ރ. އިންނަމާދޫގައި ބޯޓް ބިލްޑިންގެ ތަމްރީނުދޭ މަރުކަޒެއް އަޅައި ވަޑިންނަށް ލުއި ލޯނު ހަމަޖައްސައި ދެއްވާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، އިންނަމާދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ. އިންނަމާދޫއަކީ ވަޑާންކުރުމަށް މަޝްހޫރު ވަޑިން ގިނަ ރަށެކެވެ. ރައީސް ވަނީ އިންނަމާދޫއަށް ވަޑައިގެން އެ ރަށުގެ މާވަޑިންނާ ބައްދަލު ކުރައްވައި މަޝްވަރާ ކުރައްވައިފައެވެ. އެ ބޭފުޅުންނަށް ދާއިރާގައި ދިމާވާ އެންމެ ބޮޑު ދަތިކަމަކީ ލޯނު ލިބުމުގައި ކުރިމަތިވާ އުނދަގޫކަން ރައީސް ވަނީ ފާހަގަކުރައްވާފައެވެ. އެހެންކަމުން ރަހުނަކާ ނުލައި ލުއި ގޮތެއްގައި ލޯނު ނެގޭނެ އިންތިޒާމު ބޭންކިން ނިޒާމުގެ ތެރެއިން ފަހިކޮށްދެއްވާނެ ކަމަސް ރައީސް ވިދާޅުވިއެވެ. "މިރޭ ކުރެވުނު މަޝްވަރާގެ އަލީގައި އަދި މި ދެންނެވިި ސިޔާސަތުގެ ތެރެއިން އެއް ކަމަކަށް މި ދާއިރާގައި މަސައްކަތްކުރާ ބޭފުޅުންނަށް ބޭނުންވާ ކަންކަމުގެ ތެރެއިން ލުއި ގޮތެއްގައި ރަހުނަކާ ނުލައި ލޯނު ނެގޭނެ ގޮތް ބޭންކިން ނިޒާމު ތެރެއިން ހަމަޖައްސައިދޭނެ ކަމަށް ދަންނަވަން،" ރައީސް ވިދާޅުވިއެވެ. މަޝްރޫއުތައް ހިންގުމުގައި ދިވެހިންނަށް އިސްކަންދިނުމަކީ ވެސް ރައީސްގެ ރިޔާސީ ވައުދެކެވެ. ރައީސް ވިދާޅުވި ގޮތުގައި އޭގެ ތެރެއިން ވެސް ބޯޓު ބިލްޑިންގެ މަސައްކަތުގައި ދިވެހިންގެ ޝާމިލުވުން އިތުރުކުރުމަށް ވަކިން ޚާއްސަ އިސްކަމެއް ދޭން ސަރުކާރުން ނިންމައިފައި ވެއެވެ. "...އަޅުގަނޑު ބޭނުމެއް ނޫން މި ދާއިރާގައި ބޭރު މީހުން ގެންގުޅޭކަށެއް. މިއީ ދިވެހީންނަށް ޚާއްސަކޮށް އަޅުގަނޑުމެންގެ މެނިފެސްޓޯގެ ތެރެއިން، އަޅުގަނޑުމެންގެ ސިޔާސަތުގައި އެލައިންކޮށްފައި އޮތް ގޮތުން ވެސް ދިވެހީންނަށް ޚާއްސަ ކުރަން ބޭނުންވާ ދާއިރާއެއް،" ރައީސް ވިދާޅުވިއެވެ. އެހެން ނަމަވެސް މި ދާއިރާއަށް ޒުވާނުން ވަނުމުގައި ހުރަސްތަކެއް ދިމާވެފައި އޮތްކަން ފާހަގަ ކުރައްވައި ރައީސް ވިދާޅުވީ، އެ ދާއިރާއިން ތަމްރީނުދިނުމަށް އިންނަމާދޫގައި މަރުކަޒެއް އެޅުމަށް އެ މަނިކުފާނު ގަސްދު ކުރައްވާ ކަމަށެވެ. ރައީސް ވިދާޅުވި ގޮތުގައި ހަޔާ އެޑިއުކޭޝަން މިނިސްޓްރީގެ ތެރެއިން އެ މަރުކަޒު އެޅުމަށް ބޭނުންވާ ކަންކަން ސަރުކާރުން ހަމަޖައްސައިދީ، އެ ރަށުގައި ބޯޓު ބިލްޑިންގެ ފަންނުގައި ކުރިޔަށްދާން ބޭނުންވާ ޒުވާނުންނަށް އެ މަގު ފަހިކޮށްދޭނެއެވެ. "މިއީ ދިވެހީންނަށް ޚާއްސަ، ދިވެހީން އެކަނި މަސައްކަތްކުރާ ދާއިރާއެއްގެ ގޮތުގައި، ތަމްރީނުވެގެން އަންނަ ދިވެހީން އިތުރުވެގެންދާ ދާއިރާއެއްގެ ގޮތުގައި ވާތަން ދެކެން ބޭނުން. އެކަމަށް ސަރުކާރުން ކޮށްދޭންޖެހޭ ހުރިހާ ކަމެއް އަޅުގަނޑުމެން ކޮށްދޭނެ ވާހަކަ ދަންނަވަން" ރައީސް ވިދާޅުވިއެވެ. ރ. އިންނަމާދޫއަކީ ބޯޓު ބަނުމުގެ މަސައްކަތް ކުރާ، ވަޑިން ގިނަ ރަށެކެވެ.