގެ ވާތު ފުއްޕާމޭ އެއްކޮށް ހިނދި، މޭކަށިގަނޑު ފޫއަޅުވާލައި ރޭޒާ ފުށްތައް ފުއްޕާމެއަށް ވަދެފައިވާ ކަމަށާއި، ލިވާ ފޫއަޅުވާލާ މައި ލޭހޮޅި ތެރެއަށް ވެސް ރޭޒާ ފުށް ވަދެފައިވާ ކަމަށް ޑރ. ނިޔާފް ވަނީ ވިދާޅުވެފައެވެ. މައި ލޭހޮޅި ތެރޭގައި ރޭޒާފުށް އޮތުމަކީ ފުރާނައަށް ވަރަށް ނުރައްކާވި ކަމެއް ކަން ފާހަގަކުރައްވާ ނިޔާފް ވިދާޅުވީ އެ ނެގުމަށް މަސައްކަތް ކުރިއިރު ނަޝީދުގެ ވިންދު ވެސް ހުއްޓުނު ކަމަށެވެ. ނަމަވެސް ސީޕީއާރް ދީގެން ކުރި މަސައްކަތުން އަލުން ވިންދު އައި ކަމަށް ނިޔާފް ވަނީ ވިދާޅުވެފައެވެ.
ނަޝީދުގެ ހަށިގަނޑުން ޖުމުލަ 10 ރޭޒާ ފުށް ނަގަން ޖެހުނު ކަމަށާއި އަދި ޕްލާސްޓިކް ކޮޅުތަކެއް ވެސް ނަގަން ޖެހުނު ކަމަށް ޑރ. ނިޔާފް ވަނީ ވިދާޅުވެފައެވެ. މީގެއިތުރުން ނަޝީދުގެ އަތާއި ފައިގައި ހުރި ޒަހަމްތަކުން ލޭ މަނާނުވާތީ އެ ތަންތަނުގެ ސާޖަރީ އަވަސްރަން ޖެހުނުކަމަށާއި ފައިގެ ފަލަމަސްގަނޑުގެ ދެ ތަނަކުން ރޭޒާފުށްތައް ނަގަން ޖެހުނު ކަމަށްވެސް ޑރ. ނިޔާފް ވަނީ ވިދާޅުވެފައެވެ. އަދި މި އޮޕަރޭޝަން 16 ގަޑިއިރު ވަންދެން ކުރި ކަމަށްވެސް އޭނާ ވަނީ ވިދާޅުވެފައެވެ.
ދައުލަތުގެ ފަރާތުން މި މައްސަލާގައި 111 ހެކި ހުށަހަޅާފައިވާއިރު، އޭގެ ތެރޭގައި ނަޝީދަށް ފަރުވާދިން ގިނަ ޑޮކްޓަރުން ހިމެނެއެވެ. ނަމަވެސް ނަޝީދަށް ލިބުނު އަނިޔާތައް ސާބިތުކޮށްދޭން ދައުލަތުން ހުށަހެޅި ނިޔާފްގެ ހެކިބަހާ ބެހޭގޮތުން ދައުވާ ލިބޭ އެއްވެސް ފަރާތަކުން ސުވާލުކޮށްފައިނުވާއިރު، ދައުވާ ލިބޭ ފަރާތްތަކުގެ ވަކީލުން ވިދާޅުވި ގޮތުގައި އެ ދުވަހު ހިނގި ކަންތަކުގައި ނަޝީދަށް އަނިޔާވެފައިވާ ކަމަކީ އެ ފަރާތްތަކުން ދެކޮޅު ހަދާ ކަމެއް ނޫނެވެ.
ނަޝީދަށް ހަމަލާދިން މައްސަލައިގައި ޓެރަރިޒަމްގެ ދައުވާތައް އުފުލާފައިވަނީ:
މި މީހުންގެ ތެރެއިން ބޮން ގޮއްވާލި ރިމޯޓު ގެންގުޅުނު އަދުހަމް ދައުވާއަށް އިއުތިރާފުވުމުން ކްރިމިނަލް ކޯޓުން ވަނީ އޭނާ 23 އަހަރަށް ޖަލަށް ލާން ހުކުމްކޮށްފައެވެ.
ރައީސް ނަޝީދަށް އަމާޒުކޮށް ދިން ޓެރަރިސްޓު ހަމަލާއާ ގުޅިގެން ޝަރީއަތުގައި ހެކިބަސް ދެމުން އެ ހާދިސާ ހިނގި ވަގުތު ނަޝީދުއާ އެންމެ ގާތުގައި ހުންނެވި އެމަނިކުފާނުގެ ހަށިފާރަވެރިޔާ، ސާޖެންޓް އިލްހާމް އަހްމަދު މީގެކުރިން ވަނީ ބޮން ގޮއްވާލި ވަގުތު އޭނާ ހުރީ ގ. ކެނެރީގެ ހުންނަ މަގު އާއި މަޖީދީ މަގު ގުޅޭ ކަންމަތީގައި ކަމަށާއި، ބާރުގަދަ އަޑެއް އިވުމަށްފަހު ދެން ފެންނެވީ ރައީސް ނަޝީދު ބިންމައްޗަށް ވެއްޓިވަޑައިގެންފައި އޮތް ތަން ކަމަށް ވިދާޅުވެފައެވެ.
ބޮމުގެ ހަމަލާގައި އިލްހާމަށް ވެސް އެކިވަރުގެ އަނިޔާ ލިބިފައި ހުރި ނަމަވެސް ބިންމަތީގައި ވެއްޓިވަޑައިގެންފައި އޮތް ނަޝީދު ނެންގެވުމުގައި އެންމެ ފުރަތަމަ އެޓެންޑްވީ އޭނާއެވެ.