ޙައްޖުގެ މަތިވެރި އަޅުކަން ނިންމުމަށް ފަހު އެނބުރި ރާއްޖެ އަންނަ ޙައްޖުވެރިންނަށް ޚާއްސަކޮށްގެން ހުޅުމާލޭ ހޮސްޕިޓަލުގައި ހުޅުވި ފްލޫ ކްލިނިކަށް މިހާތަނަށް 84 ޙައްޖުވެރިޔަކު ޑޮކްޓަރަށް ދައްކާފައިވާ ކަމަށް އެ ހޮސްޕިޓަލުން ބުނެފިއެވެ. ހުޅުމާލޭ ހޮސްޕިޓަލުގެ މީޑިއާ އޮފިޝަލް "ސަން"އަށް ވިދާޅުވީ، މިދިޔަ ހޮނިހިރު ދުވަހު ހުޅުވި މި ކްލިނިކަށް މިއަދުގެ މިހާތަނަށް 84 މީހަކު ރޯގާޖެހިގެން ދައްކާފައިވާ ކަމަށެވެ. އަދި, އާންމު ގޮތެއްގައި ޙައްޖުވެރިން އަންނަ ފްލައިޓްތައް ޖައްސާ ދުވަސްތަކުގައި ކްލިނިކަށް ބާރުބޮޑުވި ނަމަވެސް، އެހެން ދުވަސްތަކުގައި ޑޮކްޓަރަށް ދައްކަން އަންނަ މީހުންގެ އަދަދު މަދުކަން އޮފިޝަލް ފާހަގަކުރެއްވިއެވެ. ހޮސްޕިޓަލުން ވަނީ ކްލިނިކަށް ޒިޔާރަތްކުރާ ހުރިހާ ޙައްޖުވެރިން ވެސް މާސްކު އެޅުމަށާއި، އެހެން މީހުންނަށް ބަލި ނުފެތުރޭނެ ގޮތަށް ރައްކާތެރިކަމުގެ ފިޔަވަޅުތައް އަޅަން އިލްތިމާސްކޮށްފައެވެ. ޙައްޖުވެރިންނަށް ޚާއްސަ މި ފްލޫ ކްލިނިކް ހުޅުވާފައި ހުންނަނީ ހުކުރު ދުވަސް ފިޔަވައި ކޮންމެ ދުވަހެއްގެ މެންދުރު 2:00 އިން ރޭގަނޑު 10:00 އަށެވެ. https://sun.mv/222839 ޙައްޖުގެ މަތިވެރި އަޅުކަމަށް ފަހު ޙައްޖާޖީން އެނބުރި ރާއްޖެ އަންނަން ފަށާފައިވާއިރު، އެ މީހުން ބަލިވެގެން ޑޮކްޓަރަށް ދެއްކޭނޭ އިންތިޒާމު ހޮސްޕިޓަލްތަކުގެ ޖެނެރަލް އޯޕީޑީ މެދުވެރިކޮށް ހަމަޖައްސާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން މީގެ ކުރިން ވަނީ ބުނެފިއެވެ. އެޗްޕީއޭއިން ބުނެފައިވާ ގޮތުގައި ޙައްޖުން އެނބުރި އަންނަތާ 14 ދުވަސް ތެރޭގައި ހުން އައުން، ކެއްސުން ނުވަތަ ނޭވާލާން އުނދަގޫވުން ފަދަ އަލާމާތެއް ފެނިއްޖެނަމަ ލަސްނުކޮށް ޑޮކްޓަރެއްގެ މަޝްވަރާ ހޯދަންވާނެއެވެ. މީގެ އިތުރުން، ރޯގާގެ އަލާމާތްތައް ހުރިނަމަ މީހުން އެއްވެ އުޅޭ ތަންތަނަށް ނުދިއުމަށާއި، ގިނަގިނައިން އަތް ދޮވުމަށް އެޗްޕީއޭއިން އިރުޝާދުދެއެވެ. ހުން ގަދަނަމަ ޕެރެސެޓްމޯލް ފިޔަވައި އެހެން ބޭހެއް ޑޮކްޓަރެއްގެ މަޝްވަރާއާ ނުލައި ބޭނުން ނުކުރުމަށްވެސް ވަނީ ހަނދާންކޮށްދީފައެވެ. އިތުރު މައުލޫމާތު ސާފުކުރުމަށް ހޮސްޕިޓަލުގެ ހޮޓްލައިން 1417 އަށް ގުޅުމަށް ހުޅުމާލޭ ހޮސްޕިޓަލުން އެދެއެވެ.