އީރާނުގެ އިތުރު ހަނގުރާމަ މަތީ މަނަވަރެއް މިއަދު އަނެއްކާވެސް ސްރީ ލަންކާ ކައިރިއަށް ދަތުރުކޮށްފައިވާ ކަމަށާއި, ކާނާއާއި ފެން ފަދަ ތަކެތި ހޯދުމަށް ބަނދަރު ކުރުމުގެ ހުއްދައަށް އެދިފައިވާ ކަމަށް ލަންކާގެ އޮފިޝަލުން ބުނެފިއެވެ. ލަންކާގެ ކަނޑުގެ ސަރަހައްދުން ބޭރުގައި އޮތް އީރާނުގެ އެހެން މަަަނަވަރެއް ކަމަށްވާ އައިރިސް ޑޭން އަށްވެސް ލަންކާ ސިފައިން ވަނީ އެހީ ވެދީފައެވެ. އެ މަނަވަރަކީ އެެމެރިކާގެ ސަބްމެރިންއަކުން ދިން ޓޯޕިޑޯ ހަމަލާއެއްގައި ފައްތާލާފައިވާ މަނަވަރެއް ކަމަށް އެމެރިކާއިން އިއްޔެ ވަނީ ބުނެފައެވެ. ލަންކާ ސަރަހައްދުގައި މިހާރުއޮތް މަނަވަރުގައި 100 އަހަރު ވުރެ ގިނަ ފަޅުވެރިން ތިބިކަމަށް ބޭރުގެ މީޑިއާތަކުން ރިޕޯޓުކުރެއެވެ. އީރާނުން ވެސް ވަނީ އެ ގައުމުގެ މަނަވަރެއް ލަންކާ ކައިރީގައި އެބަ އޮތް ކަމާއި މިހާރު ދަތުރުކުރަނީ ލަންކާގެ ކަނޑުގެ ސަރަހައްދަށް ވަންނަންކަން ކަށަވަރުކޮށްދީފައެވެ. އޭއެފްޕީއިން ރިޕޯޓުކޮށްފައިވާ ގޮތުގައި އެ މަނަވަރުވެސް ފައްތާލާފާނެ ކަމުގެ ބިރު އެބައޮތެވެ. ލަންކާގެ ކެބިނެޓް ތަރުޖަމާނު ޑރ. ނަލިންދާ ޖަޔަތީސާ ވިދާޅުވީ މަނަވަރުގައި ތިބި ފަޅުވެރިންގެ ފުރާނަ ސަލާމަތް ކުރުމަށް ކުރެވެން އޮތް ހުރިހާ މަސައްކަތެއް ކުރަމުން ދާ ކަމަށެވެ. ނަމަވެސް ލަންކާގައި ބަނދަރު ކުރުމަށް އެދުނު އެހީއާ މެދު ގޮތެއް ނިންމިކަމެއް ނުވަތަ ނޫން ކަމެއް ވިދާޅެއް ނުވެއެވެ. އެމެރިކާއިން ފައްތާލި ކަމަށް ބުނާ އައިރިސް ޑެނާއިން، ލަންކާގެ ދެކުނުގެ ގައްލޭގެ ގާތްގަނޑަކަށް 40 ނޯޓިކަލް މޭލު (75 ކިލޯމީޓަރު) ދުރުގައި އޮވެ އެހީއަށް އެދުނީ އަންގާރަ ދުވަހު ހެނދުނު ހަޔަކާއި ހެނދުނު ހަތަކާ ދެމެދުގެ ވަގުތެއްގައެެވެ. އެ މަނަވަރުގައި ތިބި، ޒަަޚަމްވެފައިވާ 32 މީހުންނަށް ފަރުވާ ދެމުން އަންނައިރު، ގެއްލުނު މީހުން ހޯދުމުގެ މަސައްކަތް ލަންކާއިން އަންނަނީ ކުރަމުންނެވެ. އައިރިސް ޑޭނާއަކީ މިދިޔަ މަހު އިންޑިއާގައި އޮތް، އެކި ގައުމުތަކުން ބައިވެރިވި މިލާން-2026 ނޭވަލް އެކްސަސައިޒްގައި ބައިވެރިވުމަށް ފަހު އެނބުރި ދިޔަ މަނަވަރެކެވެ.