މަރުވާނެކަން ޔަޤީނެވެ. މަރުވާނެކަން ހިތަށްއަރާހިނދު ކުރަންވީ އެއްކަމަކީ ކައްވަޅުތަކުން ގޮވާ ގޮވުންތަކުގެ އަޑުއަހައިލުމެވެ. ކައްވަޅުތަކުން ކެނޑިނޭޅި އެ ގޮވަނީއެވެ. "މިއީ ބިރުވެރިތަނެކެވެ. މިތަނުގައި ވަނީ ފަނިފަކުސަތަކެވެ. ފަނިފަކުސާތައް އެކަތި އަނެކަތި ކަނީއެވެ. މިއީ އަނދިރިކަން ބޮޑުތަނެކެވެ. މިއީ ގަދަ ފަދަ ޢަޛާބް ލިބޭ ތަނެކެވެ. މިތަނަށް އައުމުގެ ކުރިން މިތަނަށް އަންނަން ފުރިހަމައަށް ތައްޔާރުވާށެވެ!"
ޢަލީގެފާނު ވިދާޅުވެފައިވެއެވެ. "ދުނިޔޭގައި ކިތަން ބާރުގަދަ މީހެއްގެ ގޮތުގައި އުޅުނު ނަމަވެސް މަރަށް ފިލަން ދެވޭނެ އެއްވެސް ތަނެއް ނުއޮންނާނެއެވެ. މަރަށް ފިލަން ގޮސް ދުނިޔޭގެ ކޮންމެ ތަނެއްގައި ހުރި ނަމަވެސް މަރުވުމުގެ ވަގުތު ޖެހުމުން ތިބާގެ ކުރިމަތީގައި މަރު އައިސް ހުންނާނެއެވެ." މާނައަކީ ފުރާނަ ހިއްޕެވުމަށްޓަކައި ތިބާގެ ކުރިމަތީގައި މަލަކުލްމައުތު ހުންނަވާނެ ކަމެވެ.
ވީމާ މަރުމަތިން ހަނދާންވުމުން ބާރަށް ދުވަންވީ މަރަށް ފިލާކަށް ނޫނެވެ. ގައި ހުރި ހުރިހާ ބާރެއް ދެފައަށްލާފައި ބާރަށް ދުވެފައި ދާންވީ ސަހަރާއަށެވެ. ސަހަރާގައި ހުރި މަހާނަތަކަށް ބަލައިލާށެވެ! ދުނިޔޭގައި އުޅުނު އެންމެ ބާރުގަދަ ވެރިންނާއި އެންމެ މުއްސަނދި ފައިސާވެރިން މިއަދު އެތިބީ ވަޅުލެވިފައެވެ. އެއްވެސް ޢާރެއް ބާރެއް ނެތް ބަލިކަށި ކަނބިލިތަކެއް ފަދައިންނެވެ.
މަރުވުމާއި ބެހޭގޮތުން ސައިންސް ވެރިން މިހާރުވެސް ވަނީ 200އަށްވުރެ ގިނަ ފަތުވާ ނެރެފައެވެ. ނަމަވެސް އެންމެ ފަތުވާއެއްގައިވެސް އެންމެ ކުޑަމިނުން މަރުވުމަކީ ކޮބައިކަން އަދި ފުރާނައަކީ ކޮބައިކަން ބަޔާންކޮށްދެވިފައެއް ނުވެއެވެ. އެނގޭ މިންވަރެއް އެނގެނީ ކީރިތި ޤްރުއާނުން އެކަންޏެވެ. އެ މިންވަރަކީ ފުރާނަ އަޅުއްވަވަނީ ވެސް ފުރާނަ ގެންދަވަނީވެސް ﷲ ތަޢާލާ ކަމެވެ. މިއަށްވުރެ އިތުރަށް އެނގޭނެ އެއްވެސް ގޮތެއް ނެތެވެ.
ޒިނޭކޮށް ފާހިޝް އަމަލުތައް ހިންގައި އުޅޭ މީހުން ކޮބައިހެއްޔެވެ؟ މީސްތަކުންގެ ޙައްޤުތަކަށް އަރައިގަންނަ މީހުން ކޮބައިހެއްޔެވެ؟ ﷲ ތައާލާގެ އެންގެވުންތައް ބޮލާލައި ޖެހުމަށްފަހު ދުނިޔެއާއިގެން އުޅޭ މީހުން ކޮބައިހެއްޔެވެ؟ އިބިލީހުގެ ދުންމާރިތަކަށް، މިޔުޒިކަށް ޣާފިލުވެގެން އުޅޭ މީހުންތައް ކޮބައިހެއްޔެވެ؟ ކައްވަޅަށް ދާން ޖެހުމުގެ ކުރިން ތިމާއަށް މިއުޅެވޭ ގޮތާއިމެދު ވިސްނައިލާށެވެ!
މީސްތަކުންނޭވެ! ކީރިތި ޤްރްއާނަށް ބަލާށެވެ! މަރުގެ ވާހަކަތަކަށް ސަމާލުކަންދޭށެވެ. ނަރަކައިގެ ޢަޛާބުގެ ވާހަކަތަކަށް ބިރުވެތިވާށެވެ.
" ﷲ މީސްތަކުން އުފެއްދެވީ ވެލިންނެވެ. އެނބުރިދާނީވެސް ވެއްޔަށެވެ. ހަށިތަކުގައި ފުރާނަ އަޅުއްވަވައި އަލުން ނެރުއްވަވާނީވެސް ހަމަ ވެލީގެ ތެރެއިންނެވެ." މިޙަޤީޤަތް ޤަބޫލުކުރާށެވެ!
ހަމަ އެއާއިއެކު ﷲ ތަޢާލާ ވަހީކުރައްވަވާފައިވެއެވެ. "ފުރިހަމަ ހިސާބު ބެއްލެވުމަކުން ހިސާބު ބައްލަވާހުށީމެވެ. ފޭލްވެއްޖެ މީހުންނަށް ހުރީ ނަރަކައިގެ ގަދަފަދަ ޢަޛާބެވެ." ހިތާމައަކީ މިކަންކަން ހިތަށް އެރުވޭލެއް މަދުކަމެވެ.
--ޝައިޚް އަހްމަދު ސުލައިމާން ޚަތާނީގެ ދަރުސަކުން