ކުރިއަށް އޮތް ދައުރުގެ ވާހަކަ އެއްކިބައިގައި ބާއްވާފައި ކުރިއަށް އޮތް މަސްދުވަހު ވެސް ރައީސުލްޖުމްހޫރިއްޔާގެ މަގާމުގައި މުހައްމަދު މުއިއްޒު ބަހައްޓަން ރައްޔިތުންގެ ތެރެއިން ގިނަ މީހުން ބޭނުން ނުވާނެ ކަމަށާއި އެންމެ ރީތި ގޮތަކީ ވެރިކަން ނުކުރެވުނު ކަމަށް އަމިއްލައަށް ގަބޫލުކޮށް މަގާމުން އިސްތިއުފާ ދިނުން ކަމަށް މި ވެރިކަން ޕީއެންސީއަށް ހޯދައިދެއްވި ޔާމީން އަބްދުލްގައްޔޫމް ވިދާޅުވެއްޖެ އެވެ.
އަދަދު ނޫހުން ގެނެސްދޭ އެތެރެފުށް ޕްރޮގުރާމުގައި، ކުރިއަށް އޮތް ދައުރު މުއިއްޒުއަށް ކާމިިޔާބު ކުރެވިދާނެތޯ ސުވާލު ކުރުމުން ޔާމީން ވިދާޅުވީ ރައްޔިތުން އުޅެމުން ދަނީ އިންތިހާއަށް ދަތި ހާލުގައި ކަމަށެވެ. އަދި ދައުލަތުގެ ދަރަނި ވެސް އެހާ ބޮޑު ކަމަށް އެމަނިކުފާނު ވިދާޅުވި އެވެ.
ގައުމުގެ ހާލަތު މިހެން އޮއްވައި ކުރިއަށް އޮތް މަސް ދުވަހު ވެސް ވެރިކަމުގައި މުއިއްޒު ހުންނަވައިގެން ވާނެ ފައިދާއެއް ކިޔައިދޭނެ މީހަކު ރައްޔިތުންގެ ތެރޭގައި ނުހުންނާނެ ކަމަށް ޔާމީން ވިދާޅުވި އެވެ.
"އެހެންވީމާ ކީއްކުރަންތޯ މި އަންނަ ދައުރު؟ މި އަންނަ މަހު ވެސް މުއިއްޒު ހުންނަވައިފި ކަމަށްވަންޏާ ދިވެހި ރައްޔިތުންނަށް އިތުރަށް އަނިިޔާތައް، އަނިޔާ މި ދެންނެވީ ތަކެތީގެ އަގު ބޮޑުވުމާއި ދިރިއުޅުމުގެ ހަރަދު ދެކޮޅު ނުޖެއްސުމާއި މިކަހަލަ ބޮޑެތި ގެއްލުން ވެގެން މިދަނީ،" ޔާމީން ވިދާޅުވި އެވެ.
"އާސަންދަ ހުސްވުން، މިކަހަލަ އެތައް ކަމެއް މި ދަނީ، އެހެންވީމާ އެކަންކަމަށް ވިސްނާއިރު އަދި އިތުރު އެއް މަސްދުވަސް ހުންނަވަން ވެސް ގިނަ ބަޔަކު ބޭނުމެއް ނުވާނެ ކަމަށް އަޅުގަނޑަށް ގަބޫލު ކުރެވެނީ."
ގައުމުގެ ހާލަތާއި ރައްޔިތުންގެ ރޫހު ހުރިގޮތަށް ބަލާއިރު، އެންމެ ރީތި ގޮތަކީ ވެރިކަން ނުކުރެއްވުނު ކަމަށް ގަބޫލު ކުރައްވައި އަމިއްލައަށް މުއިއްޒު އިސްތިއުފާ ދެއްވުން ކަމަށް ޔާމީން ވިދާޅުވި އެވެ. އަދި ރައްޔިތުންނަށް ހެޔޮ ގޮތް އެދިވަޑައިގަންނަވާ ނަމަވެސް ކުރައްވަންވީ ކަމަކީ މުއިއްޒު އަމިއްލައަށް އިސްތިއުފާ ދެއްވުން ކަމަށް ޔާމީން ވިދާޅުވި އެވެ.
"މާ ޝަރަފުވެރި އެއަށްވުރެ މާ އޮނަރަބަލް ގޮތެއް އެބައޮތް، ރަނގަޅު ގޮތަކީ ތިމަންނައަށް ރައްޔިތުން އެދޭ ގޮތަށް އަދި ތިމަންނަ ބުނި ގޮތަށް މިކަމެއް ނުކުރެވުނު ކަމަށް މުއިއްޒު އަމިއްލަފުޅަށް ގަބޫލުފުޅު ކުރައްވާފައި މުއިއްޒު ދުރަށް ވަޑައިގަތުން އެންމެ ރަނގަޅު ގޮތަކީ،" ޔާމީން ވިދާޅުވި އެވެ.
އެމަނިކުފާނު ވިދާޅުވީ ކޮންމެ ބޭފުޅަކު ވެސް ވެރިކަމަށް ވަޑައިގަންނަވަނީ ރައްޔިތުންނަށް ހިދުމަތް ކުރަން ކަމަށެވެ. އެގޮތުން ކޮންމެ ބޭފުޅަކު ވެސް ވެރިކަމަށް ވަޑައިގަންނަވަނީ އެތައް ކަމެއް ކޮށްދިނުމަށް ވައުދުވެވަޑައިގެންކަމަށް ޔާމީން ވިދާޅުވި އެވެ.
ނަމަވެސް މުއިއްޒު ވެރިކަމަށް ވަޑައިގަތުމަށް ވެވަޑައިގެންނެވި ވައުދުތައް އެގޮތަށް ފުދިގެން ނުދާ ކަމަށް ރައްޔިތުންގެ ތެރެއިން ގިނަ ބަޔަކު ގަބޫލު ކުރައްވާ ކަމަށްވަންޏާ ވެރިކަމުގައި ހުންނެވުމުގެ ބޭނުމަކީ ކޮބައިތޯ ޔާމީން ސުވާލު އުފެއްދެވި އެވެ.
"ދެން އެ ކަންކަން އެއްވެސް ވަރަކަށް ފުދިގެން ނުދާކަމަށް ރައްޔިތުންގެ އެތައް ބަޔަކު ގަބޫލު ކުރައްވާ ކަމަށް ވަންޏާ އަނެއްކާ އެކަން މުއިއްޒުއަށް އެނގިވަޑައިގަންނަވަންޏާ ދެން ކީއްކުރަންތޯ ކޮންމެހެން ގަދަކަމުން ފަސް އަހަރުގެ ދައުރެއް އޮތިއްޔޭ ކިޔާފައި ގަދަކަމުން އެ ދައުރު ފުރިހަމަ ކުރަން އުޅުއްވާ އެއްޗެއް ނޫން،" ޔާމީން ވިދާޅުވި އެވެ.