ދުނިޔޭގެ މަގުބޫލު ބަތަލާ ޖެނިފާ ވިންގެޓްއާ އެކްޓަރު ކަރަން ވާހީ ކައިވެނިކުރަން އުޅޭ ކަމަށް ބުނެ މީޑިއާތަކުންނާއި ސޯޝަލް މީޑިއާގައި ފަތުރަމުން އަންނަނީ ދޮގު ޚަބަރުތަކެއް ކަމަށް ކަރަން ބުނެފިއެވެ. މަގުބޫލު ޓީވީ ޑްރާމް ސީރީސް "ދިލް މިލް ގަޔޭ"ގައި އެކީގައި މަސައްކަތްކޮށްފައިވާ ދެ ތަރިންގެ މެދުގައި ވަރަށް ގާތް އެކުވެރިކަމެއް އޮންނާތީ ދެ މީހުންގެ މެދުގައި ލޯބީގެ ގުޅުމެއް އޮތްކަމަށް ބުނެ މީޑިއާތަކުގައި އެ ވާހަކަ ދައްކަމުން އަންނަތާ މިހާރު ވަރަށް ގިނަ ދުވަސްތަކެއް ވެއްޖެއެވެ. މި ޚަބަރުތަކާ ގުޅިގެން ދަ އިންޑިއަން އެކްސްޕްރެސްއިން ކަރަންއާ ސުވާލުކުރުމުން އެކްޓަރު ބުނީ އެފަދަ ހަގީގަތެއް ނެތް ވާހަކަތަކެއް އުފެދެނީ ކިހިނެއްކަން އެއްގޮތަކަށް ވެސް ނޭނގޭ ކަމަށެވެ. އަދި އެއީ އެއްވެސް ހަގީގަތެއް ނެތް ވާހަކަތަކެއް ކަމަށާއި އެފަދަ ޚަބަރުތައް ފެތުރުމުގެ ކުރިން އެކަމުގެ ތެދު ދޮގު އޮޅުންފިލުވުމަކީ ވަރަށް މުހިއްމު ކަމެއް ކަމަށް ކަރަން ވަނީ ބުނެފައެވެ. ޖެނިފާގެ ކުރީގެ ފިރިމީހާ އެކްޓަރު ކަރަން ސިންގް ގްރޯވާ-- ފޮޓޯ/ ބޮލީވުޑްހަންގާމާ މީޑިއާތަކުން ކަރަންއާއި ޖެނިފާ ކައިވެނި ކުރާނެ ކަމަށް ބުނެ ފަތުރަމުން އަންނަ ވާހަކަތަކަށް ރައްދުދެމުން އެކްޓަރު ސޯޝަލް މީޑިއާގައި ރޭ ކުރި ޕޯސްޓެއްގައި ބުނެފައި ވަނީ ގިނަ ބަޔަކު ހިލޭ ހޯދައިދެމުން އަންނަ ޕަބްލިކް ރިލޭޝަންސް (ޕީއާރް) ޚިދުމަތަށް ޝުކުރުވެރިވާ ކަމަށެވެ. ހަމައެއާއެކު ދެން އިންސްޓަގްރާމްގައި ކުރި ޕޯސްޓުގައި ބުނެފައި ވަނީ ރަހުމަތްތެރިކަމުގެ ގުޅުމަކީ ލޯތްބަށްވުރެ ވެސް މާ މުހިއްމު އަގު ބޮޑު ގުޅުމެއް ކަމަށެވެ. ޑްރާމާ ސީރީސް "ދިލް މިލްގަޔޭ"އަށްފަހު ކަރަން އާއި ޖެނިފާ 14 އަހަރުފަހުން އެކީގައި ކުޅުނު ސީރީސްއަކީ "ރައިސިންގްހާނީ ވާސަސް ރައިސިންގްހާނީ"އެވެ. ޓެލެވިޜަން ދާއިރާގެ އެންމެ ޑިމާންޑު ބޮޑު ބަތަލާއިންގެ ތެރޭގައި ހިމެނޭ ޖެނިފާ އެންމެ ފުރަތަމަ ކައިވެނިކޮށްފައި ވަނީ އެކްޓަރު ކަރަން ސިންގް ގްރޯވާއާއެވެ. ދެ މީހުންގެ ކައިވެންޏަށް ދެ އަހަރުވީތަނާ އެ ކައިވެނި ރޫޅާލުމަށްފަހު ކަރަން ފަހުން ކައިވެނިކުރީ ބޮލީވުޑްގެ ކުރީގެ ބަތަލާ ބިޕާޝާ ބާސޫއާއެވެ. ކަރަން އާއި ބިޕާޝާގެ މެދުގައި ލޯބީގެ ގުޅުން އުފެދެން ފެށީ ދެ މީހުން އެކީގައި މަސައްކަތްކުރި ފިލްމު "އެލޯން"ގެ ޝޫޓިންގްތެރޭގައެވެ. އެ ކައިވެންޏަށް އަންހެން ކުއްޖަކު ވެސް ވަނީ ލިބިފައެވެ.