ޕާކިސްތާނުގެ ހުޅަނގު ދެކުނު ޕްރޮވިންސެއް ކަމަށްވާ ބަލޯޗިސްތާނުގެ އެކި ސަރަހައްދުތަކުގައި އިއްޔެ ސަލާމަތީ ބާރުތަކާއި ހަނގުރާމަވެރިންނާ ދެމެދު ހިނގި ވަރުގަދަ ކުރިމަތިލުންތަކެއްގައި، މަދުވެގެން 92 ހަނގުރާމަވެރިން މަރާލާފައިވާ ކަމަށް އެ ގައުމުގެ އަސްކަރިއްޔާއިން ބުނެފި އެވެ.
މިއީ ފަހުގެ ތާރީހެއްގައި އެ ސަރަހައްދުގައި ހިނގި އެންމެ ނުރައްކާތެރި އަދި ލޭއޮހޮރުވުން ބޮޑު ހަމަނުޖެހުމެވެ.
އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، ހަނގުރާމަވެރިންނާ ދެކޮޅަށް ހިންގި އޮޕަރޭޝަންތަކުގައި ސަލާމަތީ ބާރުތަކުގެ 15 މީހަކު މަރުވެފައިވާ ކަމަށެވެ. މީގެ އިތުރުން، ހަނގުރާމަވެރިން އާންމުންނަށް އަމާޒުކޮށް އެކި ތަންތަނުގައި ދިން ހަމަލާތަކުގައި އަންހެނުންނާއި ކުޑަކުދިން ހިމެނޭހެން މަދުވެގެން 18 މީހަކު ވަނީ މަރުވެފަ އެވެ.
މި ހަމަލާތައް ދީފައިވަނީ، އެ ޕްރޮވިންސްގެ އެކި ސަރަހައްދުތަކުގައި ހިންގި އޮޕަރޭޝަންތަކެއްގައި 41 ހަނގުރާމަވެރިން މަރާލާފައިވާ ކަމަށް އަސްކަރިއްޔާއިން ބުނިތާ އެއް ދުވަސް ފަހުންނެވެ.
މި ހަމަލާތަކުގެ ޒިންމާ އުފުލާފައިވަނީ މަނާކޮށްފައިވާ ޖަމާއަތެއް ކަމަށްވާ ބަލޯޗް ލިބަރޭޝަން އާމީ (ބީއެލްއޭ) އިންނެވެ. އެ ޖަމާއަތުން ބުނި ގޮތުގައި، 15 ގަޑިއިރަށް ދެމިގެންދިޔަ މި އޮޕަރޭޝަނުގައި ބަލޯޗިސްތާނުގެ އެކި ސަރަހައްދުތަކަށް އެއްފަހަރާ ހަމަލާދީ، ސަލާމަތީ ބާރުތަކުގެ 84 މީހަކު ވަނީ މަރާލާފަ އެވެ.
ޕާކިސްތާނުގެ އަސްކަރީ މީޑިއާ ގޮފި، އިންޓަ-ސާވިސަސް ޕަބްލިކް ރިލޭޝަންސް (އައިއެސްޕީއާރު) އިން ބުނި ގޮތުގައި، މި ހަމަލާތަކަކީ އިންޑިއާގެ އެހީތެރިކަން ލިބިގެން ހަނގުރާމަވެރިން ދިން ހަމަލާތަކެކެވެ. ނަމަވެސް، ސަލާމަތީ ބާރުތަކުން ވަނީ އެއްވެސް ސިޓީއެއް ނުވަތަ މުހިންމު ތަނެއް ހަނގުރާމަވެރިންގެ ބާރުގެ ދަށަށް ދިޔަ ނުދީ ހިފަހައްޓާފަ އެވެ.
"މި ހަމަލާތަކަކީ ޕާކިސްތާނުން ބޭރުގައި ތިބި ޓެރަރިސްޓް ލީޑަރުންގެ އިރުޝާދުގެ ދަށުން ރާވައިގެން ހިންގި ހަމަލާތަކެއްކަން އިންޓެލިޖެންސް ރިޕޯޓުތަކުން ކަށަވަރުވެފައިވޭ،" އެ ބަޔާނުގައި ބުނެފައިވެ އެވެ.
ކުއެޓާ، މަސްތުންގް، ނޯޝްކީ، ޕަންޖްގޫރް އަދި ބަނދަރު ސިޓީއެއް ކަމަށްވާ ގުވަދަރު ހިމެނޭހެން އެތައް ސަރަހައްދެއްގައި މި ހަމަނުޖެހުންތައް ހިނގާފައިވެ އެވެ.
ސަލާމަތީ އޮފިޝަލުން ވިދާޅުވި ގޮތުގައި، ހަނގުރާމަވެރިން އެކި ތަންތަނަށް ހަމަލާދޭން ފެށުމާ އެކު، އަސްކަރިއްޔާ އާއި ފުލުހުން އަދި ކައުންޓަ-ޓެރަރިޒަމް ޔުނިޓުތަކުން ވަނީ ވަރުގަދަ އޮޕަރޭޝަންތަކެއް ފަށާފަ އެވެ. ބައެއް ސަރަހައްދުތަކުގެ ހޮސްޕިޓަލްތައް ވަނީ އިމަޖެންސީ ހާލަތަކަށް ގެނެސްފަ އެވެ.
ގުވަދަރުގައި ހަނގުރާމަވެރިން ވަނީ މަސައްކަތްތެރިން ދިރިއުޅޭ ކޭމްޕަކަށް ހަމަލާދީ، ފަސް ފިރިހެނުންނާއި ތިން އަންހެނުން އަދި ތިން ކުޑަކުދިން ހިމެނޭހެން ޖުމްލަ 11 މީހަކު މަރާލާފަ އެވެ. ސަލާމަތީ ބާރުތަކުން ފަހުން ވަނީ އެ ސަރަހައްދުން ހަ ހަނގުރާމަވެރިން މަރާލާފަ އެވެ.
ޕާކިސްތާނުގެ ދާހިލީ ވަޒީރު މުޖްސިން ނަގްވީ މި ހަމަލާތައް ކުށްވެރިކުރައްވައި، ހަނގުރާމަވެރިންނަށް ރައްދު ހަމަލާދީ އެ މީހުންގެ ރޭވުންތައް ނާކާމިޔާބު ކޮށްލި ކަމަށްޓަކައި ސަލާމަތީ ބާރުތަކަށް ތައުރީފު ކުރެއްވި އެވެ.
އޮފިޝަލުން ވިދާޅުވި ގޮތުގައި، ނޯޝްކީގެ އިސް ސިވިލް އެޑްމިނިސްޓްރޭޓަރު ހަނގުރާމަވެރިން ރަހީނުކުރުމާ ގުޅިގެން އެ ސަރަހައްދުގެ ހާލަތު ވަނީ ވަރަށް ނާޒުކުވެފަ އެވެ. އޭނާ ފަހުން ވަނީ ހަނގުރާމަވެރިންގެ ބާރުގެ ދަށުގައި ހުރި ކަމަށް ބުނާ ވީޑިއޯއެއްގައި ފެނިފަ އެވެ.
މީގެ އިތުރުން، ކުއެޓާގެ ބައެއް މަގުތައް ހަނގުރާމަވެރިން ވަގުތީ ގޮތުން ބަންދުކޮށް، ސަލާމަތީ ގޮތުން ވަރުގަދަ ސަރަހައްދެއްގެ ކައިރީގައި ބޮމެއް ގޮއްވާލާފައިވީ ނަމަވެސް، ކަމާބެހޭ ފަރާތްތަކުން ފަހުން ބުނެފައިވަނީ ހާލަތު މިހާރު ކޮންޓްރޯލް ކުރެވިފައިވާ ކަމަށެވެ.
ބަލޯޗިސްތާނަކީ ޕާކިސްތާނުގެ އެންމެ ބޮޑު ނަމަވެސް އެންމެ ފަގީރު ޕްރޮވިންސެވެ. މި ސަރަހައްދުގައި ވަކިވެގަތުމަށް މަސައްކަތްކުރާ ހަނގުރާމަވެރިން ހަރަކާތްތެރިވާތާ އެތައް އަހަރެއް ވެއްޖެ އެވެ.
ޕާކިސްތާނުން ތުހުމަތުކުރާ ގޮތުގައި މި ހަމަނުޖެހުންތަކުގެ ފަހަތުގައި ތިބީ ބޭރުގެ ބާރުތަކެވެ. ނަމަވެސް އިންޑިއާއިން ވަނީ މި ތުހުމަތުތައް ދޮގުކޮށްފަ އެވެ.