ޓެކްނޯލޮޖީގެ އެހީގައި ދިވެހި މަސްވެރިކަން ތަރައްގީކުރުން މުހިންމު ކަމަށް ކުރީގެ ރައީސް އަލްއުސްތާޒް މައުމޫން އަބްދުލްގައްޔޫމް ވިދާޅުވެއްޖެއެވެ.
މަސްވެރިންގެ ދުވަހުގެ ތަހުނިޔާ ދަންނަވާ ރައީސް މައުމޫން ކުރެއްވި ޓްވިޓުގައި ވިދާޅުވީ ޒަމާނަށް އަންނަ ތަރައްގީއާ ފައިހަމަވާ ގޮތަށް ޓެކްނޯލޮޖީގެ އެހީގައި ދިވެހި މަސްވެރިކަން ތަރައްގީ ކުރުން މުހިންމު ކަމަށެވެ.
މީގެ އިތުރަށް ރާއްޖޭގެ މަސްވެރިކަމުގެ ދާއިރާގައި މިހާރު ވަނީ އެތައް ގުނައެއް ކުރިއަށް ޖެހިފައި ކަމަށް މޯލްޑިވްސް ރިފޯމް މޫވްމަންޓް (އެމްއާރުއެމް) އިން ވެސް ވަނީ ބުނެފައެވެ.
އެ ޕާޓީން ކުރި ޓްވީޓެއްގައި ވަނީ ދިވެހިރާއްޖޭގެ މަސްވެރިންގެ ދުވަހުގެ ތަހުނިޔާ ރާއްޖޭގެ ހީވާގި މަސްވެރިންނަށާއި، މަސްވެރި އާއިލާ ތަކަށާއި، މިނިސްޓަރ އޮފް ފިޝަރީސް، މެރިން ރިސޯރސަސް އެންޑް އެގްރިކަލްޗަރ ޑރ. ހުސެއިން ރަޝީދަށާއި އަދި މި ސިނާޢަތުގަ މަސައްކަތް ކުރާ ހުރިހާ ފަރާތްތަކަށް ދަންނަވާފައެވެ.
އަދި މަސްވެރިކަމުގެ ދާއިރާގައި މިހާރު ދިވެހިރާއްޖެ މިވަނީ އެތައް ގުނައެއް ކުރިއަށްޖެހިފައިކަން ފާހަގަކޮށް އެމްއާރްއެމުން ބުނީ އެކަމަށްޓަކައި ހުރިހާ ދިވެހީންވެސް މިއަދު ފަޚުރުވެރިވާ ކަމަށެވެ.
މަސްވެރިންގެ ދުވަސް މިއަދު ރާއްޖޭގެ އެކި ކަންކޮޅުތަކުގައި ކުލަގަދަކޮށް ފާހަގަ ކުރަމުންދާއިރު، މަސްވެރިންގެ ދުވަހުގެ ޚާއްސަ ޖަލްސާ މިރޭ ކ.ގާފަރުގައި ބޭއްވުމަށް ވަނީ ހަމަޖެހިފައެވެ. މިޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް އާއި ނައިބު ރައީސް ފައިސަލް ނަސީމްގެ އިތުރަށް ކެބިނެޓްގެ ބައެއް ވަޒީރުންވެސް ބައިވެރިވެވަޑައިގަންނަވައެވެ.