ޔޫރޮޕާ ލީގުގައި ރޭ ޖަރުމަނުގެ އެލްފްސްބޯރގް އާއި ދެކޮޅަށް ޓޮޓްނަމް ހޮޓްސްޕަރ ކުޅުނު މެޗު 3-0 ގެ ނަތީޖާއަކުން ކާމިޔާބުކޮށް މުބާރާތުގެ ދެވަނަ ބުރުގެ ސީދާ ޖާގައެއް ހޯދައިފި އެވެ.
މި މެޗުން ޓޮޓްނަމް ހޮޓްސްޕަރ މޮޅުވުމާއެކު އެ ޓީމަށް ވަނީ ފުރަތަމަ ބުރުގައި ކުޅުނު 8 މެޗުން 17 ޕޮއިންޓާއެކު ތާވަލުގެ ހަތަރުވަނަ މަގާމް ލިބިފަ އެވެ. މި މެޗުން ބަލިވި އެލްފްސްބޯރގް އަށް އަށް މެޗުން ލިބުނު 10 ޕޮއިންޓާއެކު އެ ޓީމަށް 26 ވަނަ ލިބުމާއިއެކު އެ ޓީމު ވަނީ މުބާރާތުން ކަޓާފަ އެވެ. ނަމަވެސް 10 ޕޮއިންޓާއެކު ތިން ޓީމެއް މުބާރާތުގެ ދެވަނަ ބުރުގެ ޕްލޭއޮފް މެޗަށް ކޮލިފައިވި ނަމަވެސް އެ ޓީމުތަކަށް ކުރި ލިބިފައިވަނީ ގޯލުގެ ތަފާތުންނެވެ.
ޓޮޓްނަމް ހޮޓްސްޕަރ ގެ ދަނޑުގައި ކުޅުނު މި މެޗަށް އެ ޓީމުން ނިކުތްއިރު ވަނީ އަނިޔާގެ ގިނަ މައްސަލަތަކެއް ކުރިމަތިވެފަ އެވެ. އެގޮތުން އެ ޓީމުގެ 12 ކުޅުންތެރިންނަށް އަނިޔާގެ ސަބަބުން މި މެޗުގައި ނުކުޅެވެ އެވެ.
ކޯޗު ޕޮސްޓެކޮގްލޫ ވަނީ ޒުވާން ގިނަ ކުޅުންތެރިންނަށް މި މެޗުން ފުރުސަތު ދީފަ އެވެ. އަދި އެ ކުޅުންތެރިން ވަނީ އެމީހުންގެ ކުޅަދާނަކަން މި މެޗުގައި ކޯޗަށް ސާބިތުކޮށްދީފަ އެވެ.
މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވިފައިނުވި ނަމަވެސް ދެވަނަ ހާފުގައި ޓޮޓްނަމް ހޮޓްސްޕަރ ވަނީ ރަގަޅު ކުޅުމެއް ދައްކާފަ އެވެ. ދެވަނަ ހާފަށް ނިކުތްއިރު ކޯޗު ވަނީ ތިން ބަދަލެއް ޓީމަށް ގެނެސްފަ އެވެ. އެގޮތުން ކެޕްޓަން ސޮން ހިއުން-މިން އާއި ބެންޓަކޫރުގެ އިތުރުން ވެންޑަވިންގެ ބަދަލުގައި ކުލުސޭވްސްކީ އާއި ބިސޫމާގެ އިތުރުން ޑްރަގުސިން ވަނީ ކުޅެން އަރުވާފަ އެވެ.
މި މެޗުގައި ޓޮޓްނަމް ހޮޓްސްޕަރ އިން ޖެހި ފުރަތަމަ ލަނޑު މެޗުގެ 70 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ ކުލުސޭވްސްކީ ނަގައިދިން ހުރަހަކުން ބޮލުން ޖަހާ ވިހި އަހަރުގެ ޑޭން ސްކާލެޓް އެވެ.
އަދި އޭޣެ 14 މިނިޓް ފަހުން 19 އަހަރުގެ ޑެމޯލާ އަޖޭއީ ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 2-0 އަށް ބަދަލުކޮށްފަ އެވެ.
މި މެޗުގައި ޓޮޓްނަމް ހޮޓްސްޕަރ އިން ޖެހި ތިންވަނަ ލަނޑު މެޗުގެ އިތުރު ވަގުތުގެ ހަތަރު ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ 17 އަހަރުގެ މިކީ މޯ އެވެ. މި ލަނޑާއެކު އޭނާ ވެފައިވަނީ ޔޫރަޕްގެ ފުޓްބޯޅަ މުބާރާތެއްގައި ލަނޑުޖެހި އިނގިރޭސިވިލާތުގެ އެންމެ ޒުވާން ކުޅުންތެރިޔާއަށް ވެފަ އެވެ.
މީގެ ކުރިން މި ރެކޯޑް އޮންނަ އިނގިރޭސި ކުޅުންތެރިޔަކީ 1957 ވަނަ އަހަރު 17 އަހަރާއި 245 ދުވަހުން ލަނޑު ޖަހާފައިވާ ޖިމީ ގްރީވްސް އެވެ. ޖިމީ މޯ ރޭގެ މެޗުގައި ލަނޑު ޖެހިއިރު އޭނާގެ އުމުރަކީ 17 އަހަރާއި 172 ދުވަހެވެ.