ރާއްޖޭގައި ޝީޝާ މަނާކޮށް، ހަކުރުގެ ބާވަތްތަކުން ސަބްސިޑީ ކެނޑުމަކީ ސަރުކާރުގެ ސިޔާސަތެއް ނޫން ކަމަށާއި ބޭނުންވަނީ އެކަންކަމާ މެދު ރައްޔިތުން ހޭލުންތެރިކުރުވަން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.ރައީސް މިހެން ވިދާޅުވީ ދާދި ފަހުން އޮތް ނޫސްވެރީންގެ ބައްދަލްވުމެއްގައި ޝީޝާ މަނާކުރުމާއި ހަކުރަށް ދެމުން އަންނަ ސަބްސިޑީ ކަނޑާލުމާއި ހަކުރުގެ ބާވަތްތަކުން ނަގާ ޓެކްސްތައް އިތުރުކުރުންފަދަ ކަންކަމުގައި ބައެއް މަޝްވަރާތައް ކުރެވޭ ކަމަށް ހެލްތް މިނިސްޓަރު ވިދާޅުވެފައިވާތީ އެކަން ސާފުކޮށް ދެއްވުމުންނެވެ.އެކަމަކު، ވެރިކަންކުރާ ޕީއެންސީން އައްޑުއަށް ކަނޑައަޅާފައިވާ މެނިފެސްޓޯ "ދަ ގްރޭޓާ އައްޑޫ" ލޯންޗުކުރުމަށް ހެންވޭރު އާޓިފިޝަލް ބީޗުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ޝީޝާ ބުއިން މަނާކޮށް ހަކުރުގެ ސަބްސިޑީ ކަނޑާލުމުގެ ވިސްނުމެއް ސަރުކާރުން ނުގެންގުޅޭ ކަމަށެވެ."އެހެން ނަމަވެސް ޕަބްލިކް އެވެއަނެސް އިތުރުކޮށް، މިކަންކަމުން ދުރުހެލިވުމަށް ބާރުއަޅައި ހިތްވަރުދޭން އަޅުގަނޑުމެން ބޭނުންވަނީ،" ރައީސް ވިދާޅުވިއެވެ.އެމަނިކުފާނު ވިދާޅުވީ، ގިނަ ރައްޔިތުން އާދަވެފައިވާ ކަމެއް މަނާކުރުމަކުން އެކަމަކުން ރައްޔިތުން ދުރުނުކުރެވޭނެ ކަމަށެވެ. އޭގެ ބަދަލުގައި ހަކުރު ގިނަ ބުއިންތަކާއި ޝީޝާއިން ރައްޔިތުން ދުރުހެލިކުރުވަން ބާރުއަޅައި މަސައްކަތްކުރާނީ ކަމުގައި ރައީސް ވިދާޅުވިއެވެ.ރައީސް ވިދާޅުވީ، ޒަމާނުއްސުރެ ދިވެހީންގެ ތެރޭގައި ހުރި ބައެއް އާދަތައް މަނާކުރުމަކީ ހައްލެއް ލިބޭނެ ކަމެއް ނޫން ކަމަށާއި ނަމަވެސް އެކަންކަމާ ގުޅޭ ގޮތުން ސިއްހީ ގޮތުން މީހުން ހޭލުންތެރިކުރުމަކީ ސަރުކާރުން ކުރާނެ ކަމެއް ކަމަށެވެ. އެއާއެކު، ސިއްހަތަށް ފައިދާހުރި ކާބޯތަކެތި ކަމަށްވާ މޭވާއާއި ތަރުކާރީ އުފެއްދޭނެ ގޮތާއި އަގުހެޔޮކޮށް އެ ތަކެތި ލިބޭނެ ގޮތް ހެދުމަކީ މި ސަރުކާރުން ތަންފީޒުކުރާނެ ސިޔާސަތުކަމަށްވެސް ރައީސް ވިދާޅުވި އެވެ.