ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ އާ ޓާމިނަލްގެ މަސައްކަތް ކުރާ ބީދޭސިންތަކެއްގެ މެދުގައި މިއަދު ބޮޑު މާރާމާރީއެއް ހިންގައިފިއެވެ.
މިކަމާ ގުޅިގެން ފުލުހުން ވަނީ ޓާމިނަލްގެ މަސައްކަތް ކުރަމުންދާ ބިދޭސިންގެ މެދުގައި ހިނގި މާރާމާރީއާ ގުޅިގެން ފުލުހުން ހަރަކާތްތެރިވާން ފަށާފައިވާ ކަމަށް ބުނެފައެވެ.
އެގޮތުން މި މާރާމާރީގައި އަނިޔާވި ބަޔަކަށް ހުޅުމާލެ ހޮސްޕިޓަލާއި ޓްރީޓޮޕް ހޮސްޕިޓަލުގައި ފަރުވާ ދެމުން ދާ ކަމަށް ފުލުހުން ވަނީ މައުލޫމާތު ދީފައެވެ.
މިކަމާ ގުޅޭ އިތުރު މައުލޫމާތު ހިއްސާކުރާނެ ކަމަށް ފުލުހުން ބުނެފައިވާއިރު، މާރާމާރީ ހިނގަން މެދުވެރިވި ސަބަބެއް ނުވަތަ މާރާމާރީގައި އަނިޔާވި ފަރާތްތަކުގެ އިތުރު އެއްވެސް ތަފްސީލެއް ފުލުހުން ހާމަކޮށްފައެއް ނުވެއެވެ.
ފާހަގަކޮށްލެވޭ ގޮތުގައި މީގެކުރިންވެސް ވަނީ ބިދޭސީންގެ މެދުގައި ތަފާތު މާރާމާރީތައް ހިނގާފައެވެ. އެގޮތުން ދާދިފަހުންވެސް ވަނީ މާވެޔޮ މަގުގައި ހުންނަ ކެފޭއެއްގައި މާރާމާރީއެއް ހިންގާފައެވެ. މި މާރާމާރީގައި ބަންގްލަދޭޝްގެ ރައްޔިތަކަށް ސީރިއަސް އަނިޔާތަކެއް ވެފައިވާއިރު މި މާރާމާރީ އާއި ގުޅިގެން ނޭޕާލްގެ 24 އަހަރުގެ ފިރިހެނަކު ވަނީ ހައްޔަރުވެސް ކޮށްފައެވެ.