މީޑިއާ ރެގިއުލޭޓްކުރުމުގެ ނަމުގައި ސަރުކާރުގެ ބާރު އޮންނަ ކޮމިޝަނަކުން މީޑިއާތަކަށް ހަރުކަށި ފިޔަވަޅު އެޅޭ ގޮތަށް ރައްޔިތުންގެ މަޖިލީހަށް ހުށަހެޅި ބިލު ބޭރުކޮށްލުމުގެ ސްޓޭންޑް ހިފަހައްޓައި ބިލު ދިރާސާކުރާ ކޮމިޓީގައި ވެސް މޯލްޑިވްސް މީޑިއާ ކައުންސިލްގެ މެންބަރުން ބިލު ބޭރުކޮށްލުމަށް މިއަދު ގޮވާލައިފި އެވެ.ޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރު ހުށަހަޅުއްވާފައިވާ ބިލާ މެދު ނޫސްވެރިންނާއި މީޑިއާ ކައުންސިލާއި ޖާނަލިސްޓްސް އެސޯސިއޭޝަން އަދި ބޭރުގެ ގިނަ ޖަމިއްޔާތަކަކުން ކަންބޮޑުވުން ފާޅުކޮށްފައިވާ ވަނިކޮށް، އެ ބިލް މަޖިލީހުން ވަނީ ބަލައިގެންފަ އެވެ.ދައުރުން ބޭރު ޖަލްސާއެއް ބޭއްވުމަށް ފަހު މަޖިލީހުން ބިލު ބަލައިގަނެ، ކޮމިޓީ މަރުހަލާގެ މަސައްކަތް ވެސް ވަނީ ފަށައިފަ އެވެ. އެގޮތުން މިއަދު ވަނީ މަޖިލީހުގެ މިނިވަން މުއައްސަސާތަކުގެ ކޮމިޓީއަށް މޯލްޑިވްސް މީޑިއާ ކައުންސިލް ހާޒިރުކޮށްފަ އެވެ.ކޮމިޓީގައި ވާހަކަ ދައްކަވަމުން އެމްއެމްސީގެ ރައީސް ހުސެއިން ސަގީފު ވިދާޅުވީ މީޑިއާ ބިލް އޮތީ އެކަށީގެންވާ ދިރާސާއެއް ކުރުމެއް ނެތި ކަމަށާއި އަދި ޑްރާފްޓް ކުރުމުގެ މަރުހަލާގައި ކަމާ ގުޅޭ އެއްވެސް ފަރާތަކާ މަޝްވަރާކޮށް ހިޔާލު ހޯދާފައި ނެތުމަކީ ކަންބޮޑުވާ ކަމެއް ކަމަށެވެ. އެ ބިލް އޮތީ މީޑިއާ ރެގިއުލޭޓް ކުރަން މިހާރު ކައުންސިލަށް ދިމާވާ ގޮންޖެހުންތަކާއި ކަންބޮޑުވުންތަކަށް ހައްލެއް ލިބޭ ގޮތަށް ވެސް ނޫން ކަމަށާއި އެކަންކަން ބިލް ޑްރާފްޓްކުރިއިރު ސާފުކޮށްފައި ވެސް ނެތް ކަމަށް އޭނާ ވިދާޅުވި އެވެ."ދެން ބިލު އެކުލަވާލުމުގައި ބިލު އަމާޒުވާ ނޫސްވެރިންނާއި މި އިދާރާގެ އެހެން ސްޓޭކްހޯލްޑަރުންގެ ބަހެއް ނެތްކަން އަޅުގަނޑުމެން ހިތާމައާ އެކު ފާހަގަކުރަން، އަދި ހަމަ އެކަމަކީ ނުހަނު ކަންބޮޑުވާ ކަމެއް ކަމަށް އަޅުގަނޑުމެން ފާހަގަކުރިން،" ސަގީފު ވިދާޅުވި އެވެ.ބިލާ ގުޅޭގޮތުން ސަގީފު އިތުރަށް ވިދާޅުވީ، ބޭރުގެ ކަމާގުޅުންހުރި ޖަމިއްޔާ ޖަމާއަތްތަކުން ލަފާދިނީ ބިލު އަނބުރާ ގެންގޮސް، ނޫސްވެރިންނާއި ކަމާގުޅުންހުރި އެންމެހާ ފަރާތްތަކާ މަޝްވަރާކުރުމަށް ފަހު ފުރިހަމަ ބިލެއް އަލުން ހުށަހެޅުމަށް ކަމަށެވެ.މި ކޮމިޓީގެ ބައްދަލުވުމުގައި ނޫސްވެރިން ތަމްސީލުކުރައްވާ މީޑިއާ ކައުންސިލްގެ މެންބަރު ފާތިމަތު ނަހުދާ ފާއިޒް ވިދާޅުވީ، ބިލުގައި މިހާރު އޮތްގޮތުން ސެލްފް ރެގިއުލޭޝަނަށް ނުވަތަ މީޑިއާތައް އަމިއްލައަށް ރެގިއުލޭޓްކުރުމަށް އެއްވެސް ޖާގައެއް ނުލިބޭ ކަމަށެވެ."މި ބިލުގައި ނޫސްވެރިންނަށް ބޮޑެތި ފައިންތަކާއި [ޖޫރިމަނާތަކާއި] މީޑިއާތަކުގައި މަސައްކަތް ކުރާ މުވައްޒަފުންނަށާއި އަދި މީޑިއާ އޯގަނައިޒޭޝަންތަކަށް ބޮޑެތި ފައިންތަކާއި ޕެނެލްޓީތައް ކަނޑައެޅިފައި ހުރިއިރު، ނޫސްވެރިންނަށް މި އޮތް ރައްކާތެރިކަމުގެ ވާހަކަ އެއްވެސް ވަރަކަށް މެންޝަން ކޮށްފައެއް ނެތް،" ނަހުދާ ވިދާޅުވި އެވެ.މަޖިލީހަށް މިހާރު ހުށަހަޅާފައިވާ ބިލު ބޭރުކޮށްލަން ބައިނަލްއަގުވާމީ 20 އަށްވުރެ ގިނަ ޖަމިއްޔާއިން ގޮވާލާފައިވާކަން ވެސް ނަހުދާ ފާހަގަކުރެއްވި އެވެ.އޭނާގެ އިތުރުން ވެސް މިއަދުގެ ކޮމިޓީގައި ވާހަކަދެއްކެވި މީޑިއާ ކައުންސިލުގެ ހުރިހާ މެންބަރުން ވެސް ގޮވައިލީ މިހާރު ހުށަހަޅާފައިވާ ބިލު މަޖިލީހުން ބޭރުކޮށްލުމަށެވެ. އަދި އެ ބިލަށް އިސްލާހެއް ހުށަހެޅުމުގެ ބަދަލުގައި އެ ބިލާ މެދު އަމަލު ކުރަން ފެންނަ ގޮތެއް ބިލަށް ހިޔާލު ހުށަހެޅުމުގެ މުއްދަތުގައި ކޮމިޓީއަށް ލިޔުމުން ފޮނުވާނެ ކަމަށް ވެސް މީޑިއާ ކައުންސިލުގެ މެންބަރުން ވިދާޅުވި އެވެ.ތުޅާދޫ ދާއިރާގެ އަމިއްލަ މެމްބަރު އަބްދުލް ހަންނާނު ހުށަހަޅުއްވާފައިވާ އެ ބިލުގެ ދަށުން ނޫސްވެރިން، 25،000ރ. އަށް ޖޫރިމަނާ ކުރެވޭނެ އެވެ. އަދި ނޫސްތައް 100،000ރ. އާ ހަމައަށް ޖޫރިމަނާކުރެވޭނެ ކަމަށް ވެސް މި ބިލުގައިވެ އެވެ. މީޑިއާތަކުގެ ލައިސަންސް ހިފެހެއްޓުމާއި ނޫސް ވެބްސައިޓުތައް ބްލޮކްކުރުމުގެ އިތުރުން ބިލު ތަސްދީގު ކުރުމުގެ ކުރުމުގެ އެއް އަހަރު ކުރީގެ ކަންކަން ބަލައި ފިޔަވަޅު އެޅޭނެ ކަމަށް ވެސް ވެ އެވެ.އެ ބިލާ ގުޅިގެން ނޫސްވެރިންގެ ކަންބޮޑުވުމަކީ ކޮމިޝަނުގައި ރައީސް އައްޔަނުކުރާ ތިން މެންބަރުން ތިބުމަކީ ނޫސްވެރިކަމުގެ ދާއިރާގައި ދުނިޔޭގައި ވެސް އަމަލު ކުރަމުން އަންނަ "ބެސްޓް ޕްރެކްޓިސް" ކަމަށްވާ ސެލްފް ރެގިއުލޭޓަރީ ނިޒާމު ގެއްލި، ސަރުކާރުގެ ނުފޫޒު މީޑިއާއަށް ވަންނާނެ ކަމެއް ކަމަށެެވެ. އަދި ނޫސްވެރިން ވޯޓުލައިގެން ހޮވާ މެންބަރުން ވަކި ކުރުމުގެ ބާރު މަޖިލީހަށް އޮތުމާއި ގައުމީ ސަލާމަތަށް ނުރައްކާވާ ކަމަށް "ބެލެވޭ" ހާލަތެއްގައި ފުލުހުން ފަދަ އިދާރާތައް މެދުވެރިކޮށް ނޫސްތަކާއި ޓީވީ ތަކުގެ އޮފީސްތަކަށް ވަދެ ހުއްޓުވުމުގެ ބާރު ކޮމިޝަނަށް އޮތުން ހިމެނެ އެވެ.ބިލުގައި ތެދު ނޫން މައުލޫމާތު ހާމަކޮށްފިނަމަ މައާފަށް އެދެން ޖެހޭނެ ކަމަށް ބުނެފައިވާ އިރު "ތެދު" ނުވަތަ 'ދޮގު" ކަނޑައަޅަނީ ކޮން ފަރާތަކުން ކިހިނެއް ކަމެއް އެނގެން ނެތުމަކީ ވެސް ނޫސްވެރިންގެ ކަންބޮޑުވުމެކެވެ.