ކުރީގެ ރައީސުންނާއި ފަނޑިޔާރުންގެ އިތުރުން ކުރީގެ މަޖިލިސް މެންބަރުންގެ އިނާޔަތްތަކަށްވެސް ބަދަލު ގެންނަން ޖެހޭ ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާޢު ވިދާޅުވެއްޖެއެވެ.
ދިވެހިރާއްޖޭގެ އަޑުން ގެނެސްދޭ "އަހާށޭ ބުނާނަން" ޕްރޮގްރާމުގައި އެހުންތެރިން ފޮނުވާފައިވާ ސުވާލުތަކަށް ޖަވާބުދެއްވަމުން ޝުޖާޢު ވިދާޅުވި ގޮތުގައި ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކުރުމާ ގުޅޭ ގޮތުން މަޝްވަރާކުރެވޭ ކޮންމެ ފަހަރަކު އެކަމަށް ވަކާލާތު ކުރައްވާނެ ކަމަށެވެ. އަދި މިހާރުވެސް އަދި ކުރިންވެސް މަޖިލީހުގެ މެންބަރަކު މެންބަރުކަމުން ވަކިވުމަށްފަހު އިންޝުއަރެންސް ލިބެން ޖެހޭކަމަށް އަދި މެންބަރުންނަށް ދައުރު ހަމަވުމުން ލިބޭ މާލީ އިނާޔަތް ލިބެންޖެހޭ ކަމަށްވެސް ގަބޫލުނުކުރައްވާ ކަމަށް އެ މެންބަރު ވިދާޅުވިއެވެ.ނަމަވެސް ޝުޖާޢު ފާހަގަކުރެއްވި ގޮތުގައި މި ބަދަލު އަންނަންޖެހެނީ ހަމައެކަނި މަޖިލިސް މެންބަރުންނަށް ނޫނެވެ. އޭގެ ބަދަލުގައި ދައުލަތުގެ ހުރިހާ ބާރަކަށްވެސް މި ބަދަލު އަންނަންޖެހޭ ކަމަށް އެ މެންބަރު ވިދާޅުވިއެވެ. އެގޮތުން ރައީސްކަން ކުރައްވާފައިވާ ބޭފުޅުންނާއި ފަނޑިޔާރުކަން ކުރައްވާފައިވާ ބޭފުޅުންގެ އިނާޔަތްތަކާ ގުޅޭ ވާހަކަތައް މިހާރު ނުދެކެވޭ ކަމަށާއި، ދެކެވެނީ ހަމައެކަނި މަޖިލިސް މެންބަރުންގެ މުސާރައާއި އިނާޔަތްތަކުގެ ވާހަކަތައް ކަމަށް ޝުޖާޢު ފާހަގަކުރެއްވިއެވެ."ފަނޑިޔާރުން ލިބެންޖެހޭ މާލީ އިނާޔަތްތަކާއި ހުރިހާ އެއްޗެއް އޭނަ ރިޓަޔަރ ވީމަވެސް ލިބޭގޮތަށް އޮވެފައި. ވެރިކަން ކުރާ މީހާއަށް އޭނާ ރިޓަޔަރ ކުރެއްވީމަ ނުވަތަ ވަކިވީމަ ހުރިހާ އެއްޗެއް ލިބިފަ، ރައްޔިތުންގެ މަޖިލީހުގެ މެންބަރުންނަށް މިހުރިހާ އެއްޗެއް އިސްތިސްނާވުން ނުވަތަ ވަކިވެގެންދާގޮތަށް އޮތީމަ ސިސްޓަމް ހަމަނުޖެހެނީ،" ޝުޖާޢު ވިދާޅުވިއެވެ.ޝުޖާޢު ވިދާޅުވީ މި މައްސަލައަށް ޖުމްލަ ހައްލެއް ގެންނަން ޖެހޭ ކަމަށެވެ. އަދި ބާރަށު ދާއިރާގެ މެންބަރުގެ ހައިސިއްޔަތުން މިއަދުވެސް އަދި ކުރިންވެސް ގަބޫލުކުރައްވަނީ މި މައްސަލައަށް "ކަލެކްޓިވް ސޮލިއުޝަނެއް" އަންނަންޖެހޭ ކަމަށް ކަމުގައި އެ މެންބަރު ވިދާޅުވިއެވެ.