ރާއްޖޭގެ ވެރިކަން ކުރައްވާފައިވާ ކުރީގެ ރައީސުންނަށް ދެމުން އަންނަ އޮފީސް ހިންގުމުގެ ޚަރަދުގެ ފައިސާ ކަނޑާލުމަށާއި ދައުރު ފުރިހަމަކުރައްވާ ނައިބު ރައީސުންނަށް ޚާއްޞަ އެލަވަންސެއް ދިނުމަށް ރައްޔިތުންގެ މަޖިލީހަށް މިއަދު ހުށަހަޅައިފިއެވެ. 
މި އިޞްލާޙްތައް މަޖިލީހަށް ހުށަހެޅުއްވީ، ރައީސްކަން ކުރައްވާފައިވާ ބޭފުޅުންނަށް ދޭން ޖެހޭ ރައްކާތެރިކަމާއި އިނާޔަތްތަކާ ބެހޭ ޤާނޫނަށް، ސަރުކާރުގެ ފަރާތުން ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު އަދި ހުޅުދޫ ދާއިރާގެ މެންބަރު މުހައްމަދު ޝާހިދު އެވެ. މެންބަރު ޝާހިދު ހުށަހެޅުއްވީ ކުރީގެ ރައީސުންނަށް ދޭ ޚާއްޞަ އިނާޔަތްތަކުގެ ތެރެއިން އޮފީސް ހިންގުމުގެ ޚަރަދަށް ދޭ 175،000 ރުފިޔާ އުނިކުރުމަށެވެ.
ޤާނޫނު މިހާރު އޮންނަ ގޮތުން އެއް ދައުރު އަދާކުރައްވާ ކުރީގެ ރައީސުންނަށް ޖުމްލަ 275،000 ރުފިޔާ ލިބެއެވެ. މީގެ ތެރޭގައި މާލީ އިނާޔަތުގެ ގޮތުގައި 50،000 ރުފިޔާ އާއި ދިރިއުޅޭނެ ތަނުގެ ޚަރަދުގެ ގޮތުގައި 50،000 ރުފިޔާ އަދި އޮފީސް ހިންގުމުގެ ޚަރަދުގެ 175،000 ރުފިޔާ ހިމެނެއެވެ. މި އިޞްލާޙް ފާސްވެއްޖެނަމަ، ކުރީގެ ރައީސުންނަށް ލިބޭ ޖުމްލަ އަދަދު ބޮޑުތަނުން ކުޑަވެގެންދާނެއެވެ.
ކުރީގެ ރައީސުންގެ އޮފީސް ޚަރަދު ކަނޑާލުމުގެ އިތުރުން، ފަސް އަހަރުގެ ދައުރު ފުރިހަމަކުރައްވާފައިވާ ނައިބު ރައީސުންނަށް ޚާއްޞަ އެލަވަންސެއް ދިނުމަށް ވެސް ވަނީ ހުށަހަޅާފައެވެ. މިހާރުގެ ޤާނޫނުގައި ނައިބު ރައީސުންނަށް އިނާޔަތް ދިނުމުގެ ގޮތެއް ނޯވެއެވެ. ހުށަހެޅި އިޞްލާޙުގައިވާ ގޮތުން، ދައުރު ފުރިހަމަކުރައްވާ ނައިބު ރައީސުންނަށް މަހަކު 25،000 ރުފިޔާ ދިނުމަށް ވަނީ ހިމަނާފައެވެ. މީގެ އިތުރުން، ނައިބު ރައީސުންނަށް ރާއްޖެއިންނާއި ރާއްޖެއިން ބޭރުން ދައުލަތުގެ ޚަރަދުގައި ޞިއްޙީ ޚިދުމަތް ދިނުން ވެސް މި އިޞްލާޙުގައި ހިމެނެއެވެ.
މި އިޞްލާޙްތަކުގެ ސަބަބުން ކުރީގެ ރައީސުންނަށް ދެމުން އަންނަ އިނާޔަތްތަކަށް ބަދަލު އަންނައިރު، ނައިބު ރައީސުންގެ މަޤާމުގެ އަގު ވަޒަންކުރުމުގެ ގޮތުން އިނާޔަތްތަކެއް ޤާނޫނުގައި ހިމެނިގެން ދާނެއެވެ. މި އިޞްލާޙްތައް މިހާރު ވަނީ މަޖިލީހުގެ ކަމާބެހޭ ކޮމިޓީއަށް ފޮނުވުމަށް ނިންމާފައެވެ.