ޗައިނާގައި ފެތުރެމުންދާ ހިއުމަން މެޓަޕްނިއުމޯވައިރަސް (އެޗްއެމްޕީވީ) ގެ ކޭސްތަކެއް އިންޑިއާއިން ފެނިއްޖެއެވެ.
އިންޑިޔާގެ ބެންގަލޫރުގައި ހޯމަ ދުވަހު އެޗްއެމްޕީވީގެ ދެ ކޭސް ރިޕޯޓުކުރެވިފައިވާއިރު، މީގެ ތެރެއިން 3 މަހުގެ ކުޑަކުއްޖަކު ފަރުވާއަށްފަހު ހޮސްޕިޓަލުން ވަނީ ދޫކޮށްލާފައެވެ. އަދި 8 މަހުގެ ކުއްޖަކަށް އަންނަނީ ފަރުވާދެމުންންދާއިރު، އެކުއްޖާގެ ހާލު ރަނގަޅުވަމުން އަންނަކަމަށް އިންޑިއާގެ ނޫސްތަކުން ރިޕޯޓްކުރެއެވެ.
މިކަމާއި ގުޅިގެން އިންޑިޔާގެ ޔޫނިއަން ހެލްތު މިނިސްޓްރީން ބުނީ، މި ދެ ބަލިމީހުންގެ ތެރެއިން އެއްވެސް މީހަކު ބޭރު ޤައުމަކަށް ދަތުރުކޮށްފައިނުވާކަމަށެވެ.
Advertisement
މި ބަލި އިންޑިއާއިން ފެނިފައި މިވަނީ, އިންފްލުއެންޒާގެ އަލާމަތްތަކެއް ހުންނަ ނޭވާލާ ނިޒާމަށް ޖެހޭ ބައްޔެއް ކަމުގައިވާ އެޗްއެމްޕީވީ ޗައިނާގައި ފެތުރެމުންދާތީ، ދުނިޔޭގެ ގިނަ ބައެއްގެ ކަންބޮޑުވުންތައް އިތުރުވެފައިވާ ދަނޑިވަޅެއްގައެވެ.
ސީރިއަސް ހާލަތްތަކުގައި އެޗްއެމްޕީވީ ޖެހުމުން އާއްމުކޮށް ކުޑަކުދިންނަށް ބްރޮންކައިޓިސް ނުވަތަ ނިއުމޯނިއާ ޖެހުމުގެ ފުރުސަތު އޮވެއެވެ. މިއީ ކުޅު ފަދަ ތަކެތިން އަދި ގައިގޯޅި ވުމުން ޖެހޭ، ވަރަށް ފަސޭހައިން ގައިން ގަޔަށް އަރާބައްޔެއްކަން ފާހަގަކޮށްލަން ޖެހެއެވެ.
މި ބައްޔާއި ބެހޭގޮތުން ތަފާތު ވާހަކަތައް ސޯޝަލް މީޑިއާގައި ފެތުރެމުންދިޔަ ނަމަވެސް، ޗައިނާގެ ނޭޝަނަލް ޑިޒީޒް ކޮންޓްރޯލް އެންށް ޕްރިވެންޝަން އެޑްމިނިސްޓްރޭޝަން (އެންސީޕީޑީ) އިން ވަނީ ބައްޔާއި ގުޅިގެން ހާލަތު ނުރައްކާތެރި ނޫންކަމަށް ބުނެފައެވެ. އެހެންނަމަވެސް، އެގައުމުގައި ފާހަގަކޮށްލެވޭ އަދަދަކަށް މިދިޔަ ޑިސެންބަރު މަހުގެ 16 އިން 22 އާއި ދެމެދު ފުއްޕާމޭގެ އިންފެކްޝަންތައް އިތުރުވިކަމަށް އެ އިދާރާއިން ވަނީ ހާމަކޮށްފައެވެ.