ގެވެށި އަނިޔާ ހުއްޓުވުމަށްޓަކައި ގުޅިގެން މަސައްކަތްތަކެއް ކުރުމަށް ފެމިލީ
ޕްރޮޓެކްޝަން އޭޖެންސީ (އެފްޕީއޭ) އަދި ސޮސައިޓީ ފޮރ ހެލްތް އެޑިޔުކޭޝަން (ޝީ) އާ
ދެމެދު އެއްބަސްވުމެއްގައި މިއަދު ސޮއިކޮށްފިއެވެ.
މި އެއްބަސްވުމުގައި އެފްޕީއޭގެ ފަރާތުން ސޮއި ކުރެއްވީ ޗީފް އެގްޒެކެޓިވް
އޮފިސަރ އާމިނަތު ޝިރާނީ ނަޢީމެވެ. އަދި ޝީގެ ފަރާތުން ބޯޑުގެ ވައިސް ޗެއަރޕަރސަން
އާއިޝަތު ނޫރާ މުޙައްމަދެވެ.
އެފްޕީއޭއާއި ޝީ ދެމެދު މި ވެވުނު އެއްބަސްވުމުގެ ދަށުން، ކައުންސިލިންގެ
ހިދުމަތާއި "ސައިކޯ ސޯޝަލް ސަޕޯޓް" ފޯރުކޮށްދޭނެ ކަމަށް
ވިދާޅުވެފައިވެއެވެ. ޕޭރަންޓިންގް ސެޝަންތައް ކުރިޔަށް ގެންދިޔުމާއި އާއިލާތަކަށް
ރައްކާތެރި މާހައުލެއް ގާއިމްކުރުމަށް ކުރާ މަސައްކަތްތައް އިތުރަށް ހަރުދަނާ
ކުރަމުންގެންދާކަން ވެސް ފާހަގަކޮށްފައިވެއެވެ.
މި އެއްބަސްވުމަކީ ހަމަނުޖެހުންތައް ހުއްޓުވުމަށާއި، ދުޅަހެޔޮ ހަރުދަނާ މުޖުތަމަޢުއެއް
ބިނާކުރުމަށް އެޅުނު މުހިންމު ފިޔަވަޅެކެވެ. އެންމެން ގުޅިގެން ސަލާމަތާއި ރައްކާތެރިކަމުގެ
މައްޗަށް ބިނާވެފައިވާ މުސްތަޤްބަލެއް ބިނާކުރަމުންދާ ކަމަށް ވެސް އެފްޕީއޭއިން ބުނެފައިވެއެވެ.