ސަރުކާރާއި މެދު ހިތްހަމަނުޖެހޭ މިންވަރު ބައި އިލެކްޝަންތަކުން ހާމަވާ ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.
ޒައިދު ފިއުޗާ އެނާޖީ ޕްރައިޒްގެ ޖޫރީ ޕެނެލްގެ ބައްދަލުވުމުގައި ބައިވެރިވެ ވަޑައިގެންނެވުމަށްޓަކައި އަބޫ ދާބީއަށް ފުރާވަޑައިގަތުމުގެ ކުރިން ނޫސްވެރިންނަށް މައުލޫމާތުދެއްވަމުން ނަޝިދު ވިދާޅުވީ އިންތިހާބުތަކުން ފެންނަ ނަތީޖާއަކީ އިދިކޮޅު އެމްޑީޕީ އަށް ރައްޔިތުންގެ މެދުގައި އޮތް ތާއީދު ކަމަށާއި ސަރުކާރަށް އޮތް އިތުބާރު ރައްޔިތުންގެ ކުރިމަތީގައި ވަރަށް ބޮޑަށް ގެއްލިފައިވާކަން ފެންނަމުންދާ ކަމަށެވެ.
އަދި އެކަމުގެ އެންމެ ބޮޑު ހެއްކަކީ މިހާރު ބާއްވަމުން އަންނަ ބައި އިލެކްޝަންތަކުން ނިކުންނަ ނަތީޖާ ކަމަށާއި ރާއްޖެ ދަތުރުކުރަމުން ދަނީ "ފެއިލްވެފައިވާ ދައުލަތަކާ" ދިމާލަށް ކަމަށް ވެސް އެމަނިކުފާނު މިއަދު ވިދާޅުވިއެވެ.
"ސަރުކާރަށް އޮތް އިތުބާރު ވަރަށް ބޮޑަށް ގެއްލިފައި މިވަނީ. އިންތިހާބުތަކުން އެކަން ފެނިގެން އެބަދޭ. ރާއްޖެ ދަތުރު ކުރަމުން މިދަނީ ފެއިލްވެފައި އޮތް ދައުލަތަކާއި ދިމާލަށް ކަމަށް އަޅުގަނޑުމެންނަށް ލަފާ ކުރެވޭ،" ނަޝީދު ވިދާޅުވި އެވެ.
ނަޝީދު މިހެން ވިދާޅުވިއިރު އިއްޔެ ބޭއްވި މ.ކޮޅުފުށީ ބައި އިލެކްޝަން އެމްޑީޕީން ކާމިޔާބުކޮށްފައިވަނީ ޕީޕީއެމް އާއި ވާދަކޮށްގެންނެވެ. އަދި އައްޑޫ ސިޓީ ކައުންސިލްގެ ފޭދޫ ދާއިރާގެ ބައި އިލެކްޝަން މީގެކުރިން އެމްޑީޕީން ކާމިޔާބުކުރީ ވެސް ޕީޕީއެމް އާއި ވާދަކޮށްގެންނެވެ.
ރާއްޖެ ސިފަ ކުރެވެނީ ވަރަށް ބޮޑު ބިރުވެރިކަމެއްގެ ތުންފަތް މަތީގައި ރައްޔިތުން ތިބި ތަނެއްގެ ގޮތުގައި ކަމަށާއި ހަމަޖެހުން ނެތިއްޖެއްޔާ ރާއްޖޭގެ އިގްތިސާދަށް އަސަރު ކުރާނެ ކަމަށް ވެސް ނަޝީދު ވިދާޅުވިއެވެ. އަދި ރާއްޖެއިން ވިއްކާ އެންމެ ބޮޑު އެއް ހިދުމަތަކީ އާންމު މަސްލަހަތާއި ހަމަޖެހުން ކަމަށް ނަޝީދު ވިދާޅުވިއެވެ.
ނަޝީދު އިތުރަށް ވިދާޅުވީ މިނިވަން ނޫހުގެ ނޫސްވެރިޔާ، އަހްމަދު ރިޟްވާން ހޯދުމުގައި އާއި އުނގޫފާރު ދާއިރާގެ ކުރީގެ މެންބަރު އަފްރާޝީމް އަލީ އަވަހާރަކޮށްލި މީހުން ހޯދުމުގައި އާއި މާފުށި ޖަލުން ފިލާފައިވާ ދެ ގައިދީން ހޯދުމުގައި ސަރުކާރު އޮތީ ނުޅުދިފައި ކަމަށެވެ.
"ނޫސްވެރިން ގެއްލުން، ސީޔާސީ ޕާޓީތަކަށް ހަމަލާ ދިނުން، ސިޔާސީ ޕާޓީ ތަކުގެ ޖަލްސާ ތަކަށް ހަމަލާ ދިނުން، މިބާވަތުގެ ކަންކަން ހިންގަން ފެށީމާ އަޅުގަނޑަށް ފެންނަގޮތުގައި ބޭރު ދުނިޔޭގެ މީޑިއާތަކުން އެކަން ފާހަގަ ކުރާނެ،" ނަޝީދު ވިދާޅުވި އެވެ.