މޯލްޑިވްސް އިމިގްރޭޝަނުން ހިންގި ޚާއްޞަ ރެއިޑް އޮޕަރޭޝަނެއްގައި، ހީނާމާގެ ޕާކިންގ ސަރަހައްދުން ގަވާއިދާ ޚިލާފަށް އުޅެމުންދިޔަ 17 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.އިމިގްރޭޝަނުން މަޢުލޫމާތު ދެއްވިގޮތުގައި، މި އޮޕަރޭޝަން އަމާޒުކުރެވުނީ އާންމުންގެ ފަރާތުން އަބަދުވެސް ކަންބޮޑުވުން ފާޅުކުރަމުން އަންނަ، ބިދޭސީންގެ ބޮޑު ކޮންޓްރޯލެއް އޮންނަކަމަށް ބެލެވޭ ހީނާމާގެ ޕާކިންގ ސަރަހައްދަށެވެ. މި އޮޕަރޭޝަންގައި އެ ސަރަހައްދަށް އެއްވެ އުޅޭ ބިދޭސީންނާއި، ބިދޭސީން އިސްވެ ތިބެ ހިންގަމުންދާ ފިހާރަ، ކެފޭ ފަދަ ތަންތަން ވަނީ ބަލައި ފާސްކުރެވިފައެވެ.ބަލައި ފާސްކުރެވުނު ތަންތަނުން ފެނުނު، ސައްހަ ވިސާއެއް ނެތި ގަވާއިދާ ޚިލާފަށް މަސައްކަތްކުރަމުންދިޔަ 17 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެވިފައެވެ. މި ބިދޭސީންނާމެދު ގާނޫނީ ފިޔަވަޅު އެޅުމަށްފަހު އެމީހުންގެ ޤައުމުތަކަށް ފޮނުވާލެވޭނެ ކަމަށް އިމިގްރޭޝަނުން ބުނެފައިވެއެވެ.އިމިގްރޭޝަނުން އިތުރަށް ހާމަކުރިގޮތުގައި، ގަވާއިދާ ޚިލާފަށް ރާއްޖޭގައި އުޅެމުންދާ ބިދޭސީން ހޯދުމަށް ރެއިޑް އޮޕަރޭޝަންތައް ދަނީ މެދުނުކެނޑި ކުރިއަށް ގެންދެވެމުންނެވެ. މިގޮތުން މިދިޔަ އަހަރު ހިންގުނު އޮޕަރޭޝަންތަކުގައި އެކަނިވެސް 5،600 އަށްވުރެ ގިނަ ބިދޭސީން ވަނީ އެމީހުންގެ ޤައުމުތަކަށް އަނބުރާ ފޮނުވާލެވިފައެވެ.އިމިގްރޭޝަނުން އާންމުންނަށް ގޮވާލާފައިވަނީ، ގަވާއިދާ ޚިލާފަށް ރާއްޖޭގައި އުޅޭ ބިދޭސީންނާ ބެހޭ މަޢުލޫމާތު ލިބިއްޖެނަމަ، ލަސްނުކޮށް އިމިގްރޭޝަނަށް އެންގުމަށެވެ. މިފަދަ ކަންކަން ހުއްޓުވުމަށް އާންމުންގެ އެއްބާރުލުން ވަރަށް މުހިންމު ކަމަށްވެސް އިމިގްރޭޝަނުން ފާހަގަކޮށްފައިވެއެވެ.