ރަށްރަށުގައި ކަރަންޓާއި ފެނުގެ ހިދުމަތްތަކަށް ކަނޑައަޅާފައިވާ ކޮމާޝަލް ރޭޓުތަކުގެ ސަބަބުން ކުދި އަދި މެދު ފަންތީގެ ވިޔަފާރިތަކުން ކަަރަންޓާއި ފެނުގެ ހިދުމަތަށް ކުރަންޖެހޭ ހޭދަ ބޮޑުވާ މައްސަލައިގައި ރައްޔިތުންގެ މަޖިލީހުގެ މެންބަރުން ދެކޭ ގޮތް ސާފުކުރަން މިއަދު ގަރާރެއް ހުށަހަޅައިފި އެވެ.
ހުޅުމާލޭ ދެކުނު ދާއިރާގެ މެންބަރު ޑރ. އަހުމަދު ޝަމްހީދު (އެމްޑީޕީ) ހުށަހެޅުއްވީ ގަރާރުގައި ވަނީ ޔުޓިލިޓީ ކުންފުނިތަކުން މީހުން ދިރިއުޅޭ ރަށްތަކަށް ކަނޑައަޅާފައި ހުރި އަގުތަކުގައި ބޮޑެތި ފަރަގުތަކެއް ހުރިކަން ހާމަވާ ކަމަށެވެ. މީގެ ސަބަބުން އެ ރަށްރަށުގައި ހަރަކާތްތެރިވާ ކުދި އަދި މެދު ފަންތީގެ ވިޔަފާރިތަކުން ފެނާއި ކަރަންޓަށް ކުރާ ހޭދަ އިންތިހާއަށް ބޮޑުވެފައިވާ ކަމަށް މެންބަރު ވިދާޅުވި އެވެ.
ޝަމްހީދުގެ ގަރާރުގައި ފާހަގަކުރި ގޮތުގައި، ޔުޓިލިޓީ ހިދުމަތްތައް ފޮރުކޮށްދިނުމުގައި މާލެ އާއި އަތޮޅުތެރޭގައި ހުރި ފަރަގުތަކަކީ:
އަގުތައް މިހެން ހުރުމާ ގުޅިގެން، ގެސްޓު ހައުސް ފަދަ އިގުތިސޯދަށް މުހިންމު ސިނާއަތުން، ކަރަންޓަށް ކުރަން ޖެހޭ ހޭދަ 40 ޕަސެންޓާއި 70 ޕަސެންޓާއި ދެމެދުގެ އަދަދަކުން އިތުރުވެ، ފެނުގެ ހިދުމަތަށް ކުރަން ޖެހޭ ހަރަދު 35 ޕަސެންޓު އިތުރުވެފައިވާ ކަމަށް ގަރާރުގައި ބަޔާންކޮށްފައިވެ އެވެ.
ޝަމްހީދު ވިދާޅުވި ގޮތުގައި މި އަގުތައް ކަނޑައަޅާފައި ހުރީ ގާނޫނު އަސާސީގައި ބުނާ ތަފާތުނުކުރުމުގެ ހައްގާ ތައާރުޒު ނުވާނެ ގޮތަކަށެވެ. އަދި މިކަމުގެ ސަބަބުން ރަށްފުށާއި މުޅި ދިވެހި އިގުތިސޯދަށް ވެސް މުހިންމު ގެސްޓުހައުސް ވިޔަފާރިތައް ހިންގުމުގެ ހަރަދު ބޮޑުވެ، މި އަގުތައް އެއްހަމަ ކުރުމަށް އެ ގަރާރުގައި ގޮވާލާފައިވެ އެވެ.