ހުޅުމާލެ ފުރަތަމަ ފިޔަވަހީގައި ތޫނު އެއްޗަކުން މީހަކަށް ހަމަލާ ދޭން އުޅުނު މިހާކު ހައްޔަރުކޮށްފިއެވެ.
ފުލުހުން ބުނީ މި މައްސަލައިގައި 33 އަހަރުގެ ދިވެހި ފިރިހެނަކު ހައްޔަރުކޮށްފައި ވަނީ މިރޭ 6:33 ހާއިރު ކަމަށެވެ. ހުޅުމާލޭގައި މީހަކަށް ތޫނު އެއްޗަކުން ހަމަލާ ދޭން އުޅުނު މީހާ ހުއްޓުވަން އުޅުނު ފުލުހަކަށް ވެސް އެ މީހާ ހަމަލާ ދޭން މަސައްކަތް ކޮށްފައިވާ ކަމަށް ފުލުހުން ބުނެއެވެ.
އެމީހާ ހައްޔަރުކޮށް ފުލުހުންގެ ބެލުމުގެ ދަށަށް ގެންދިއުމަށް މަސައްކަތް ކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދައުރުވަމުން އަންނަ އިރު އެ ވީޑިއޯއިން ފެންނަނީ އެމީހާގެ ދެއަތް ފަހަތަށް ލާ ބިޑި އަޅުވާފައިވާ ތަނެވެ. އަދި ބިޑި އަޅުވާފައި ހުރި އެމީހާގެ ދެފަރާތުގައި ދެ ފުލުހުން އޭނާ ހިފަހައްޓައިގެން ވެހިކަލް އަށް އަރުވަން ތައްޔާރުވާ ތަން ފެނެއެވެ. އެވަގުތު އެމީހާ އޭނާ އަކީ ސިކުނޑި ހަމަނުޖެހޭ މީހެއް ކަމަށް ބުނާ އަޑު އިވެއެވެ.
އެމީހާ ހައްޔަރު ކުރި ސަރަހައްދުގައި ގިނަ އަދަދެއްގެ އާންމުން އެއްވެފައި ތިއްބެވެ. މި ހާދިސާގައި އެއްވެސް މީހަކަށް އަނިޔާވެފައިވާ ކަން އަދި ސާފެއް ނުވެއެވެ. ފުލުހުން ބުނީ މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ.