ހުޅުމާލޭ ސެންޓްރަލް ޕާކާ ދިމާ ހުޅަނގު ފަރާތުން އޮންނަ ބިން ސާފުކޮށް، އެ ތަނުގައި އިށީނދެ ތިބެވޭނެހެން ބެންޗު ބެހެއްޓުމުގެ މަސައްކަތް އެޗްޑީސީން ފަށައިފި އެވެ.
ވީ ކިހިނެއް؟ - ސެންޓްރަލް ޕާކާއި ފެރީ ޓާމިނަލާ ދެމެދު އޮންނަ ބިމަކީ ގަސް ބޯ، ވާ ހެދިފައި އޮތް ތަނެކެވެ. އެ ތަނުގައި ހެދިފައި އޮތް ވިނަތައް ނޮޅައި ސާފުކުރުމުގެ މަސައްކަތް އެޗްޑީސީން އަންނަނީ ކުރަމުންނެވެ.
ތަފްސީލް - އެ ކުންފުނިން ބުނީ، ހުޅުމާލޭގައި ދިރިއުޅޭ ފަރާތްތަކަށް ހިތްގައިމު މާހައުލެއް ގާއިމްކޮށްދިނުމަށް ހުޅުމާލޭ ފެރީ ޓާމިނަލާއި ސެންޓްރަލް ޕާކާ ދެމެދުގައި އޮންނަ ސަރަހައްދުގައި އާންމުންނަށް އިށީނދެވޭނެހެން ބެންޗު ޖެހުމަށް އެ ސަރަހައްދު ސާފުކުރުމުގެ މަސައްކަތް ކުރަމުން އަންނަ ކަމަށެވެ.
އެ ސަރަހައްދު ތަރައްގީ ކުރަން ނިންމާފައިވަނީ ސީދާ ކިހިނެއް ކަމެއް އެޗްޑީސީން ނުބުނެ އެވެ.
ފާހަގަ ކުރެވޭ - ހުޅުމާލެ އަކީ ހިތް ފަސޭހަ ތަނަކަށް ހެދުމަށް އެޗްޑީސީން ކުރާ މަސައްކަތުގެ ދަށުން އެ އަވަށުގެ އެކި ސަރަހައްދުތަކުގައި ޕާކުތައް ތަރައްގީކޮށް، ބައެއް ސަރަހައްދުތަކުގައި އިށީނދެ ތިބެވޭނެހެން މިހާރު ވެސް ބެންޗު ބަހައްޓާފައި ހުރެ އެވެ.