އިންޑިއާ ސަރުކާރުން ރާއްޖެއަށް 25 މިލިޔަން ޑޮލަރު ދިނުމުގެ އެއްބަސްވުމެއްގައި މިއަދު ސޮއިކޮށްފިއެވެ.
އިންޑިއާ ހައިކޮމިޝަންގައި މިއަދު ހެނދުނު އޮތް ރަސްމިއްޔާތެއްގައި ދިވެހި ސަރުކާރުގެ ފަރާތުން މިއެއްބަސްވުމުގައި ސޮއިކުރެއްވީ ފިނޭންސް މިނިސްޓަރ ޢަބްދުﷲ ޖިހާދެވެ. މިއެއްބަސްވުމުގައި އިންޑިއާ ސަރުކާރުގެ ފަރާތުން ސޮއިކުރެއްވީ، އިންޑިއާގެ ހައިކޮމިޝަނަރ ޑީ.އެމް. މުލޭއެވެ.
މިއެއްބަސްވުމުގައި ސޮއިކުރެއްވުމަށްފަހު މުލޭ ވިދާޅުވީ، މިފައިސާއަކީ، މިދިޔަ އަހަރު ބޭއްވި ސާކް ސަމިޓުގައި އިންޑިއާގެ ބޮޑުވަޒީރު މަންމޯހަން ސިންގް، ރާއްޖެއަށް ދެއްވުމަށް އެއްބަސްވެވަޑައިގަތް 100 މިލިޔަން ޑޮލަރުގެ ބައެއް ކަމަށެވެ. މިފައިސާގެ ތެރެއިން 50 މިލިޔަން ޑޮލަރު ދެބަޔަކަށް ބަހާލައިގެން، މީގެ ކުރިންވެސް ވަނީ ދިވެހި ސަރުކާރާ ހަވާލުކޮށްފައެވެ. އެގޮތުން މިދިޔަ އަހަރު 30 މިލިޔަން ޑޮލަރު ދީފައިވާއިރު، ބާކީ 20 މިލިޔަން ޑޮލަރު ދީފައިވަނީ މިއަހަރުގެ ފެބުރުއަރީ މަހުގެ ފަހުކޮޅުއެވެ.
މިއަދު ސޮއިކުރެވުނު އެއްބަސްވުމުގެ ދަށުން، އިތުރު 25 މިލިޔަން ޑޮލަރު މިހަފުތާ ތެރޭގައި ދިވެހި ސަރުކާރާ ހަވާލު ކުރާނެ ކަމަށާއި، އަދި 100 މިލިޔަން ޑޮލަރުގެ ތެރެއިން ބާކީ އޮތް 25 މިލިޔަން ޑޮލަރުވެސް ވަރަށް އަވަހަށް ދިވެހި ސަރުކާރާ ހަވާލުކުރާނެ ކަމަށް އިންޑިއާ ހައިކޮމިޝަނުން ބުނެއެވެ.