މީސްތަކުންނަށް ކުރެވޭ އެންމެ ބޮޑުކުށަކީ އެމީހެއްގެ ފުރާނަ ހިއްޕަވާ ވަޤުތަށް ތައްޔާރުނުވުންކަމަށް ޢިލްމްވެރިން ބަޔާން ކުރައްވައެވެ. އެއީ އެވަޤުތަށް ތައްޔާރުވާނަމަ އެމީހެއްގެ ޢަމަލުތައް އިޞްލާޙްކޮށް އާޚިރަތް ލިބިގަންނަން މަސައްކަތްކުރާނެތީއެވެ. އެހެން ހުރިހާ ކަމަކަށްވުރެ އެކަމަށް އިސްކަންދޭނެތީއެވެ. އެހެންކަމުން އެދެނީ ތިރީގައިވާ ލިޔުން ވިދާޅުވެލައްވައި ޢަމަލުތަކަށް ރަނގަޅު ބަދަލެއް ގެންނަން މަގުފަހިކުރަން މަސައްކަތްކުރުމެވެ.  
ދެންފަހެ ގަދަކީރިތިވަންތަ މާތްރަސްކަލާނގެ އެމީހާ ދުނިޔޭގެ ދިރިހުރުމުގައި ލަހައްޓަވާނޭ ދުވަހަކު ލަހައްޓަވަނީ އެމީހާޔަށް ކަނޑައެޅިގެންވާ އަޖަލު ހަމަވެ މިންވަރުވެގެންވާ رِزق ފުރިހަމަވެ އެމީހާގެ ކިބައިން ހިނގާން ހުރި އަސަރުތައް ހިނގައިފުމަށް ދާންދެނެވެ. އެއިރުން އެމީހާގެ ކައިރިއަށް ހަތަރު މަލާއިކަތުން ފައިބަންނަވާފާނެތެވެ. އެއްމަލާއިކަތަކު އެމީހާގެ ނަފުސު ކަނާތުފައިން ދަންމަވާނެތެވެ. އަނެއްމަލާއިކަތާ ވާތުފައިން އަނެއްމަލާއިކަތާ ކަނާތުން އަނެއްމަލާއިކަތާ ވާތުން އެމީހާގެ ނަފްސު ދަންމަވާން ފަށްޓަވައިފާނެތެވެ.  
ބައެއް މައްޔިތުންގެ ނޭވާ ހޮޅިޔަށް އެޅިއްޖައުމުގެ ކުރީގައިވެސް مَلَكُوتِيَّ عَالَم ގެ ކަންތައްތައް كشف ވެ އެމީހާގެ عمل ތައް ހުރި ގޮތެއްގެ حَقِيقِة  ގެ މައްޗަށް އެމަލާއިކަތުން ސިފަ ވެގެންވާ ގޮތެއްގެމައްޗަށް ދެކެވެސް އުޅެއެވެ. އެމީހާގެދޫ ވީއްލިގެންވާނަމަ އެވާހަކަ ދައްކައިވެސް އުޅެއެވެ. ބައެއްފަހަރަށް އެއީ شيطان އާގެ ކިބައިން ފެންނަ ކަމެކޭ ހީކޮށް އެވާހަކަ ނުދައްކައި ދޫ ބަންދު ވެއްޖައުމަށް ދާންދެންވެސް ހިމޭނުން އޮވެދެއެވެ. 
އެބޭކަލުން އެނަފުސު ދަމައި ނެރުއްވަނީ އިނގިލިތަކުގެ ކޮޅުންނާއި ނިޔަރޮދިތައް ދެމެދުންނެވެ. އެނަފުސު ދެމިގެން އަންނަހުށީ ފެންއަޅާން ގެންގުޅޭ ކަހަލަ ހަމަކުން ކުނިކޮޅެއް ދެމިގެން އަންނަ ފަދައިންނެވެ. ފާފަވެރިޔާގެ ފުރާނަ ދެމިގެން އަންނަހުށީ ތެންމައިފައި އޮތް ކެހެރި ފޮތިގަނޑަކަށް ކަށިދަގަނޑު އުލެއް ވައްދާފައި ބާރަށް ދަމައިގަތީމާ އެދެމިގެން އަންނަ މިސާލުގައެވެ. މިއީ ހައްތާވެސް شريعة އާއިގެން ވަޑައިގަތް سلام އާއި صلوات ލެއްވި މާތް ރަސޫލާގެ ކިބައިން ރިވާވެގެންވާ ގޮތްތަކެވެ. 
މައްޔިތާއަށް ހީވާހުށީ އެމީހާގެ އެތެރެހަށި މުޅީން ކަށިތަކަކުން ފުރިއްޖެ ހެންނެވެ. އެމީހާގެ ނަފުސު އެނުކުންނަނީ ތިނޯހެއްގެ ފަގަޔަކުންހެންނެވެ. އުޑުއައިސް ބިންމައްޗަށް ލެފިއްޖެ ހެންނެވެ. އެދެމެދުގައި އޮތީ ތިމާހެންނެވެ. މިކަމަށްޓަކައޭ މަރުގެ ވާހަކައިން كَعْبُ الْأحْبَارُ ގެފާނު ކުރެން ސުވާލުވެވުނީމާ އެކަލޭގެފާނުން ވިދާޅުވީ އެއީ އާދަމުގެ ދަރިއެއްގެ އެތެރެ ހަށްޓަށް ކަށިގިނަގޮފިގަނޑެއް ވައްދައި ބަހައްޓައިފައި ގަދަފަދަ މީހަކު އެދަމާ ނެރުން ކަހަލަ ކަމެކެވެ. ނެރުނުއިރު ހުރިތަނެއްހުރީއެވެ. ކެނޑުނު ތަނެއް ކެނޑުނީއެވެ.  
ސަލާމާއި صلوات ލެއްވި އިތުރު އެކަލޭގެފާނު حديث ކުރެއްވިޔޭ. މަރުގެ ސަކަރާތް ތަކުގެ ތެރެއިން އެންމެ ސަކަރާތެއް ކަނޑި އެތިފަހަރުގެ ތިންސަތޭކަ އެތިފަހަރަށް ވުރެ ގަދައެވެ. އެހިނދުގަޔޭ އެމީހާގެ މުޅި ގައިންދާހިއްލައި ލޯވައްވެ ނޭފަތުކުރި އުފުލި އަރިކަށީގެ ކަށިތައް އުފުލި ނޭވާ މަތިވެރިވެ ކުލަރީދޫވެ މިހިރަހައި ގޮތްތައް ވަނީ. ސަލާމާއި صَلَوَات ލެއްވި رَسُوْلُ الله ގެފާނުން މި حَال ކޮޅުގައި އޮންނަވަނިކޮށް عَائِشةގެފާނުން ދެކެ ވަޑައިގަތެވެ. އޮންނެވީ އެކަމަނާގެ އުނގުފުޅު މަތީގައެވެ. ފަހެ އެވަގުތުގައި އެކަމަނާ ކަރުނަ އަޅުއްވައި މިފަދައިން ޅެން ހައްދަވައިގެން ވިދާޅުވިއެވެ.
بِنَفْسِىَ اُفْدِى  مَاغَصَّكَ        مِنَالْهَابِعَاتِ   وَمَاتُوجَعُ
وَمَا مَسَّكَ الْجِنُّ مِنْ قَبْلِ اِذَا      وَمَاكُنْتَ ذَارَوْعَةٍ تَفْزَعُ
وَمَالِيَ اَنْظُرُ فِى وَجْهِكَ        كَمِثْلِ الصِّبَاغِ اذَا يَنْقَعُ
اِذَا شَحَبَ اللَّونُ مِنْ مَيِّتٍ       فَاَنْوارُ وَجْهِكَ قَدْ تَسْطَعُ 
މިޅެމުގެ مَعْن އީ، ކަލޭގެފާނަށް ތިޔަ ޖެހިވަޑައިގަތް ބޮޑު مُصِيبَة  އަކާއި ވޭން ލިބިވަޑައިގަންނަވާ ކަމަކާއި ކަރުފުޅުގެ ތެރެޔަށް ތިޔަދަތިފުޅުވީ ކަމަކަށް އަހުރެންގެ ޖާނު قُرْبَان ކޮށްގެންވެސް އެކަންތައް ނުވާނޭ ނަމަ ހެޔޮތާއޭ. ކަލޭގެފާނަކީ މިގެ ކުރިއަކު ޖިންނިއެއްގެ އުދަގުލެއްވާ އަދި އެއްވެސް ކަމަކުން ބިރުފުޅެއްގަންނަ ބެއިކަލަކީމުއެއް ނޫނެވެ. ކަލޭގެފާނުންގެ މޫނުފުޅުގެ ކުލަކޮޅު ރީދޫވެގެންވަނިކޮށް އަހުރެންނަށް އެފެންނަނީ ކިއެއްވެގެން ބާވައެވެ. މައްޔިތެއްގެ ކުލަރީދޫވެ ހުތުރުވެގެން ވިޔަސް ކަލޭގެފާނުންގެ މޫނުފުޅުގެ ނޫރުތައް ވަނީ ވިދާ ބަބުޅާފައެވެ. މިއެވެ. 
ދެންފަހެ މަރަށް حَاضرُ ވާމީހާގެ نفس އައިސް އެމީހާގެ ހިތުގެ ތެރެއަށް حاضرވެއްޖެއްޔާ ދޫ  ބަންދުވެދާނެއެވެ. 
ހަމަ އެކަކަށްވެސް އެމީހާގެ ނަފުސު އައިސް މޭމައްޗަށް جَمَع ވެއްޖެއްޔަކާއި ދުލަކުން ބަހެއް ނުބުނެވޭ ހުއްޓެވެ. އެއީ ދެކަމަކަށްޓަކައެވެ. އެއްކަމަކީ، ހަމަކަށަވަރުން ކަންތައްވަނީ ބޮޑުވެގެންނެވެ. މެއިމަތީގައި جَمَعَ ވެގެންވާ ނޭވާގެ ސަބަބުން މެއިމަތިވަނީ ދަތިވެފައެވެ. އިންސާނާގެ މެއިމަތީގައި ގަދަ އެތިފަހަރެއް ޖެހުނަސް حَيران ވެދެއެވެ. ބައެއްފަހަރަށް ވާހަކަ އެއްވެސް ނުދެއްކެއެވެ. ވާހަކަ ދެއްކޭނީ ބައެއް ފަހަރަށެވެ. އިންސާނާގެ އެތެރެ ހައްޓަށް ތޫނު އެއްޗަކުން ތޮރުފައިލެވުނަސް މޭމައްޗަށް ތޮރުފުނިއްޔާ މެނުވީ އަޑުތަކެއް އިއްވައިފާނެތެވެ.  
މޭމަތި ތޮރުފައިލެވިއްޖެއްޔާއި އަޑެއް އިއްވުމަކާނުލައި މަރުވެގެން ވެއްޓޭނީއެވެ. އަނެއްކަމަކީ، އިންސާނާގެ ހަށިގަނޑުގެ ތެރެއިން އަޑު ބޭރުވެގެން އައުމުގެ ސިއްރަކީ އެމީހާގައި ހުންނަ غَريزِىَّ ހޫނުކަމެވެ. އެކަންތައް ހިގާއްޖެއެވެ. މިހައިރު އެމީހާގެ ނަފުސު ވަނީ ދެ حال އަކަށް تَغَيَّر ވެގެންނެވެ. އެއީ އޭގައިހުރި ހޫނުކަންފުޅު މައްޗަށް އަރައިގެން ދިއުމާއި އެކަން ކުޑަވީވީހެން ވެއްޔާއި ފެނުން އެއްވެފައިފާ ހަށިގަނޑު އޭގެ މައިގަނޑަށް رُجُوع ވުމަށް ފިނިވެގަތުމާއި މިދެ حال އެވެ. މިދަރަޖައަށް އައުމުން މަރުވާމީހުންގެ ހެޔޮކަމާއި ނުބައިކަމުގެ حَال ތަފާތުވެގެންވާ ގޮތުން މަރުވުމުގެ حَال ތަފާތުވާނެއެވެ.  
ބައެއްމީހުން މިދަރަޖައަށް ދިއުމުން މަރުގެ މަލައިކަތާ އެމީހާގެ ހިތަށް ތޮރުފާލައްވަނީ ނަރަކައިގެ ވިހައިން ވިހަލެވިފައިވާ خَنْجَر އަކުންނެވެ. ދެން އެމީހާގެ ހިތުގައި ހައްޔަރުވެ ދަތިކަން ލިބިފައިވާ ނަފުސު ކުއްލިއަކަށް ސިހިގެން ބޭރުވެގެންފައެވެ. ދެން މަލާއިކަތާގެ އަތްޕުޅުން އެހިއްޕަވައިފާނެއެވެ. 
އެއާއި އެންމެ އެއްފަދަވެގެންވަނީ ސާފުދިރޭރަހަފޮދަކާ އެވެ. އޮންނަނީ އެމީހާގެ ސިފައިގާ މާމުއި ކުޅަނދުރެއްގެ ބޮޑުމިނުގައެވެ. ދެންފަހެ އެމަލާއިކަތާ އެފުރާނަ رَحْمَة ގެ މަލާއިކަތުންނާއި ނުވަތަ زَبَانِىَّ މަލާއިކަތުންނާއި حَوَالُ ކުރައްވައިފަތެވެ. މަރުވާ ބައެއް މީހުންގެ نفس މަޑުމަޑުން އެއްވަމުން ކޮށިވަމުން އައިސް އެމީހާގެ ނޭވާ ހިނގާ ހޮޅީގެ އަނގަމައްޗަށް އަތުވެދެއެވެ. އެއިރު ހިތުގައި ހުންނަހުށީ، އޭގެ ވަރަށް ހިމަ ދޯދިފަށެކެވެ. އެހައިރުން މަރުގެ މަލާއިކަތާ އެއްކަލަ خَنجر ން ތޮރުފައިލައްވަތެވެ. ކޮންމެއަކަސް އިންސާނީ نفس މި خَنْجَر ޖައްސަވައި ފުމަށްދާންދެން ހިތާއި ވަކިވެގެން ނުނިކުންނަ ހުއްޓެވެ.  
މި خَنجر ގެ ސިއްރަކީ އެއީ بَحْرالْمَوْتُ އެވެ. ކިޔޭ ކަނޑަށް ކޮށްޕަވައި ލައްވައިފައި ނަންގަވައި މަރުވާ މީހާގެ ހިތުގެ ތެރެއަށް ތޮރުއްޕަވާ އެއްޗެކެވެ. އެ ހަމަހިތުގައި ބީހުމުން މަރުގެ އަސަރުތައް މުޅި ހަށިގަނޑަށް ހިނގައި ގެން ހިނގައިދާނެއެވެ. މިހެނީ ދިރިހުރުމުގެ ސިއްރު ބެހެއްޓެވިފައިވަނީ ހިތުގައެވެ. އެ ސިއްރު އެހިތުގެ ތެރެއަށް ލެއްވުނީ ފުރަތަމަ އުފެދިގަތް އުފެދިގަތުމުގައެވެ. علم الكَلاَم ގެ علم ވެރީންކުރެ ބައެއް ބޭކަލުން ބުނުއްވަތޭ ދިރިހުރުމަކީ ނަފްސެއް ނޫނެވެ. ދިރިހުރުމުގެ مَعن އަކީ ނަފުސު ހަށިގަނޑާ އެއްވެގެން ވުމެވެ. اهـ 
ނަފުސުއައިސް ހިތުގެ ތެރެއަށް جمع ވެ ދެން މައްޗަށް އަރައިގަންނަންވާ ވަގުތުގައި ފިތުނަތައް އައިސް އެމީހާގެ މައްޗަށް ހުރަހޮޅޭނެއެވެ. މިހެނީ ކޮންމެއިންސާނެއްގެ ކައިރިއަށް އިބުލީސް ވަނީ އޭނާގެ ވާގިވެރީންތައް ފޮނުވައިފައެވެ. މިވާގިވެރީންގެ އަބަދުގެ މަސައްކަތަކީ، އިންސާނާ މަގުފުރެއްދުމަށް ވަސްވާސްތައް ދިނުމެވެ. މިއުރެން މިފަދަ ވަގުތުގައި އިންސާނާގެ ކައިރިއަށް އަންނަހުށީ އެމީހާގެ ގާތް ތިމާގެ ނަސޭހަތްތެރީންކުރެ މަރުވެގޮސްފައިވާ މީސްމީހުންގެ މިސާލުގައެވެ.  
مَثَلاً މައިން ބަފައިންނާއި ބޭބެއިން ދައިތައިންނާއި ގާތް رَحْمَة ތެރިންނާއި މިފަދަ މީހުންގެ މިސާލުގައި އަންނަހުއްޓެވެ. އައިސް ބުނާ ހުއްޓެވެ. އޭ މިވެނިމީހާއެވެ. ކަލޭ ތިޔައުޅެނީ މަރުވާށެވެ. އަހުރެމެންނީ ކަލެއަށްވުރެ ކުރިން ތިޔަކަންތަކަށް އިސްވެ ތިޔަމަގުން ގޮސްފައި ތިބި މީހުންނީ މުއެވެ. يَهُودى ންގެ ދީންމަތީގައި މަރުވާށެވެ. قَبُول ވެވިގެންވާ ކަމުދާ ދީނަކީ އެއެވެ. އެމީހާ އެގޮތުން ނުއެނބުރުނުނަމަ އަނެއްކާ އެހެން ކޮންމެވެސް ބަޔަކުގެ مِثَال ގައި އަތުވެދާނެއެވެ. އައިސް ބުނާނެތޭ. އިހަށް އެއައީ شيطان ންގެ މަގުފުރައްދާ ތަކެއްޗެވެ. އެހެދީވެސް ދޮގެވެ. نَصْرَانِىދީނުގައި މަރުވޭތޯ ބަލާށެވެ. އެއީ مسيح ގެ دين އެވެ. މިދީން އައުމުން يَهُودى  ންގެ ދީންވަނީ مَنْسُوخُ ވެފައެވެ. މިހެން މިހެން އެކިއެކި ދީން ހުށަހަޅައި ކޮންމެދީނެއްގެ عَقِيدَة ތައް ކިޔައިދީ އުޅޭހުއްޓެވެ. މިހިނދުގައި މާތްރަސްކަލާނގެ މަގުފުރައްދަވާން އިރާދަކުރައްވާފައިވާ މީހަކު ކަމުގައި ވާނަމަ، މަގުފުރެދިގެން ހިނގައިދާ ހުއްޓެވެ.  
މިއީ މާތްރަސްކަލާނގެ ބާވައިލެއްވި މި آية ގެ مَعْن އެވެ. رَبَّنَا ހައްދަވާ ބޮޑުކުރެއްވި ރަސްކަލާކޮ لاَتُزِغْ قُلُوْبَنَا އަޅަމެންގެ ހިތްތައް މަގުނުފުރައް ދަވާ ދޭވެ. بَعْدَ اِذْهَدَيْتَنَا އަޅަމެންނަށް ތެދުމަގު ދެއްކެވުމަށްފަހު، وَهَبْ لَنَا އަޅަމެންނަށް ދެއްވާދޭވެ. مِنْ لَّدُنْكَ އިބަސުވާމީންގެ حَضْرَة ން رَحْمَةً ން رَحْمَة އެއް إِنَّكَ أَنْتَ ހަމަކަށަވަރުން އިބަސުވާމީންގެއީ اَلْوَهَّابُ ދެއްވާ ކަލާނގެ އެވެ. މި آية ގެ مُرَاد އަކީ އަޅަމެން މަރުވާ ހިނދުގައި މަގު ނުފުރައްދަވާ ދޭވެ. އެއިގެ ކުރިން އިބަސުވާމީންގެ ވަނީ އީމާންވުމަށް އަޅަމެންނަށް ތެދުމަގު ދައްކަވާފައެވެ. ދެންފަހެ މާތްރަސްކަލާނގެ އެކަލާނގެ މިއަޅާއާއި މެދުގައި دين މަތީގައި ސާބިތު ކުރައްވައި ލެހެއްޓެވުމަށާއި، ތެދުމަގު ދެއްކެވުމަށް އިރާދަކުރައްވައިފައިވާ ނަމަ އެއަޅާގެ ގާތަށް މި آيَة ގައި މިނަންގެންނެވި رَحْمَة އަތުވެދެއެވެ.  
ބުނެވެޔޭ. އެ رَحمة އަކީ جِبْرِيْل ގެފާނެވެ، ފަހެ އެކަލޭގެފާނުން ވަޑައިގެން شَيْطَان ންތައް ފައްސަވައި ވިދާޅުވާނެޔޭ. އަހުރެންނީ جِبْرِيْل ގެއީމެވެ. މިއުޅެނީ މިއީ ކަލޭގެ عَدَاوة ތެރި شَيْطَان ންތަކެވެ. مُحَمَّدِيَّ شَرِيعَة ގެ މަތީގައި حَنِيفِيَّة  ދީންމަތީގައި އޮވެގެން މަރުވާށެވެ. فِطْرَة ގެ ދީންމަތީގައި އޮވެ ނިދާށެވެ. މިއީ وَهَبْ لَنَا مِن لَّدُنْكَ رَحْمَةَ މިބަސްފުޅުގެ مُرَاد އެވެ. ކޮންމެއަކަސް އެއީ ކޮންމެވެސް رَحْمَة އެއް ފޮނުއްވައިގެން އެމީހާ ދީންމަތީގައި ސާބިތުކުރެއްވުމެވެ. އިންސާނާއަށް މިއަށްވުރެ ވަކީންބޮޑު އުފަލެއް ނުލިބޭ ހުއްޓެވެ.  
މިފަދަ ވަގުތުގައި އެމީހާ ހިނިތުންވެ މޫނު އަލިވެގެން ހިނގައިދެއެވެ. މީސްތަކުން ކުރެ ބައެއްމީހުން ނަމާދަށް ތިއްބައި ނުވަތަ ނިދާން އޮއްވައި ނުވަތަ ކޮންމެވެސް ކަމަކަށް ހިނގަހިނގައި ހުއްޓައި ނުވަތަ ވިޔާނުދާ ކުޅިވަރެއްގައި ހުއްޓައި މަރުގެ މަލާއިކަތާ އެމީހާގެ ހިތުގެ ތެރެއަށް މަރުގެ خَنْجَرُ ޖައްސަވައިފަތެވެ. މިއީ ކުއްލިއަކަށް މަރުވުމެވެ. މީސްތަކުންކުރެ ބައެއްމީހުންގެ ނަފްސު ނޭވާހިނގާ ހޮޅީގެ ކައިރިއަށް އަންނަތަނާ މަރުވެފައި ތިބި އެމީހާގެ ގާތް މީހުންތައް ފެންނާންފަށައިފަތެވެ. މިފަދަ ވަގުތުގައި މަރުވާމީހާ ހޭރޭހޭރުންތައް އިންސާނުންނޫން ހައި ތަކެއްޗަށް އިވޭނެއެވެ. އިންސާނުންނަށް އެއަޑު އިވޭނަމަ އެމީހުން ހެއިބަލި ވެއްޖައީހެވެ. މަރުވާމީހާގެ ކިބައިން އެންމެ ފަހަށް ނެތިދާނޭ އެއްޗަކީ ކަންފަތުގެ އިވުމެވެ. މިހެނީ رُوح އައިސް ހިތާއި ވަކި ވެއްޖެއްޔާއި ލޮލުގެ ފެނުން ފާސިދުވެދާނެއެވެ. ކަންފަތަށް އިވުން ކެނޑިދާހުށީ ފުރާނަ މުޅީން ނުކުމެގަތުމުންނެވެ.  
މިކަމަށްޓަކައޭ ސަލާމާއި صلوات ލެއްވި އިތުރު އެކަލޭގެފާނުން حديث ކުރެއްވި لَقِّنُو مَوْتَاكُمْ شَهَادَةَ اَنْ لاَاِلَهَ اِلاَّ اللهُ وَاَّنَّ مُحَمَّدًا رَسُوْلُ اللهِ އިބުރެމެންކުރެން މަރުވާ މީހުންނަށް أَشْهَدُ اَنْ لاَاِلَهَ اِلاَّ اللهُ  وَأَشْهَدُ اَّنَّ مُحَمَّدًا رَسُوْلُ اللهِ މިދެކަލިމަ ލައިދޭށެވެ. އެއުރެންގެ މައްޗަށް ގިނަގިނައިން ލައިދިނުން نَهِى ކުރެއްވިއެވެ. އެއީ އެއުރެންނަށް ލިބިފައިވާ ބިރުގެ ބޮޑުކަމާއި، ހިތާމައިގެ ދަތިކަމަށްޓަކައެވެ.
 
- ފަޟީލަތުއްޝައިޚް ޙުސައިން ޞަލާޙުއްދީން ލިޔުއްވާފައިވާ " اللَّمْعَةُ الظَّاهِرَة- ޤިޔާމަތުގެ ވާހަކަ" ފޮތުން