ގޯލްޑަން ފުޓްސަލް ޗެލެންޖް 2025 ގައި ކ. އަތޮޅުގެ މެޗުތައް ފެށިގެންދިޔައިރު، ދިއްފުށިން 18-2 އިން ހިންމަފުށި ބަލިކޮށް މި ފަހަރުގެ ގޯލްޑަން ފުޓްސަލް ޗެލެންޖުގެ މިހާތަނަށް އެންމެ ބޮޑު މޮޅު ހޯދިއިރު، މާފުށްޓާއި އެންމެ ފަހުގެ އަތޮޅު ޗެމްޕިއަން، ގާފަރު ކުޅުނު މެޗު 1-1 އިން އެއްވަރުވެއްޖެ އެވެ.
ރޭގެ މެޗާ ހަމައަށް މި ފަހަރުގެ ގޯލްޑަންގެ އެންމެ ތަފާތު ބޮޑު ނަތީޖާ އަކީ، ގއ. ދެއްވަދޫން 14-1 އިން ކޮލަމާފުށި ބަލިކުރި މެޗެވެ. އެކަމަކު، މިހާރު ރެކޯޑް މޮޅު އޮތީ ދިއްފުށި އަތުގަ އެވެ.
ކ. އަތޮޅު ގްރޫޕް އޭގައި ރޭ ކުޅުނު މެޗުގައި ދިއްފުށީގެ ކެޕްޓަން، ޒައިން ޒަފަރު ވަނީ ހަ ގޯލު ޖަހައިފަ އެވެ. އެ ޓީމުން ދެން ގޯލުތައް ޖެހި، މުހައްމަދު ޝަމީމް އާއި އަހުމަދު ރިޒުވާން (ރިޒޭ)، ކޮންމެ ކުޅުންތެރިޔަކު ހެޓްރިކެއްގެ އިތުރުން އަހުމަދު މާޒިން ވެސް ދެ ގޯލު ޖެހިއެވެ. މީގެ އިތުރުން، ހިންމަފުށީގެ އަތުޝަން އިބްރާހިމް އަތުން ބައިކޮޅަށް ދެ ގޯލު އދި އިންހާލް އާސިމް އަތުން ބައިކޮޅަށް އެއް ގޯލު ވަންއިރު، ދިއްފުށީގެ އިބްރާހީމް މައިޝް ވެސް ވަނީ ލަނޑެއް ޖަހައިފަ އެވެ.
މެޗުގައި، ހިންމަފުށިން މެޗުގައި ޖެހި ދެ ގޯލުވެސް ކާމިޔާބުކޮށްދިނީ ހުސައިން ނާފިޒް އެވެ.
ގާފަރަށް ލީޑުނަގައިދިނީ ރީބައުންސަކުން ލިބުނު ބޯޅައެއްގައި ޝަނާން ރަޝާދު އެވެ. އަދި މާފުށްޓަށް އެއްވަރުކޮށްދިނީ، އަހުމަދު ޝަމާލް އެވެ.
ކ. އަތޮޅު ގްރޫޕް ބީގައި ރޭ ކުޅުނު މެޗުތަކަށް ބަލާއިރު ގުޅިން ވަނީ 2-1 އިން ތުލުސްދޫ ބަލިކޮށްފަ އެވެ. އަދި ކާށިދޫ އާއި ގުރައިދޫ ވަނީ 2-2 އިން އެއްވަރުވެފަ އެވެ.
ރޭގެ މެޗުގައި ގުޅީގެ ގޯލުތައް ޖެހީ ހުސައިން ފަހުދު އާއި މުހައްމަދު އަނޫފް އަހުމަދު އެވެ. ތުލުސްދޫގެ ހަމައެކަނި ގޯލު ޖެހީ އާދަމް އަޒްމީން އެވެ. ކާށިދޫގެ ކެޕްޓަން، އަބްދުﷲ ސުޒައިރު ދެ ގޯލު ޖަހައި އެ ޓީމަށް ލީޑުނަގައިދީފައިވަނިކޮށް، ފަހަތުން އަރައި ގުރައިދޫން އެއްވަރުކުރީ އަހުމަދު ރިފްޝާން އާއި މުހައްމަދު މުއްސަފް އިބްރާހީމް ޖެހި ލަނޑުތަކުންނެވެ.
20:00: ށ. ކަނޑިތީމު - ށ. މިލަންދޫ
20:00: ށ. މަރޮށި - ށ. ފޭދޫ
21:00: ށ. ނަރުދޫ - ށ. ގޮއިދޫ
21:00: ށ. ބިލެއްފަހި - ށ. ޅައިމަގު
22:00: އއ. ތޮއްޑޫ - އއ. އުކުޅަސް
22:00: އއ. ހިމަންދޫ - އއ. މަތިވެރި
23:00: އއ. ރަސްދޫ - އއ. ބޮޑުފޮޅުދޫ
23:00: އއ. ފެރިދޫ - އއ. މާޅޮސް