ލޮބުވެތިއަޚުންނާއި އުޚުތުންނޭވެ! ކޮންމެ ފަދަ ޙާލަތެއްގައި އޮވެގެން ކޮންމެ ވަގުތަކު އެދި ދެންނެވި ނަމަވެސް ﷲ ތަޢާލާ އިރާދަކުރައްވަވައިފި އަޅެއްގެ ފާފަ ފުއްސަވައިދެއްވަވާނެތެވެ! ނަމަވެސް ޣަރްޣަރާގެ ވަޤުތު ޖެހުމުން އެފުރުޞަތު ގެއްލޭނެއެވެ.
"ޣަރްޣަރާ"ގެ ވަގުތު އެއީ ކޮން ވަގުތެއްކަން އެނގޭހެއްޔެވެ؟ އެއީ މަރުގެ ސަކަރާތާއި ކުރިމަތިލާންޖެހޭ ވަގުތެވެ. އެ ވަގުތުގެ ކުރިން މީހަކު އިޚްލާޞްތެރިކަމާއިއެކު ތައުބާވެއްޖެ ނަމަ އެމީހާގެ ތައުބާ ޤަބޫލުފުޅު ކުރައްވަވައި އެމީހާގެ ފާފަތައް ﷲ ތަޢާލާ ފުއްސަވައިދެއްވަވާނެތެވެ! އެހެންކަމާއިއެކުވެސް ވިސްނައިލުން މުހިންމު ބައެއް ކަންކަން ފާހަގަކޮށްލާނަމެވެ. 
ބައެއް މީހުން ތިމާ މަރުވުމުން ދާނީ ސުވަރުގެއަށް ނުވަތަ ނަރަކައަށް ކަމާއިމެދު ވިސްނައި ނަރަކައިން ސަލާމަތްވާން މަސައްކަތް ފަށަނީ މަރުބަލި ފަދަ ބޮޑު މުޞީބާތެއް ޖެހުމުންނެވެ. ކެންސަރު ފަދަ އެ ބައްޔަކުން އަރައި ނުގަނެވިދާނެ ބޮޑު ބައްޔެއް ޖެހުމުންނެވެ. އެހިސާބުން ތަސްބީޙްފަތި އަތަށް ނަގައެވެ. ވީހައި ގިނަ ހެޔޮ ޢަމަލުކުރަން ބޭނުންވެއެވެ.  
ސަލާމަތްކަން ލިބުން އޮތީ ހެޔޮ ޢަމަލުތައް ކުރެވުނު ވަރަކުންނެވެ. ނަމާދުކޮށް ހެޔޮ އަމަލުތައް ކޮށް އުޅުނު ނަމަވެސް އެމީހާއަށް ކުރެވިފައިވާ ފާފަތައް ގިނަވެއްޖެ ނަމަ، މީސްތަކުންގެ ޙައްޤުތަކަށް އަރައިގަނެވިފައިވާވަރު ގިނަވެ ބަދަލުދޭންޖެހިއްޖެ ނަމަ އެކަންކަމުގެ ސަބަބުން ﷲ ތަޢާލާ ކަނޑައަޅުއްވަވާ މުއްދަތަކަށް ނަރަކައަށް ވަންނަން ޖެހޭނެކަން އެނގެން އޮތްއިރު ތައުބާވާން އެންމެ ފަހުވަގުތަށް މަޑުކުރާ މީހާއަށް ކުރިމަތިވެދާނެ ޙާލަތަށް ވިސްނާށެވެ! 
ﷲ ތަޢާލާ ފާފަތައް ފުއްސަވައި ދެއްވަވައި ސުވަރުގެ ވައްދަވަން އިރާދަކުރައްވަވާ އަޅަކު ސުވަރުގެ ވައްދަވާނެތެވެ. އެއީ ހަމަ ޔަޤީންކަމެކެވެ. ނަމަވެސް ތިމާ ތައުބާވާނީ "ޣަރުޣަރާ"ގެ ވަގުތުގައިކަމަށް ބަލައި ދުނިޔޭގައި ހިތަށް އެރިހައި ކަމެއް ކުރަމުން ހިތަށް އެރިހައި ގޮތަކަށް އުޅެން ހަމަ ހެޔޮނުވާނެއެވެ! ދުނިޔޭގައި އުޅެން ﷲ ތަޢާލާ ދެއްވަވާ މަދު ދުވަސްކޮޅުގެ ބޭނުން އެންމެ ރަނގަޅު ގޮތުގައި ނުހިފައިފިނަމަ އެންމެ ފަހުވަގުތު ތައުބާވުމުގެ ފުރުޞަތު ލިބޭނެކަން އެނގެނީ ކާކަށް ހެއްޔެވެ؟ ތިމާގެ ފާފަތައް ﷲ ތަޢާލާ ފުއްސަވައި ދެއްވާނެކަން ޔަޤީންކޮށްގެން އެ ޔަޤީންކަމުގައި ފާފަކުރަމުން ގެންދިއުމަކީ ކޮންފަދަ ބޮޑު ނުރައްކާތެރިކަމެއް ހެއްޔެވެ؟ 
ވީމާ މަރުބަލި ޖެހުމުން ހެޔޮއަމަލުކުރަން ފަށާ މީހަކަށް ނުވާށެވެ! ގިނަގިނައިން ތައުބާވެ ހެޔޮ ޢަމަލުތައް ކުރަމުން ގެންދާ މީހަކަށްވާށެވެ! ފިރުއަޢުނުވެސް އެންމެފަހުވަގުތު ތައުބާވެ ޝަހާދަތްކިޔަން މަސައްކަތްކުރިއެވެ. ނަމަވެސް އެފުރުޞަތު ﷲ ތަޢާލާވަނީ އޭނާއަށް ނުދެއްވަވައިފައެވެ. އަދި އެކަމުގެ ވާހަކަތައް ކީރިތި ޤުރްއާނުގައި ބަޔާންކުރައްވަވާފައި އެވަނީ އެކަމާއިމެދު ވިސްނައި ޢަމަލުކުރުމަށެވެ! 
ވިސްނަންވީ ޤިޔާމަތް ދުވަހު ކޮންމެ މީހެއްގެވެސް ހިސާބު ބެއްލެވޭނެ ކަމެވެ. ކުރެވިފައިވާ ޢަމަލުތައް މީޒާނުގައި ކިރޭނެ ކަމެވެ. މީސްތަކުންގެ ޙައްޤުތައް އަދާކުރަންޖެހޭނެ ކަމެވެ. 
ދުޢާއަކީ އަހަރެމެން އެންމެގެ ﷲާފަތައް ފުއްސަވައި ދެއްވަވައި ސުވަރުގެ ވައްދަވައިދެއްވެވުމެވެ! އާމީން 
- މުފްތީ މެންކުގެ ދަރުސަކުން