އިސްލާމީ ކަންތައްތަކާ ބެހޭ ވުޒާރާއިން މިއަދު ހާމަކުރި ގޮތުގައި، އުމްރާއަށް މީހުން ގެންދިއުމުގެ އުޞޫލާ ޚިލާފުވެފައިވާތީ 19 ކުންފުންޏެއް 5 ހާސް ރުފިޔާއިން ޖޫރިމަނާކޮށްފިއެވެ. މި ފިޔަވަޅު އަޅާފައިވަނީ އެ ކުންފުނިތަކުން ކޮށްފައިވާ ޚިލާފު ޢަމަލުތަކުގެ ކުޑަބޮޑު މިނަށް ބަލައިގެންނެވެ.އިސްލާމީ ކަންތައްތަކާ ބެހޭ ވުޒާރާއިން ބުނެފައިވަނީ، އުމްރާއަށް މީހުން ގެންދިއުމުގައި ޢަމަލުކުރަން ގެޒެޓް ކޮށްފައިވާ އުޞޫލަށް ޢަމަލު ނުކުރާ ހުރިހާ ކުންފުނިތަކަށް އެ ވުޒާރާއިން ދަނީ ފިޔަވަޅު އަޅަމުން ކަމަށެވެ. މިގޮތުން، އުޞޫލާ ޚިލާފުވެގެން، މައްސަލައިގެ ކުޑަބޮޑުމިނަށް ބަލައި، 19 ކުންފުންޏެއް 5000 ރުފިޔާއިން ޖޫރިމަނާކޮށްފައިވާ ކަމަށް އެ ވުޒާރާއިން ހާމަކޮށްފައިވެއެވެ.ޢުމްރާއަށް މީހުން ގެންދިޔުމުގެ އުޞޫލްގައިވާ ގޮތުން، އިސްލާމީ ކަންތައްތަކާ ބެހޭ ވުޒާރާއިން ހުއްދަދީފައިވާ ކުންފުންޏާ ދެމެދު ވެފައިވާ އެއްބަސްވުމާ ޚިލާފު ވެއްޖެނަމަ، ކުޑަ ބޮޑުމިނަށް ބެލުމަށްފަހު 1،000 ރުފިޔާއާއި 100،000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމުގެ އިޚުތިޔާރު އިސްލާމީ ކަންތައްތަކާ ބެހޭ ވުޒާރާއަށް ލިބިގެންވެއެވެ. އަދި ޢުމްރާއަށް ގެންދިޔުމުގެ ހުއްދަ ނެތި އެއްވެސް ޢަމަލެއް ކޮށްފިނަމަ އެ ކުންފުންޏެއް 100،000 ރުފިޔާއާއި 500،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.މީގެއިތުރުން، އުމްރާއަށް މީހުން ގެންދިއުމަށް އެ ވުޒާރާއިން ދީފައިވާ ރަސްމީ ލައިސަންސް ދައްކައިގެން އުމްރާއަށް ފުރަން ކަމަށް ހަދައި އެމްއެމްއޭ އިން ޑޮލަރު ނަގައި، އުމްރާއަށް ނުދިޔަ ކުންފުންޏެއް ފާހަގަ ކުރެވިފައިވާކަމަށް ވުޒާރާއިން ބުނެފައިވެއެވެ. މި މައްސަލަ އިތުރަށް ބަލައި، އެކަން ސާބިތު ވެއްޖެ ނަމަ އެ ކުންފުނި 30 ހާސް ރުފިޔާއިން ޖޫރިމަނާކޮށް، ހުއްދަ ހިފަހައްޓައި މި މައްސަލަ ތަޙްޤީޤުކުރަން ޕޮލިހަށް ފޮނުވޭނެ ކަމަށްވެސް ވުޒާރާއިން ބުނެފައިވެއެވެ.އިސްލާމީ ކަންތައްތަކާ ބެހޭ ވުޒާރާއިން އިތުރަށް ހާމަކޮށްފައިވަނީ، ޑޮލަރު ދޫކުރާނީ ފުރުމުގެ ޓިކެޓާއި ޑޮކިއުމެންޓްސް ހުށަހެޅުމުންކަމަށް ވެފައި، ފޭކު ޑޮކިއުމެންޓް ހުށަހެޅިކަމަށް ތުހުމަތުކުރެވޭތީ، އުމްރާއަށް މީހުން ގެންދިއުމުގައި ޢަމަލުކުރަން ގެޒެޓް ކޮށްފައިވާ އުޞޫލަށް ޢަމަލު ނުކުރާ ހުރިހައި ކުންފުނިތަކަށް ފިޔަވަޅު އަޅާނެ ކަމަށެވެ.
މި ފިޔަވަޅުތައް އަޅަނީ އުމްރާއަށް މީހުން ގެންދިއުމުގެ ޚިދުމަތް ދިނުމުގައި ހަރުދަނާކަމާއި ޒިންމާދާރުކަން އިތުރުކުރުމަށާއި، އުމްރާއަށް ދާން ބޭނުންވާ ފަރާތްތަކުގެ ޙައްޤުތައް ރައްކާތެރިކުރުމަށް ކަމަށް އިސްލާމީ ކަންތައްތަކާ ބެހޭ ވުޒާރާއިން ބުނެފައިވެއެވެ. އަދި މި ކަމުގައި އުޞޫލުތަކާ ޚިލާފުވާ ފަރާތްތަކާ މެދު ކުރިއަށް އޮތް ތަނުގައިވެސް ހަރުކަށި ފިޔަވަޅުތައް އަޅަމުން ގެންދާނެ ކަމަށް އެ ވުޒާރާއިން އިންޒާރުދީފައިވެއެވެ.އުމްރާއަށް މީހުން ގެންދިއުމުގެ ޚިދުމަތް ދޭ ކުންފުނިތަކަށް އިސްލާމީ ކަންތައްތަކާ ބެހޭ ވުޒާރާއިން އިލްތިމާސްކޮށްފައިވަނީ، ގެޒެޓްކޮށްފައިވާ އުޞޫލުތަކަށް ފުރިހަމައަށް ޢަމަލުކުރުމަށާއި، އުމްރާއަށް ދާން ބޭނުންވާ ފަރާތްތަކަށް އިތުބާރުހުރި، ރައްކާތެރި ޚިދުމަތެއް ފޯރުކޮށްދިނުމަށެވެ. އަދި މި ކަމުގައި އެއްވެސް ޚިލާފެއް އުފެދިއްޖެނަމަ، ވަގުތުން އެ ވުޒާރާއަށް އެކަން އެންގުމަށްވެސް އެ ވުޒާރާއިން އިލްތިމާސްކޮށްފައިވެއެވެ.