އެއްވެސް ރައުސުލްމާލެއް އެސެޓެއް ނުދީ މުއިއްޒު ސަރުކާރުން އުފެއްދި ކަރުދާސް ކުންފުނި މިޑްފްރީ ޒޯން އަކީވެސް ފަސާދައާއި ކޮރަޕްޝަނުގެ ހާއްޔަކަށް ދަނީ ހަދަމުންނެވެ. ރަނގަޅަށް އިންތިޒާމްވެގެން ކުރިއަރަމުންއައި އެގްރޯނެޓް ހަރުދަނާކޮށް ވަރުގަދަ ކުރުމުގެ ބަދަލުގައި މުއިއްޒު ދިމާކޮށްފައިހުރީ އެގްރޯނެޓް ވާގިނައްތާލާ އެގްރޯނެޓްގެ ވަސީލަތްތައް ބޭނުންކޮށްގެން މިޑްފްރީ ޒޯން ވައްކަމުގެ ހާއްޔަކަށް ހަދާށެވެ. 
އެގްރޯނެޓްގެ މުއައްޒަފުންނަށް ވަގަށް އެމީހުންގެ ރުހުމެއްނެތި މިޑްފްރީ ޒޯނަށް އެގްރޯނެޓް މުއައްޒަފުން ބަދަލުކުރުމުގެ މަސައްކަތް މުއިއްޒު ވަނީ ފަށާފައެވެ. އެގްރޯނެޓްގެ މުއައްޒަފުން މިޑްފްރީ ޒޯނަށް ބަދަލުކުރަނީ އެގްރޯނެޓްގެ ބޯޑުގެ ރުހުމެއް އެންގުމެއް ނިންމުމެއް ނެތިއެވެ. ކަނޑައެޅިގެން ގާނޫނާ ހިލާފަށެވެ. 
މުއިއްޒު ކަމެއް ކުރަން ބޭނުންވުމުން ގަވައިދަކަށް ގާނޫނަކަށް މޫނަކަށް ކަނދުރާއަކަށް ނުބަލައެވެ. ރާއްޖެއަކީ ޒަމާނުއްސުރެ ގާނޫނީ ހަމަތަކެއްގެ ތެރެއިން މުއައްޒަފުންގެ ހައްގުތަކާއި ދައުލަތުގެ ހައްގުތައް ރައްކާތެރިކޮށްދެވޭ ގޮތަށް ތަރުތީބަކުން ހިނގަމުން އަންނަ ގައުމެއް ކަމެއް މުއިއްޒު ހަނދާނެއް ނުހުރެއެވެ. 
ރަނގަޅަށް ހިނގަހިނގާ އޮތް އެގްރޯނެޓް ވާގިނައްތާލާ މިޑްފްރީ ޒޯނަށް އެގްރޯނެޓްގެ މުއައްޒަފުންނާއި މިލްކިއްޔާތު ބަދަލުކޮށްލުމުގައި ހަމައެއް އުސޫލެއް ނެތެވެ. ގާނޫނީ ލަފައެއް މުއައްޒަފުންގެ ރުހުމެއް މުއިއްޒަކަށް ބޭނުމެއް ނުވެއެވެ. ވާނީ އެހެންތާއެވެ. މުއިއްޒު ދައުލަތް ހިންގަނީ އެންމެ ފަސޭހައިން ކޮރަޕްޝަނާއި ވައްކަން ހިންގާލެވޭނެ ގޮތަކަށެވެ. 
ކޮންމެ ކުންފުންޏަކަށްހެން ވެރިންގެ ގޮތުގައި އިސްކޮށްގެން މަސައްކަތް ކުރުވަނީ ވައްކަމުގެ ރެކޯޑް އޮތް މީހުންނެވެ. އެގްރޯނެޓްގެ ތެރޭގައި މުއިއްޒު ބޭނުންވާ ގޮތައް ކަންކަން ކުރަން އިސްކޮށްގެން އުޅެނީ ވެސް ވައްކަމުގެ ރެކޯޑް އޮތް ބައެކެވެ. 
އެގްރޯނެޓްގެ މެނޭޖިންގ ޑިރެކްޓަރ ކަމުގައި ހުސެން އަހުމަދު ދީދީގެ މަސައްކަތަކީ މުއިއްޒަށް އިގްރޯނެޓް ފުނޑާލަ ދިނުމެވެ. އެގްރޯ އެމްޑީ ހުސެންދީ އަކީ ރައީސް ޔާމީނުގެވެރި ކަމުގައި އެފްއެސްއެމްގެ ޖެނެރަލް މެނޭޖަރ ކަމުގައި ހުރެގެން ވަގަށް 42 މިލިޔަން ރުފިޔާގެ ތެޔޮ ވިއްކި މައްސަލައިގައި މަގާމުން ވަކިކޮށްފައިވާ މީހެކެވެ. އަނެއްކޮޅުން އޭނާއަށް އެހީތެރިވެދޭ އެގްރޯގެ އެޗްއާރު މެނޭޖަރ އައިޝަތު ޝަޒްލީނާއަކީ މިހާރު ފެންމަތިވެގެން އުޅޭ އެޗްޑީސީ ބޮޑުވައްކަމުގައި ގޯއްޗަކާއި ވިނަރެސް ފްލެޓެއް ވަގަށް ނަގައިގެން އުޅޭކަމަށް މަޝްހޫރުވެފައިވާ އަންހެނެކެވެ. ދެންހުރީ އެގްރޯނެޓްގެ ފައިސާއިން "ފިރިހެން ފަޅޯ ދަޑެއް" ހެއްދި ކަމަށް މަޝްހޫރު ވެފައިވާ އެސިސްޓެންޓް ޖެނެރަލް މެނޭޖަރ ފާރޫގެވެ.
މުއިއްޒަށް ކުންފުނިތަކުގެ ވެރިންގެ ގޮތުގައި ރަތްލާޖެހި ވަގުން ނޫނީ އެއްގޮތަކަށްވެސް ކަމުނުދަނީ ތާއެވެއެވެ. ފަޒުލެއް ހީނާއެއް ނަމްޒާއެއް ވަޖީހެއް ކިޔާނެކަމެއް ނެތްތާއެވެ.