ރާއްޖެ އާއި ރާއްޖެއިން ބޭރުގައި ކިޔަވާ ދަރިވަރުންނަށް މިދިޔަ އަހަރު ދޫކުރި ފައިސާ އޭގެ، ކުރީ އަހަރާ އަޅާބަލާއިރު 97 މިލިއަން ރުފިޔާ މަދު ކަމަށް ތަފާސްހިސާބުތަކުން ދައްކައިފި އެވެ.
އެނގުން މުހިންމު - ސަރުކާރުން ދޫކުރާ ލޯނާއި ސްކޮލަޝިޕްތަކުގައި ރާއްޖެއިން ބޭރުގައި ކިޔަވާ ދަރިވަރުންނަށް ސަރުކާރުން ގަވައިދުން ފައިސާ ނުފޮނުވާތީ އެ ކުދިންނަށް ބޮޑެތި ދަތިތަކާ ކުރިމަތިވެ ޝަކުވާ ވަނީ ބޮޑުވެފަ އެވެ. އެގޮތުން: 
އެ ޝަކުވާތަކަށް ބާރު ލިބެނީ ފިނޭންސް މިނިސްޓްރީން އާންމުކުރި ދައުލަތުގެ ހަރަދާއި އާމްދަނީގެ ހިސާބުތަކުން 
ކިޔަވާ ކުދިންނަށް ދޫކުރި ލޯން ފައިސާގެ އަދަދަށް ދަށްވުމެއް އައިސްފައިވާކަން ހިސާބުތަކުން ފެނޭ 
ތަފްސީލް - ފިނޭންސް މިނިސްޓްރީން އިއްޔެ އާންމުކުރި ހިސާބުތަކުން ދައްކާގޮތުން މިދިޔަ އަހަރު ނިމުނުއިރު: 
ދަރިވަރުންނަށް ދޫކުރީ 603 މިލިއަން ރުފިޔާ 
މިއީ 2024އާ އަޅާބަލާއިރު، %13ގެ ދަށްވުމެއް ނުވަތަ 97 މިލިއަންގެ މަދުވުމެއް
މީގެ އިތުރަށް މިދިޔަ އަހަރު ދަރިވަރުންނަށް ލޯނުގެ ގޮތުގައި ދޫކުރަން ބަޖެޓްގައި 768 މިލިއަން ރުފިޔާ ހިމެނި އެވެ. އެހެން ނަމަވެސް، އަހަރު ނިމުނުއިރު އެކަމަށް ހޭދަކުރި 603 މިލިއަން ރުފިޔާއަކީ: 
165 މިލިއަން ރުފިޔާ މަދު އަދަދެއް
ސަރުކާރުގެ ބަސް - ހަޔާ އެޑިއުކޭޝަން މިނިސްޓްރީން ބުނަނީ ބަރާބަރަށް ފޮނުވަން ޖެހޭ ލިޔެކިޔުންތައް ފޮނުވާ ދަރިވަރުންނަށް ފައިސާ ދޫކުރަމުން އަންނަ ކަމަށެެވެ. އަދި ދަރިވަރުންނަށް ދޭ އިނާޔަތްތައް މުރާޖައާ ކުރުމުގެ މަސައްކަތްތަކެއް ކުރާ ކަމަށް ވެސް މިނިސްޓަރު ވަނީ މިފަހުން ހާމަކުރައްވައިފަ އެވެ.