ރަޝިއާގެ ސައިންޓިސްޓުން ކެންސަރު ފަރުވާއަށް ބޭނުންކުރެވޭ ވެކްސިނެއް ތައްޔާރުކޮށް، އެ ވެކްސިން ހިލޭ ބެހުމަށް ނިންމައިފިއެވެ. މި ވެކްސިން ކްލިނިކަލް ޓްރަޔަލްތައް ފުރިހަމަކޮށްވާ ކަމަށް، ރަޝިއާގެ ހެލްތު މިނިސްޓްރީން ރަޖިސްޓަރީކޮށްފައެވެ.
ރަޝިއާގެ ޑެޕިއުޓީ ޕްރައިމް މިނިސްޓަރ ޓަޓިއާނާ ގޮލިކޯވާ ވިދާޅުވި ގޮތުގައި މި ވެކްސިނަކީ ކެންސަރުގެ ބާވަތްތަކުގެ ތެރެއިން 10 ބާވަތަކަށް ފަރުވާ ދިނުމަށް ބޭނުންކުރެވޭނެ އެއްޗެކެވެ. މި ވެކްސިން އުފެއްދުމަށް ބޭނުންވާ ހުރިހާ މެޓީރިއަލްއެއް ރަޝިއާގައި އުފައްދާފައިވާކަމަށްވެސް އޭނާ ވިދާޅުވިއެވެ.
ރަޝިއާގެ ޑިޖިޓަލް ޑިވެލޮޕްމަންޓް މިނިސްޓްރީގެ ބަޔާނެއްގައި ބުނެފައިވާ ގޮތުގައި މި ވެކްސިން ބޭނުންކުރެވޭނީ ސްކިން ކެންސަރު، އުރަމަތީ ކެންސަރު، ސަރވިކަލް ކެންސަރު، ފުއްޕާމޭގެ ކެންސަރު، ކިޑްނީ ކެންސަރު، ބްލެޑަރ ކެންސަރު، ޕްރޮސްޓޭޓް ކެންސަރު، ރަހިމުގެ ކެންސަރު، ކޮލޮރެކްޓަލް ކެންސަރު އަދި ގެސްޓްރިކް ކެންސަރުގެ ފަރުވާއަށެވެ.
ރަޝިއާގެ ޑެޕިއުޓީ ޕްރައިމް މިނިސްޓަރ ވިދާޅުވި ގޮތުގައި މި ވެކްސިން ބޭނުންކޮށްގެން ކެންސަރުގެ ފަރުވާ ކުރާ މީހުންގެ ދިރިއުޅުމުގެ ފެންވަރު ރަނގަޅުވެ، އުމުރު ދިގުވާނެއެވެ. އަދި މި ވެކްސިން ބޭނުންކުރުމުން ކެންސަރު ފަރުވާއަށް ކުރަންޖެހޭ ހަރަދު ކުޑަވެގެންދާނެކަމަށްވެސް އޭނާ ވިދާޅުވިއެވެ.
ރަޝިއާގެ ސަރުކާރުން ނިންމާފައިވަނީ މި ވެކްސިން ރަޝިއާގެ ރައްޔިތުންނަށް ހިލޭ ފޯރުކޮށްދިނުމަށެވެ. އަދި މީގެ އިތުރުން، ރަޝިއާއާ ގުޅުން ބަދަހި ގައުމުތަކަށްވެސް މި ވެކްސިން ހިލޭ ފޯރުކޮށްދޭން ވަނީ ނިންމާފައެވެ.
މި ވެކްސިން އުފެއްދުމަކީ ކެންސަރު ފަރުވާގެ ދާއިރާގައި ވަރަށް ބޮޑު ކުރިއެރުމެއް ކަމަށް ސައިންޓިސްޓުން ދެކެއެވެ. ނަމަވެސް، މި ވެކްސިންގެ ދިގު މުއްދަތުގެ ނަތީޖާ ދެނެގަތުމަށް އިތުރު ދިރާސާތަކެއް ކުރަން ޖެހޭނެކަމަށް ބައެއް ޑޮކްޓަރުން ވަނީ ފާހަގަކޮށްފައެވެ.