އިންޑިއާގެ ޓަމިލް ނާޑޫގައި މިހާރު ކުރިއަށްދާ އޭޝިއާގެ ސާފިން މުބާރާތުގެ ޖޫނިއާ ބައިގެ ކުއާޓާ ފައިނަލުގައި، ރާއްޖޭގެ ގައުމީ ސާފިން ޓީމުގެ ޔޫސުފް ކަޔާން އާއި ޔަސީން ނާޝިދު ވާދަކޮށް ހިތްވަރު ދައްކައިފި އެވެ.
އެ ގޮތުން، 18 އަހަރުން ދަށުގެ ޖޫނިއާ ކެޓަގަރީގައި، 28 އެތުލީޓުން ވާދަކުރިިއިރު، ޔޫސުފް ކަޔާން އާއި ޔަސީން ވަނީ ގަދަ 12 ސާފަރުންގެ ތެރޭގައި ހިމެނި، ކުއާޓާ ފައިނަލުގައި ވާދަކޮށްފަ އެވެ. ކުއާޓާ ފައިނަލުގެ ތިން ހީޓުގެ ސްކޯތަކަށް ބަލާއިރު، ޔޫސުފް ކަޔާން އާއި ޔަސީން ވަނީ ހިތްވަރުކޮށްފަ އެވެ.
ކުއާޓާ ފައިނަލުގެ ހީޓު އެކެއްގައި ވާދަކޮށް، ޔޫސުފް ކަޔާން ދިޔައީ ހަތަރު ވަނަ އެެވެ. ސްކޯ އަކީ، 8.23 ޕޮއިންޓެވެ. މި ހީޓުގެ އެއް ވަނަ ހޯދި، ޗައިނީސް ޓައިޕޭގެ ޝިއާ ޝީ ޔޫ 13.40 ޕޮއިންޓް ސްކޯކުރިއިރު، ދެ ވަނަ ހޯދި ޗައިނާގެ ޝިޑޮން ވޫ ވަނީ 13.27 ޕޮއިންޓް ސްކޯކޮށްފަ އެވެ. އަދި، ތިން ވަނައިގައި ނިންމި، ޗައިނީސް ޓައިޕޭގެ މިން ޖެން ލިއޫ ވަނީ 8.90 ޕޮއިންޓް ސްކޯކޮށްފަ އެވެ.
ތިން ވަނަ ބުރުގެ ހީޓުގެ އެއް ވަނަ ހޯދައި، ކުއާޓާ އަށް ދަތުރުކުރި ޔަސީން، ކުއާޓާގެ ހީޓު ތިނެއްގައި ވާދަކޮށް ދިޔައީ ތިން ވަނަ އެވެ. މި ހީޓުގެ އެއް ވަނަ ހޯދި ކަނޯއާ ހީޖާއޭ އަށް 14.33 ޕޮއިންޓް ލިބުނުއިރު، ދެ ވަނަ ހޯދި ޗައިނާގެ ލައިހާއޯ ޒޭން އަށް 10.07 ޕޮއިންޓް ލިބުނެވެ. ޔަސީން ތިން ވަނަ އަށް ދިޔައީ، 7.43 ޕޮއިންޓާ އެކު އެވެ. ހަތަރެއްގައި ނިންމި އިންޑިއާގެ ހަރިޝް ޕީ އަށް ސްކޯކުރެވުނީ، 6.80 ޕޮއިންޓެވެ.
ޖޫނިއާ ބައިގައި ދެކުނު އޭޝިއާގެ އެތުލީޓުންނަށް ބަލާއިރު، އެންމެ ސްކޯ ރަނގަޅީ، ޔޫސުފް ކަޔާން އާއި ޔަސީން އެވެ.
އޭޝިއަން ސާފިން ޗެމްޕިއަންޝިޕުގެ ތިން ވަނަ ބުރުން ރާއްޖޭގެ ސީިނިއާ ފިރިހެން އެތުލީޓުންނަށް ވަނީ މުބާރާތް ނިމިފަ އެވެ. ރާއްޖޭގެ އަންހެން ސާފަރުންނަށް މުބާރާތް ނިމުނީ ދެ ވަނަ ބުރާ ހަމައިންނެވެ.