އެންމެ ނުރައްކާތެރި އެކުވެރިންނަޚީ ކޮންބައެއްކަން އެނގޭ ހެއްޔެވެ؟ އެންމެ ނުރައްކާތެރި އެކުވެރިންނަކީ ކޮންބައެއް ކަމާއި އެކަމުގެ ސަބަބު ކުރު ގޮތަކަށް ބުނެލާނަމެވެ. 
އެންމެ ނުރައްކާތެރި އެކުވެރިންނަކީ އެކުވެރިންގެ ތެރޭގައި ހިމެނޭ މީހުންގެ ތެރެއިން ތިބާ ކުރަންޖެހޭ އަޅުކަން ކުރުމަށް ހުރަސްއަޅާ މީހުންނެވެ. އެމީހުން އެކަން ކުރާނީ ވަރަށް ހީލަތްތެރި ގޮތަކަށެވެ. 
މިޘާލަކަށް އެމީހުން ތިބާ ގާތުގަ ނަމާދުނުކުރާކަށް ނުބުނާނެއެވެ. ނަމާދުވަޤުތު ކައިރިވެފަ ހުއްޓާ ބައްދަލުކުރަން އަންނާނީއެވެ. ނުވަތަ ފޯނުކުރާނީއެވެ. ނުވަތަ އެނޫންވެސް އެފަދަ ކަމެއްކޮށް ނަމާދުކުރަން ހުރަސްއަޅާނީއެވެ. ނަމާދުކުރަން އެންމެ މަތިވެރިވެގެންވާ ވަޤުތު ގެއްލުވައިލާނީއެވެ. ނަމާދަށް އަވަސްވެގަތްކަމުގެ ޘަވާބު ލިބުމުން ތިބާ މަޙްރޫމްކުރުވާނީއެވެ. 
މިކަންކަމަށް ބަލައިފިނަމަ މިއީ އަނެކާއަށް ދެވޭނެ އެންމެ ބޮޑު އެއްދެރައެވެ. އާޚިރަތް ލިބިގަތުމަށް ކުރަމުންދާ މަސައްކަތަށް ލިބޭނެ ބޮޑު އުނިކަމަކަށްވާތީއެވެ. ވީމާ އެންމެ ބޮޑަށް ސަމާލުކަންދޭންޖެހޭނެ އެއްބައަކީ މިބުނި ފަދަ ގޮތަކުން ނުވަތަ އެނޫންވެސް ގޮތަކުން ތިބާކުރަންޖެހޭ އަޅުކަންކުރަން ހުރަސްއަޅާ މީހުންނެވެ. 
މިޙާލަތުން ސަލާމަތްވާން އެދޭމީހާ މިބުނިފަދަ ވަޤުތުތަކުގައި މީހުންނާ ބައްދަލުނުކުރާށެވެ! ފޯނުކުރިޔަސް ފޯނު ނުނަގާށެވެ! އޮޅުމަކުން ނެގުނު ނަމަވެސް ނަމާދު ވަޤުތު ޖެހިއްޖެކަމަށާއި ފަހުން ގުޅާލަން ނުވަތަ ފަހުން ގުޅައިލާނެކަމަށް ބުނެފައި ފޯނުބާއްވާށެވެ! އެއިރުން އޭނާއަށް ނަމާދުކުރަން ހަނދާންކޮށްދިން ކަމުގެ ޘަވާބުވެސް ދެއްވަވާނެތެވެ. އިން ޝާ ﷲ 
ހަމައެފަދައިން މީހަކާއި ބައްދަލުކުރަން އިންދާ ނަމާދު ވަޤުތު ޖެހިއްޖެނަމަ (ވަޤުތު ކައިރިވުމުން) ބައްދަލުވުން އަވަހަށް ނިންމައިލާށެވެ! އެފަދަ ވަޤުތުގައި ނަމާދު ވަޤުތު ގާތްވެއްޖެކަމަށް ބުނުމަކީ ތިބާ ނަމާދުކުރާ ވާހަކަ ބުނުން ކަމަކަސް އަހުރެން ނުދެކެމެވެ. ހެޔޮ ނިޔަތުގައި އެގޮތަށް ބުނުން ވާނީ އަނެކާއަށްވެސް ނަމާދުކުރަން ހަނދާންކޮށްދިނުމަށެވެ. މިއީ އަހުރެން ޤަބޫލުކުރާ ގޮތެވެ. މޮޅަށް ދެނެވޮޑިގެންވަނީ ﷲ ތަޢާލާއެވެ. 
- އިސްލާމީ ތިލަފަތުގެ ދަރުސަކުން