ދިވެހިރާއްޖެ އިސްލާމިކް ފައިނޭންސްގެ ހަބަކަށް ހެދުމަށް ސަރުކާރުން މަސައްކަތްކުރަމުންދާ ކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.
ޕީއެސްއެމް ނިއުސްއިން ގެނެސްދޭ "ހަފްތާ 52" އަށް ދެއްވި ޚާއްސަ އިންޓަވިއުއެއްގައި މާލީ ވަޒީރު ވިދާޅުވި ގޮތުގައި މި މަޤްޞަދު ހާސިލުކުރުމަށްޓަކައި މާލީ ވުޒާރާގައި ޚާއްޞަ ޑިޕާޓްމަންޓެއް ވަނީ ޤާއިމްކޮށްފައެވެ. މީގެ އިތުރުން، އިސްލާމިކް ފައިނޭންސްގެ ކަންކަން ޝަރުޢީ ހަމަތަކާ އެއްގޮތަށް ކުރިއަށް ގެންދިއުމަށްޓަކައި ޝަރީޢާ އެޑްވައިޒަރީ ކޮމެޓީއެއްވެސް ވަނީ އުފައްދާފައެވެ.
ވަޒީރު އިތުރަށް ވިދާޅުވި ގޮތުގައި އިސްލާމިކް ޓްރެޜަރީ ބިލްތަކުގެ ވަސީލަތްތައް ފުޅާކުރުމުގެ މަސައްކަތް ދަނީ ކުރަމުންނެވެ. އަދި ސަރުކާރުގެ ފުރަތަމަ ސުކޫކު އިޝޫކުރުމަށް ތައްޔާރުވަމުންދާ ކަމަށްވެސް އެމަނިކުފާނު ވިދާޅުވިއެވެ.
މި މަސައްކަތުގެ ތެރޭގައި އާންމު ރައްޔިތުން އިސްލާމިކް ފައިނޭންސާ ގުޅޭގޮތުން ހޭލުންތެރިކުރުވުމަށް ޚާއްޞަ ސަމާލުކަމެއް ދެމުންދާ ކަމަށްވެސް މާލީ ވަޒީރު ފާހަގަކުރެއްވިއެވެ.
މި މަސައްކަތްތަކަކީ ރާއްޖޭގެ އިޤްތިޞާދު ހަރުދަނާކޮށް، އިސްލާމީ ޝަރީޢާއާ އެއްގޮތަށް މާލީ ޚިދުމަތްތައް ފޯރުކޮށްދިނުމަށް އަޅާ މުހިންމު ފިޔަވަޅުތަކެއް ކަމަށް ވަޒީރު ވިދާޅުވިއެވެ. މިކަމުގެ ސަބަބުން ރާއްޖެއަށް ބޭރުގެ އިންވެސްޓްމަންޓްތައް އިތުރުވެ، އިޤްތިޞާދީ ދުވެލި އިތުރުވާނެ ކަމަށް އުންމީދުކުރެވޭ ކަމަށްވެސް އެމަނިކުފާނު ވިދާޅުވިއެވެ.