ރާއްޖޭގެ ހުރިހާ ކައުންސިލެއްގެ ބަޖެޓް ކުޑަކޮށް މަޖިލީހަށް ބަޖެޓް ފޮނުވައި، އެ ގޮތަށް ބަޖެޓް ފާސް ކުރަން އުޅުމުން އެކަމާއި ދެކޮޅަށް އެމްޑީޕީ ނުކުމެ، އެއީ ޤާނޫނާއި ޚިލާފު ކަމެއް ކަމަށް ބުނެ ކައުންސިލްތަކުން އެކަމާއި ދެކޮޅަށް ބަޔާން ނެރުމުން، ފުލް ބަޖެޓް ދޭނެ ކަމަށް މުއިއްޒު ވަނީ މަޖުބޫރު ވެގެން ބުނެފައެވެ. މީގެ އިތުރުން ކައުންސިލަރުން މަދުކޮށް ކައުންސިލްގެ ބަޖެޓާއި ބާރު ނެގުމަށް މުއިއްޒު މިހާރު ވެސް ދަނީ ރާވަމުންނެވެ. އަދި އެކި ގޮތްގޮތުން އެކަމުގެ ވާހަކަ މުއިއްޒު ދަނީ ދައްކަމުންނެވެ.
ހއ. އިހަވަންދޫ ކައުންސިލުން އެރަށުގައި ފުޓްސެލް ދަނޑު ހުޅުވުމަށް ރަސްމިއްޔާތެއް ބޭއްވީ މުއިއްޒު އެރަށަށް ކުރި ދަތުރުގައި ޕްރޮޖެކްޓްތައް ނިންމާ ކަން، އަދި ކުރިއަށް ދާކަން ދެއްކުމަށެވެ. ކައުންސިލުން ދަނޑު އަޅާފައި ވަނީ ކައުންސިލުގެ ބަޖެޓުންނެވެ. މި ދަނޑު އެޅުމުގައި މުއިއްޒުގެ ސަރުކާރުގެ އެއްވެސް ދައުރެއް ނުވެއެވެ. ނަމަވެސް ލަދު ހަޔާތުގެ ކަންފުޅެއްވެސް ނެތި، ބޮޑު ރަސްމިއްޔާތެއް ބޭއްވުމުން އެ ރަށު ރައްޔިތުން ތިބީ އަޖައިބު ވެފައެވެ.
ކަންކަން ރައްޔިތުންގެ ލޯމަތީގައި އޮޅުވާލަނީ ވަކި ވަރަކަށް ނޫނެވެ. ހއ. އިހަވަންދޫ ކައުންސިލަށް ދަނޑުގެ އެއްވެސް ކްރެޑިޓެއް ނުދީ، މިއީ ސަރުކާރުގެ މަސައްކަތެއް ކަމަށް ދައުލަތުގެ މީޑިޔާއިން ވަނީ ދައްކާފައެވެ. ކައުންސިލުން އެޅި ދަނޑު ހުޅުވުމަށްފަހު، ކައުންސިލަށް ހައްޤު ކްރެޑިޓް ކައުންސިލަށް ދީ ކައުންސިލުގެ މަސައްކަތް ފާހަގަ ކޮށް، އެއީ ކައުންސިލުން ކުރި ކަމެއް ކަމަށާއި، ކައުންސިލްތައް ރަނގަޅަށް ނުހިނގާ ކަމަށް ބުނެ ތިމަންނާއަށް ދެކެވިފައި ހުރި ވާހަކަ ތަކަށް މާފަށް އެދެން މުއިއްޒު މި ފުރުޞަތު ބޭނުން ކުރި ނަމަ، ރަށްރަށުގެ ލޯތްބާއި އިޚްތިރާމް މުއިއްޒަށް ލިބުނީހެއެވެ. ނަމަވެސް ރައީސް މުއިއްޒުގެ ކިބާގައި ރަނގަޅު އެއްވެސް ސިފައެއް ނެތީއެވެ.
މީހުންގެ މަސައްކަތުން ވައްކަން ކުރުމާއި، އެ މަސައްކަތުން ކްރެޑިޓް ނަގައި މުއިއްޒު ކުރި ކަމެއް ކަމަށް ދެއްކުމަކީ ނާގާބިލު މުއިއްޒުގެ ސަރުކާރުން އާންމުކޮށް ކުރާ ކަމެކެވެ. ހއ. އަށް ކުރި މި ދަތުރުގައި މުއިއްޒަށް “ކައްޒާބު” އަދި “ބަހުލޫލު” ކިޔައި ރައްޔިތުން މުހާތަބު ކޮށްފައިވަނީ މިފަދަ ކަންކަން ރައީސް މުއިއްޒު ކުރައްވަމުން ގެންދަވާތީއެވެ.