އަލަށް ތަރައްގީކުރުމަށް ނިންމާފައިވާ އެއާޕޯޓްތަކުގެ ކޮންސެޕްޓްތައް ތައްޔާރުކޮށް، ބައެއް އިންވެސްޓަރުންވެސް ހޯދާފައިވާކަމަށް ރީޖަނަލް އެއާޕޯޓްސްގެ މެނޭޖިން ޑިރެކްޓަރު އަހްމަދު މުބީން ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން މުބީން ވިދާޅުވީ މިހާރު ހަދަމުންދާ އެއާޕޯޓްތަކުގެ މަސައްކަތް ކުރިއަށް ގެންދިޔުމަށާއި އެއާޕޯޓްތަކުގައި ހުރި ބައެއް މަސައްކަތްތައް ކުރިއަށްގެންދިޔުމަށް ފައިނޭންސް ހޯދުމުގެ މަސައްކަތް ކުރިއަށްދާކަމަށެވެ. އަދި މަސައްކަތް ނުފެށި ހުރި ގިނަ އެއާޕޯޓްތަކަށް އިންވެސްޓަރުންވެސް ހޯދާފައިވާކަމަށާއި އޭގެ ލިޔެކިޔުންތައް އިކޮނަމިކް ކައުންސިލަށް ފޮނުވުމަށް ތައްޔާރުކޮށްފައިވާކަމަށް މުބީން ވިދާޅުވިއެވެ.
މީގެ އިތުރުން މުބީން ވިދާޅުވީ އެއާޕޯޓްތައް ހިންގާ ރަށްތަކުގައި ވިޔަފާރިގެ ހަރަކާތްތައް ކުރިއަށްގެންދެވޭނެ ގޮތްތައްވެސް ބަލަމުންދާ ކަމަށެވެ. އެގޮތުން ކައުންސިލްތަކާ ގުޅިގެން އެ މަސައްކަތްތައް ކުރަމުން އަންނަކަން ފާހަގަކޮށް މުބީން ވިދާޅުވީ އެކަމަށްޓަކައި މާސްޓާ ޕްލޭން އެކުލަވާލުމަށް ނިންމަވާފައިވާކަމަށެވެ.
ރާއްޖޭގައި މިހާރުވެސް 19 އެއާޕޯޓެއް ހިންގަމުން އަންނައިރު އޭގެތެރޭގައި 5 އިންޓަނޭޝަނަލް އެއާޕޯޓާއި، 14 ޑޮމެސްޓިކް އެއާޕޯޓު ހިމެނެއެވެ. މީގެ އިތުރުން މިވަގުތުވެސް 4 ޑޮމެސްޓިކް އެއާޕޯޓެއްގެ މަސައްކަތް ކުރިއަށްދާއިރު މި ސަރުކާރުން އިތުރު 20 އެއާޕޯޓެއް އެޅުމެވެ. މީގެތެރޭގައި މިހާރު މަސައްކަތް ކުރިއަށްދާ އެއާޕޯޓްތައްވެސް ހިމެނެއެވެ.