ހުޅުމާލޭގެ އޮރެންޖް ހިޔާގައި ހަދާ ޓެލަސީމިއާގެ އާ ސެންޓަރު ގިނަ ވަސީލަތްތަކަކާއެކު އަންނަ މަހު ހުޅުވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ މަނިކުފާނު މިހާރު ކުރިއަށް ގެންދަވާ "ރައްޔިތުންނާ އެކު" ޕޮޑްކާސްޓްގެ ދެވަނަ އެޕިސޯޑްގައި އިއްޔެ ވިދާޅުވީ އަމާޒަކީ ތެލަސީމިއާ ދުވަހުގެ ގޮތުގައި ފާހަގަކުރާ މެއި 8 ގައި އާ ސެންޓަރު ހުޅުވުން ކަމަށެވެ.
އެތަނުގެ ފިނިޝިން މަސައްކަތްތައް މިދިޔަ މަހުގެ 28 އިން ފެށިގެން ކުރަމުން އަންނަނީ ސިފައިންނެވެ. އެ މަސައްކަތް ސަރުކާރުން ސިފައިންނާ ހަވާލުކުރީ މަސައްކަތް ހަވާލުކުރި ކޮންޓްރެކްޓަށް މަސައްކަތް ނުނިމި ދިގުލައިގެން ގޮސް، މިދިޔަ މަހުގެ 28 އަށް ކޮންޓްރެކްޓްގެ މުއްދަތު ވެސް ހަމަވެފައިވާތީ އެވެ.
ސިފައިންނާ މަސައްކަތް ހަވާލުކުރީ މި މަހުގެ ނިޔަލަށް މަސައްކަތްތައް ނިންމާ ގޮތަށެވެ. އެގޮތުން މާލޭގައި ހިންގަމުން އަންނަ ތެލަސީމިއާ ސެންޓަރު، ހުޅުމާލޭގެ އާ ސެންޓަރަށް ބަދަލުކޮށް އަންނަ މަހުގެ 8 ގައި ރަސްމީކޮށް ހުޅުވާނެ އެވެ.
ރައީސް ވިދާޅުވީ އާ ސެންޓަރު ހުޅުވާ އިރު، މިހާރަށް ވުރެ ވަސީލަތާ ހިދުމަތްތައް ވެސް ރަނގަޅުވާ ނެ ކަމަށެވެ.
"ޑީއެންއޭ ޓެސްޓްކުރާނެ މެޝިންތައް ހޯދުމާއި، އެކަހަލަ ވަރަށްގިނަ ސާމްޕަލްތައް ބަހައްޓާނެ ޖާގަ ވެސް ތަނުގައި ވަރަށް ބޮޑު ވާނެ. އެތަނަށް އިތުރު ފްރިޖްތައް ހޯދުމާއި، މިކަހަލަ ހުރިހާ ކަމެއްވެސް އެބަ ހިނގާ،" ރައީސް ވިދާޅުވި އެވެ. "ސީނިއާ ފިޒިޝަނެއްވެސް މިހާރު ފުލްޓައިމްކޮށް މަސައްކަތް ކުރަން ފަށައިފި. އެއީވެސް ވަރަށް ގިނަ ދުވަސްވީ ކަމެއް، ނުކުރެވިފައި އޮތް އިނގޭތޯ. ފަސް ނަރުހުން ހޯދުމަށް ހުޅުވާލެވިފައި އެވަނީ. އެކަންވެސް އިރާދަކުރެއްވީތީ ހަމަޖެހިގެން އެދަނީ. އެކަންކަން ދަނީ ވަރަށް ރަނގަޅަށް އިނގޭތޯ."