އިންޑިއާ އާއި ރާއްޖޭގެ ރައްޔިތުންގެ މަންފާއަށް ދެ ގައުމުން ގުޅިގެން ކުރާ މަސައްކަތްތައް ކުރިއަށް ގެންދަވާނެ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ މިއަދު ވިދާޅުވެއްޖެ އެވެ.ނަރެންދްރަ މޯދީ މިފަދައިން ވިދާޅުވީ، އިންޑިޔާގެ ޖުމްހޫރީ ދުވަހާއި ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ސޯޝަލް މީޑިއާގައި ހިއްސާކުރެއްވި ތަހުނިޔާގެ މެސެޖާ ގުޅިގެން ކުރެއްވި ޕޯސްޓެއްގައެވެ.ރައީސްގެ ތަހުނިޔާގެ މެސެޖަށް ޝުކުރު އަދާކުރައްވާ މޯދީ ވިދާޅުވީ އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި ރައީސް އަރިސްކުރެއްވި ހޫނު ތަހުނިޔާ އާއި ހެޔޮއެދުން އިހުތިރާމާ އެކު ބަލައިގަންނަ ކަމަށެވެ."ދެ ގައުމުގެ ރައްޔިތުންގެ މަންފާއަށްޓަކައި އެކުގައި މިކުރާ މަސައްކަތް ކުރިއަށްގެންދާނަން. އެންމެހާ ދިވެހި ރައްޔިތުންނަށް ކުރިއަށް އޮތީ އުފާވެރި ފާގަތި ދުވަސްތަކެއްކަމުގައި އެދެން،" މޯދީ ވިދާޅުވި އެވެ.ރައީސް ޑރ. މުއިއްޒުގެ ސަރުކާރުގެ ކުރީ ކޮޅު އިންޑިއާއާއި އޮންނަ ގުޅުން ކުޑަ ވިނަމަވެސް ދެ ގައުމުގެ ސިޔާސީ އަދި ވިޔަފާރީގެ ގުޅުން މިހާރު އަންނަނީ ރަނގަޅު ވަމުން ނެވެ.