އިލެކްޝަންސް ކޮމިޝަނަށް ފޮނުވާ ޕާޓީތަކުގެ މެމްބަރޝިޕް ފޯމުތައް ސައްޙަ ނޫންކަމަށްބުނެ އަނބުރާ ފޮނުވާލާތީ ޕީޕީއެމްއިން ކަންބޮޑުވުން ފާޅުކޮށްފިއެވެ.
ޕީޕީއެމް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި، އެޕާޓީގެ ސްޕޯކްސްޕާސަން އަހްމަދު މަހްލޫފު ވިދާޅުވީ، މިހާތަނަށް އެޕާޓީން ހުށަހަޅާފައިވާ ފޯމްތަކުގެ ތެރެއިން ގާތްގަނޑަކަށް އަށްހާސް ފޯމް ސައްހަ ނޫންކަމަށް އިލެކްޝަންސް ކޮމިޝަނުން ނިންމާފައިވާ ކަމަށެވެ.
މަހްލޫފް ވިދާޅުވީ މައްސަލައަކީ ފޯމުތައް ސައްޙަނުވެގެން ފޮނުވާލުން ނޫންކަމަށާ، އެފޯމުތައް ސައްޙަނުވަނީ ކީއްވެގެންކަން އެނގެން ނެތުން ކަމުގައެވެ. އެގޮތުން ފޯމުތައް ސައްޙަ ނުވާކަމަށްބުނެ އިލެކްޝަންސް ކޮމިޝަނުން މައިގަނޑު ގޮތެއްގައި ފާހަގަކުރާ ކަމަކީ ފޯމުގައި ޖަހާފައި ހުންނަ އިނގިލީގެ ނިޝާން ކަމުނުދިއުން ކަމަށް ބުނާއިރު، އިނގިލީގެ ނިޝާން ޗެކްކުރާނެ މެޝިނެއްވެސް އެކޮމިޝަނުގައި ނުހުންނަކަމަށް މަހްލޫފް ވިދާޅުވިއެވެ.
މަހްލޫފް ވިދާޅުވީ، މިގޮތަށް ފޮނުވާލާ ފޯމުތަކުގެ ތެރޭގައި ގިނަޢަދަދެއްގެ ސައްހަ ފޯމުތައް ހުންނަކަމަށް އެޕާޓީން ޤަބޫލުކުރާ ކަމަށާ، އިލެކްޝަންސް ކޮމިޝަނުން ޕާޓީތަކުގެ މެދުގައި ތަފާތުކުރުން ގެންގުޅޭ ކަމަށް ތުހުމަތުކުރެވޭ ކަމަށެވެ. މިމައްސަލައިގައި މިހާރު އިލެކްޝަންސް ކޮމިޝަނަށް ޕީޕީއެމްއިން ސިޓީވެސް ފޮނުވާފައި ވާނެކަމަށް މަހްލޫފް ވިދާޅުވިއެވެ.
އިލެކްޝަންސް ކޮމިޝަންގެ އެންމެފަހުގެ ހިސާބުތައް ދައްކާގޮތުން ޕީޕީއެމްގެ މެމްބަރުންގެ އަދަދަކީ ސަތާރަހާސް ފައްސަތޭކައެވެ.
ޕީޕީއެމްއިން މިމައްސަލަ ފެންމަތިކޮށްފައިވާއިރު، ފަހަކަށްއައިސް އެންމެ ގިނަ ޢަދަދަކަށް މެމްބަރުން އިތުރުވަމުންދާ ޖުމްހޫރީ ޕާޓީއަށްވެސް ވަނީ މިމައްސަލަ ކުރިމަތިވެފައިކަމަށް އެޕާޓީން މީގެކުރިން ބުނެފައިވެއެވެ.