އޭޕްރީލް އަދި މެއި މަހު ކަރަންޓު ޚަރަދު މިހާރަށް ވުރެ ބޮޑުވެގެން ހިނގައިދާނެ ފަދަ މޭރުމަކުން ސްޓެލްކޯއިން އިލްތިމާސެއް ނެރެފިއެވެ.
މިދިޔަ ހޮނިހިރު ދުވަހު ނިމުނު ކ. ގުރައިދޫ ބައި- އިލެކްޝަނުގައި އެންމެ ހަރަކާތްތެރިކޮށް ފެނިގެންދިޔަ ސަރުކާރު ކުންފުނިން މިއަދު ސޯޝަލް މީޑިއާ އަށް ދޫކޮށްލި އެ އިލްތިމާސްގައި ބުނެފައިވަނީ ކޮންމެ އަހަރެއްގެ އޭޕްރީލް އަދި މެއި މަހަކީ އަހަރުގެ އެންމެ ހޫނު ގަދަ ދުވަސްތަކަށް ވާތީ މި ދުވަސްވަރު ކަރަންޓު އިގުތިސާދު ކުރުމަށް ހާއްސަ ސަމާލުކަމެއް ދޭންޖެހޭ ކަމަށެވެ.
އަދި ކަރަންޓު އިސްރާފުވިޔަ ނުދީ، ކޮންމެހެން ބޭނުންވާ މިންވަރަށް ކަރަންޓު ބޭނުންކުރުމަށް އެ ކުންފުނިން ވަނީ އެދިފަ އެވެ. އެގޮތުން އޭސީ 16ގައި ބެހެއްޓުމުގެ ބަދަލުގައި 25 ގައު ބެހެއްޓުމާއި ބޭނުންކޮށް ނިމުމުން ސްވިޗުތައް އޮފް ކުރުމާއި އޭސީ ކޮށްފައި ހުންނަ ކޮޓަރިތަކުގެ ކުޑަ ދޮރުތައް ހުޅުވާފައި ނުބެހެއްޓުން ހިމެނެ އެވެ.
ކަރަންޓު ޚަރަދު ކުޑަ ކުރުމަށް ސްޓެލްކޯއިން އަންގާފައިވާއިރު، ސްޓެލްކޯއިން މަހެއްގެ މައްޗަށް އެކި އެކި ނޫސްތަކަށް 6 ލައްކައަށް ވުރެ ގިނަ ރުފިޔާ ދެމުން އަންނަ ކަން ފާހަގަ ކުރެވެއެވެ.
އެގޮތުން ސަރުކާރު ކުންފުނިތަކުގެ ތެރެއިން ސްޓެލްކޯއަކީ އެންމެ ގިނަ އަދަދަކަށް ނޫސްތަކަށް ފައިސާ ދެމުން އަންނަ ކުންފުންޏެވެ. މިގޮތުން "ދިޔަރެސް" އަށް ލިބިފައިވާ މައުލޫމާތުތަކަށް ބަލާއިރު ސްޓެލްކޯއިން ކޮންމެ މަހަކު 630،600.00 ރުފިޔާ ތަފާތު 29 ނޫހަކަށް ދެއެވެ. އޭގެތެރެއިން ގިނަ ނޫސްތަކަކީ ގަވާއިދުން އަޕްޑޭޓުވެސް ނުވާ ނޫސްތަކެވެ. އަދި ވަރަށް ގިނަ ނޫސްތަކަކީ ސަރުކާރުގެ ސިޔާސީ އެކި ފަރާތްތަކާއި ކޮންމެވެސް ގޮތަކަށް ގުޅުން އޮންނަ ނޫސްތަކެވެ.
ސްޓެލްކޯ އިން ހަރަދުކުރާ ނޫސްތައް
މިހާގިނައިން ފައިސާ ސްޓެލްކޯއިން ރައްޔިތުންނަށް ފައިދާ ނުވާގޮތަށް ހޭދަ ކުރަމުންދާއިރު ރައްޔިތުންގެ އަތުން ކޮންމެ އަހަރަކު ޚަރަދު ކުޑަ ކުރަން ކަމަށް ބުނެ ގިނަ އަދަދަކުން ފައިސާ ނަގައެވެ.
މި ސަރުކާރުން ޖީއެސްޓީ ބޮޑުކުރުމާއެކު ތަކެތީގެ އަގު އިންތިހާއަށް އުފުލިފައިވާ މިދަނޑިވަޅުގައި ރައްޔިތުންނަށްދޭ ޒަރޫރީ މިފަދަ ޚިދުމަތެއް މިހާ އަގު ބޮޑުކޮށް ދެމުންދާތީ ގިނަ މީހުންނަށް މަހުން މަހަށް ސްޓެލްކޯއަށް ދައްކަން ޖެހޭ ފައިސާ ވެސް އޮންނަނީ ނުދެއްކިފައެވެ.