ނިމިދިޔަ އޭޕްރީލް މަހުގެ ކަރަންޓު ބިލުތަށް ވަރަށް ބޮޑަށް ބޮޑުކޮށްފައިވާ ކަމަށް ބުނެ ގިނަ ބަޔަކު ސޯޝަލް މީޑިއާގައި ކަންބޮޑުވުން ފާޅުކުރަން ފަށައިފި އެވެ.
ނަމަވެސް ގޭބީސީތަކަށް ގޮސް ފިޒިކަލްކޮށް މީޓަރުތަކުން ރީޑިން ނުނަގާ، ސްޓެލްކޯއިން ފޮނުވި މިދިޔަ މަހުގެ ކަރަންޓު ބިލުތައް ވަނީ ވަރަށް ބޮޑަށް ބޮޑުވެފަ އެވެ.
ރޯދައަށް ޗުއްޓީ ނަގައިގެން، މާލޭގެ އެޕާޓްމަންޓު ފަޅަށް ބަހައްޓާފައި ރަށަށް ދިޔަ ގޭބީސީތަކުގެ މިދިޔަ މަހުގެ ބިލް ވެސް އެތައް ގުނައެއް ބޮޑުކޮށްފައި ހުރި ކަމުގެ ގިނަ ޝަކުވާ އާންމުން ސޯޝަލް މީޑިއާގައި ދަނީ ކުރަމުންނެވެ.
ސްޓެލްކޯ ބިލްތައް މިހާބޮޑަށް ބޮޑު މިކުރީ ޖީއެސްޓީ ބޮޑުކޮށް، އިންފްލޭޝަން އާދަޔާ ހިލާފަށް މަތިވެ، ކޮތަޅުން ފީ ނަގަން ފެށުމުނުން އާންމުން މާލީ ގޮތުން ވަރަށް ދަތި ހާލުގައި އުޅެމުން އަންނަ ދަނޑިވަޅެއްގަ އެވެ.
ގުރައިދޫ އިލެކްޝަނާ ދިމާކޮށް ސްޓެލްކޯގެ ބަޖެޓުން އެތައް މިލިއަނެއް ހަރަދުކޮށް، ސްޓެލްކޯގެ ވަސީލަތްތައް، އެ ކުންފުނީގެ އެމްޑީ އަހްމަދު ޝަރީފް އިސްވެ ހުރެ ބޭނުންކުރި ކަމުގެ ތުހުމަތުތައް ވަނީ ފެންމަތިވެފަ އެވެ.