ލޮބުވެތި އެކުވެރިންނޭވެ! ކޮންމެ ދުވަހެއް ނިމޭނީ އެއްގޮތަކަށް ނޫނެވެ! ކޮންމެ ދުވަހަކީވެސް ތަފާތު ދުވަހެކެވެ. އެއްދުވަހު އުފަލުގައި ހުރެވިފައި އަނެއް ދުވަހު އެކަނިވެރިކަމުގައި ހުންނަން ޖެހުން މިންވަރުކުރައްވަވަނީ ﷲ ތަޢާލާއެވެ.  
އެކަނިވެރިވާންޖެހުމުން ބައެއް މީހުންނަށް ވިސްނެނީ އަނބިމީހާގެ ނުވަތަ ފިރިމީހާގެ ނުބައިކަމުން މެދުވެރިވި ކަމެއް ކަމަށެވެ. އެއީ އެއްގޮތަކަށްވެސް އެގޮތަށް މެދުވެރިވާ ކަމެއް ނޫނެވެ. އެއީވެސް ހަމަ ﷲ ތަޢާލާ ލައްވަވާ ބޮޑު ރަޙްމަތްފުޅެކެވެ.  
ސަބަބަކަށް މެދުވެރިވީ ނުބައިކޮށް ކަންތައްކުރި މިހާކަމަށްވެދާނެއެވެ. އެއީ ޙަޔާތުގެ ބައިވެރިޔާކަމަށްވެސް ވެދާނެއެވެ. އެންމެ ގާތް އެކުވެރިޔާ ނުވަތަ ޢާއިލާގެ މީހަކު ކަމަށްވެސް ވެދާނެއެވެ. ބުނަންހެއްޔެވެ؟ އެއީ ކޮންމެ މީހަކު ކަމަށްވީނަމަވެސް އަޅައިވެސް ނުލާށެވެ! އެކަން އެމީހާއަށް ދޫކޮށްލާށެވެ! ﷲ ތަޢާލާއަށް ވަކީލްކުރާށެވެ!  
ބައެއް ފަހަރު ކަންކަން މެދުވެރިވެ ކައިވެނި ރޫޅި އެކަނިވެރިވާންޖެހުމުން އެގެއްލުންދިނުމަށް މެދުވެރިވި މީހާ ނުވެސް އެނގިދާނެއެވެ. ރަނގަޅިވެސް ނުއެނގުނިއްޔާއެވެ. އެނގުމުން ޙަސަދަވެރިވެވޭނެތީއެވެ. ތިބާއަށް އެއީ ކާކުކަން ނުއެނގުނަސް ﷲ ތަޢާލާ އެމީހާ ދެނެވޮޑިގެންވެއެވެ. ވަޤުތު ޖެހުމުން އެމީހާ ހިއްޕަވާނެތެވެ! އެއިރުން ސަލާމަތެއް ނުވެވޭނެތެވެ.  
ކޮންމެ ގޮތަކަށް ކަންކަން މެދުވެރިވެގެން ނަމަވެސް އެކަނިވެރިވާންޖެހިއްޖެނަމަ ޢަޒުމް ކަނޑައަޅަންވީ ފަސްއެނބުރި ނުބަލައި ކުރިއަށް ދިއުމަށެވެ. ކުރިއަށްދާން ކުރެވެންހުރި ހުރިހާ މަސައްކަތެއް ކުރުމަށެވެ. އެކަމުގައި ޘާބިތުވެއްޖެނަމަ ލައްވަވާނެ ރަހްމަތް މާބޮޑުވާނެކަން ޔަޤީންކުރާށެވެ! އިން ޝާ ﷲ  
- އިސްލާމީ ތިލަފަތުގެ ދަރުސަކުން