ރިމްޝާ ހިނގައިގަތުމުން، މިރާހަށް ރިމްޝާގެ އަތުގައި ހިފައިލެވުނެވެ. އެއީ އަމިއްލަ އިހުތިޔާރުން ބޭރުގައި މިރާހަށް ކުރެވުނު ކަމެކެވެ. ******** ރިމްޝާގެ ހިތުގެ ހިނގުން މަޑުޖެހުނެވެ. މިރާހުގެ އެންމެ ބީހިލުމަކުންވެސް އޭނާގެ ހިތުގެ އިހުސާސްތައް ފޮރުވަން ނުކުޅެދުނެވެ. "ތަބަށް..." މިރާހް އަވަސް އަވަހަށް ބުނެލިއެވެ. ރިމްޝާގެ ހިތް މަރުވީ މިރާހުގެ ހިތް ދުވަހަކުވެސް ބަދަލުނުވާނެއޭ ހީވުމުންނެވެ. މިރާހުގެ އަތަށް ތަބަށް ދިނުމަށްފަހު އޭނާ އަވަހަށް އެތަނުން ދިޔުމަށް ހިނގައިގަތެވެ. ރިމްޝާއަށް ވީގޮތް ފެނި، މިރާހަށް ހިނިތުންވެލެވުނެވެ. އަދިވެސް އެ ހިތުގެ ޖަޒުބާތުތަކަށް ބަދަލެއް ނާންނަކަން އެނގުނެވެ. އެފަދަ އަންހެންކުއްޖަކު މަދުވާނެއެވެ. އެންމެ ބޭނުންވި ދުވަހު މިރާހަށް ހިތްވަރުދޭން ދެގޮތެއްނުވެ ހުރެދިން ހަމައެކަނި މީހަކީ ރިމްޝާއެވެ. ވީއިރު، ރިމްޝާ އެކަނިކޮށްފައި މިރާހު ވަކި އުފަލުގައި ހުންނާނީ ކިހިނެއް ހެއްޔެވެ؟ ރިމްޝާގެ ފަހަތުން ހިނގައިގަތް މިރާހަށް ހުއްޓެން މަޖުބޫރުވީ، ރިމްޝާގެ އެކުވެރިންތަކެއް އޭނާ ވަށައިލުމުންނެވެ. "ދެން ކޮންއިރަކުންތަ ރިމޫ މެރީ ކުރަނީ؟... ކްލާސް ހުރިހާ ގާލްސް މެރީކޮށް ނިމުންއިރުވެސް ތިހުރީ ހުސްކޮށް..." ރިމްޝާގެ އެކުވެރިއަކު ބުނެލިއެވެ. "އެބަހުރި ސަޅި ބިޓެއް... ނަންބަރު ދެންތަ؟..." ދައްކާ ވާހަކަ އަޑުއިވޭ ހިސާބުގައި މިރާހް ހުރިތަން ފެނުމުން، ރިމްޝާ ބޭނުންވީ އެކުވެރިންގެ ވާހަކައިގައި ބައިވެރިވާށެވެ. "ތިކަމާވެސް އުޅެންވީ... ލައްކަ ދުވަހު މަޑުކުރެވިއްޖެ..." ރިމްޝާ ވައްކަޅިން މިރާހަށް ބަލައިލިއެވެ. "ދީބަލަ ނަންބަރު..." ރިމްޝާ އުއްމީދުކުރިފަދަ އަސަރެއް މިރާހުގެ މޫނުން ނުފެނުމުން އޭނާ މާޔޫސްވިއެވެ. އެކުވެރިންގެ ކައިރީގައި ހުއްޓަސް، ފަހުން އެމީހުން ދެއްކި އެއްވެސް ވާހަކައެއް އޭނާއަކަށް ނޭނގުނެވެ. އޭނާއަށް ސަމާލުކަން ދެވުނީ މިރާހުގެ އަމަލުތަކަށެވެ. އިވްލީންގެ ކައިރިއަށް ގޮސްފައި، ރިމްޝާއަށް އިވްލީންގެ ކޮނޑުގައި ބޯއަޅައިލެވުނެވެ. "ކުޑަ ވަގުތުކޮޅަކަށް ބެސްޓީ އަތުލިޔަސް އޯކޭތަ؟..." އާކިލްއަށް ބަލައިލަމުން ރިމްޝާ އަހައިލިއެވެ. "ކުޑަ ވަގުތުކޮޅެއްވިއްޔާ ދެވިދާނެ..." އާކިލް ލާނެތް ރާގަކަށް އެހެން ބުނެލާފައި އެތަނުން ދިޔައެވެ. "ކިހިނެއްވީ؟..." ރިމްޝާއަށް ކަމެއް ވެއްޖެކަން އިވްލީނަށް އެނގުނެވެ. "އީވް ދިޔާމަ އަހަރެން ހާދަ އެކަނިވާނޭ..." ރިމްޝާގެ ދެލޯ ފެންކަޅިވިއެވެ. "ދެތިން ދުވަހަކަށްނު މިދަނީ.... އަހަންނަށް ރަށުން ބޭރުގަ ކެތް ނުވާނެކަން ރިމޫއަށް އެނގެއެއްނު..." ރިމްޝާގެ ބޮލުގައި ފިރުމައިލަމުން އިވްލީން ބުނެލިއެވެ. "އަހަންނަށްވެސް ދީބަލަ ތީގެ ފަށެއް... ލޯބިވާ މީހާ ލިބޭތޯ ބަލަން ބޭނުން..." ރިމްޝާ ދޫކޮށްލީ ފުން ނޭވާއެކެވެ. "މިހާރު އެނގިއްޖެ ވީގޮތް... ތިއުޅެނީ އަހަރެން ދާތީ ދެރަވެގެން ނޫނޭ..." ރިމްޝާއަށް ވީގޮތް އެނގުމުން އިވްލީންގެ ކައިރިއަށް ހިނިއައެވެ. "މިރާހް ދޯ މައްސަލައަކީ... ކޮބާތަ އޭނަ؟..." "ކީއްވެތަ މިރާހް އަހަރެންދެކެ ލޯބި ނުވަނީ؟..." ރިމްޝާ މާޔޫސްވިއެވެ. އިވްލީންގެ ކޮނޑުގައި ބޯ އަޅާލައިގެން ހުރުމުން، މިރާހް އައިކަމެއް ރިމްޝާއަކަށް ނޭނގުނެވެ. މިރާހަށް އިވުނީ ރިމްޝާ އެންމެ ފަހުން ބުނެލި ދެ ލަފުޒުގެ އަޑެވެ. ރިމްޝާ ދެއްކީ އޭނާގެ ވާހަކަ ކަން މިރާހަށް އެނގުނެވެ. "މިރާހް..." ރިމްޝާ އިތުރު އެއްޗެއް ބުނުމުގެ ކުރިން އިވްލީން ބުނެލިއެވެ. ރިމްޝާ އަވަސް އަވަހަށް އަނެއް ފަރާތަށް އެނބުރުނެވެ. މިރާހަށް ފެނުމުގެ ކުރިން އޭނާ އަވަހަށް އެތަނުން ދިޔުމަށް ހިނގައިގަތެވެ. "ޔޫ ލުކް ޕްރިޓީ..." އިވްލީނަށް ބަލަން ހުރި މިރާހް ހިނިތުންވެލިއެވެ. "ތޭންކްސް.." އިވްލީން ހަދިޔާކޮށްލީ އެކުވެރި ހިނިތުންވުމެކެވެ. "އަދިވެސް އަހަރެންގެ ކުރިމައްޗަށް އަރަން އުނދަގޫވޭތަ؟..." "އީވް ފެންނަ ކޮންމެ ފަހަރަކު އަމިއްލަ ނަފުސު ބްލޭމް ކުރެވެނީ..." މިރާހް އިސްޖަހައިލިއެވެ. "އަހަރެން މިރާހަށް ހިތްބުރައެއް ނުކުރަމޭ... އޭރުވެސް ބުނީމެއްނު ތީ އަހަރެންގެ އެންމެ ބެސްޓް ފްރެންޑޭ..." އިވްލީން މިރާހުގެ ކޮނޑުމަތީގައި މަޑުމަޑުން ޖަހައިލިއެވެ. "އަދިވެސް މިރާހް ހުންނާނީ އެ މަގާމުގަ... އެހެންނޫނަސް، ކުށްވެރިންނަށް އަދަބު ލިބިއްޖެ، އެމީހުންނަށް ވިސްނި މާފަށް އެދިއްޖެ... ހުރިހާ ކަމެއް ވީ މިރާހް ކުރި މަސައްކަތުން..." ދެމީހުންގެ ދެމެދަށް ވެރިވީ ހިމޭންކަމެވެ. މިރާހް ޝުކުރުވެރި ނަޒަރަކުން ބޯޖަހައިލަޖަހައިލާ ހުއްޓެވެ. "އަހަރެމެންގެ ވާހަކަ އެއްފަރާތުގަ ބާއްވާފަ އެކުއްޖާގެ ވާހަކަ ދައްކަބަލަ... ކީއްވެތަ ރިމޫގެ ހިތަށް ތި ތަދުކުރަނީ؟..." ޝަކުވާގެ ރާގެއްގައި އިވްލީން އަހައިލިއެވެ. "އަހަންނަށް މިރާހްގެ ހިތްވެސް އެބަ ފެނޭ... ތި ދެލޯ އެހެން ދިމާއަކަށް ނުހުއްޓޭ... ރިމޫވެސް އެހެން... ދެން އެކަކު އަނެކަކަށް ސިއްރުކުރުމުގެ މާނައެއް ކޮބާ؟....." މިރާހްގެ ތުންފަތަށް ލުއި ހިނިތުންވުމެއް ވެރިވިއެވެ. އޭނާ ސިއްރުން ދުރުގައި ހުރި ރިމްޝާއަށް ބަލައިލިއެވެ. "ދޭ... ގޮސް ތިކަންތައް ހައްލުކުރޭ!... އެކުއްޖާފުޅު ދެރަވެގެން ހަލާކުވެދާނެ..." ރިމްޝާ ދައްކައިލަމުން އިވްލީން ބުނެލިއެވެ. މިރާހްގެ ކައިރީގައި ވާހަކަތަކެއް ދެއްކުމަށްފަހު. އާކިލް ގޮސް އިވްލީންގެ ކައިރީގައި ހުއްޓުނެވެ. "އެވެސް ދެ ކުޑަކުދިން... ލޯބިވާ ވާހަކަ ވެސް ބުނެދޭން މިޖެހެނީ އެހެން މީހުން..." އާކިލްގެ އަތުގައި ހިފައިލި އިވްލީން ދެފަރާތަށް ބޯ ހޫރައިލިއެވެ. "މިފަހަރު ރަނގަޅުވާނެ.." ސަމާސާ ރާގެއްގައި އާކިލް ބުނެލިއެވެ. "ތިހާ ޔަގީންކޮށް ތިބުނީ ކީއްވެ؟..." އިވްލީން ޝައުގުވެރިވިއެވެ. "މިކަހަލަ ސްޓޯނެއް އެމީހުންނަށްވެސް ދީފަ މިއައީ..." އިވްލީންގެ ކަރުގައި އަޅާފައިވާ ފަށަށް އިޝާރާތްކުރަމުން އާކިލް ބުނެލިއެވެ. އާކިލްގެ ވާހަކަ މަޖާވެގެން އިވްލީން ހީގަތެވެ. އާޒިމާ ލޮލުގެ އިޝާރާތުން އޭނާގެ ދަރިފުޅު އުފާވެފައި ހުރި މަންޒަރު ޝުކޫރަށް ދައްކައިލިއެވެ. ޝުކޫރު ހިނިތުންވެލިއެވެ. އަމިއްލަ އެދުމަށްޓަކައި ދަރިފުޅުގެ އުފާ ގުރުބާން ނުކުރެވުނުކަން އެއީ ނަސީބޭ އޭނާގެ ހިތަށް އެރިއެވެ. "ރަތުނާ ގުޅި..." އާޒިމާ ބުނެލިއެވެ. "އެއްކަލަ އަޒުހަދުގެ މާދިހުއާ އިންނާށޯ މިއުޅެނީ... މަންމަމެންވެސް މިހާރު ތިބީ ހަމަޖެހިފަޔޯ..." "ތިކަންވެސް ތި ނިމުނީ އެންމެ ރަނގަޅަށް..." ޝުކޫރަށް ހަމަޖެހުމެއް ލިބުނެވެ. އަޔާމާއި ވާހަކަ ދައްކަން ހުރެފައި އެނބުރު ވަގުތު ކައިރީގައި ވިއްދާފައި ހުރި މިރާހް ފެނުމުން، ރިމްޝާ ދިޔައީ ސިއްސައިގެންނެވެ. ދެމީހުންނަށް ފުރުސަތު ދެމުން އަޔާމު ގޮސް ހުއްޓުނީ އިވްލީންމެންގެ ކައިރީގައެވެ. މިރާހް ރިމްޝާއަށް އަތް ދިއްކޮށްލިއެވެ. މުށްކަވާފައިވާ އަތުގެ ތެރޭގައި އެއްޗެއް އޮތެވެ. ރިމްޝާ އަތް ދިއްކޮށްލުމުން، މިރާހް އެ އެއްޗެއް ރިމްޝާގެ އަތަށް ލައިދިނެވެ. އެއީ ހިތެއްގެ ބައްޓަމަށް އޮތް ކުޑަ ގައުކޮޅެކެވެ. ރިމްޝާ އެއްފަހަރު ގައުކޮޅަށް އަނެއްފަހަރު މިރާހަށް ބަލައިލިއެވެ. އެމޫނުން ފެނުނީ ހައިރާންކަމެވެ. "މީގެ މާނައަކީ....؟'' ރިމްޝާގެ ދެލޯ ވިދައިލިއެވެ. "މާނައަކީ ތި ހިތުގަ އޮތް މާނަ..." މިރާހް ދިނީ ނުސީދާ ޖަވާބެކެވެ. "ފޯނު ނަންބަރު އެހެން މީހަކަށް ނުދެއްޗޭ..." މިރާހް ދިޔުމުން ރިމްޝާ އުފަލުން ފުންމައިލިއެވެ. ނުސީދާކޮށް ބުނިކަމުގައިވިޔަސް، މިރާހް ބުނީ ކީކޭކަން އޭނާއަށް އެނގުނެވެ. އެތައް ދުވަހަކަށްފަހު މިރާހްގެ ފެހި ސިގުނަލް ލިބުމުން، އުފަލުން ރިމްޝާގެ ދެލޯ ފެންކަޅިވިއެވެ. އޭގެ ކުރިން ހިތާއިހިތުން މިރާހަށް އެއްޗެހި ކިޔުނީތީ އޭނާއަށް އަމިއްލަ ނަފުސު ކުށްވެރި ކުރެވުނެވެ. ******** ކުޑަދޮރުގެ ކައިރީގައި ހުއްޓިލައިގެން ހުރި އިވްލީންގެ ނަޒަރު ހުއްޓިފައިވީ ކުރިމަތިން ފެންނަމުންދިޔަ ބަގީޗާއަށެވެ. ތަފާތު ކުލަކުލައިގެ މާތަކުން ޖަރީވެފައިވާ ބަގީޗާގައި އުދުހިލާފައި އުޅޭ ކޮކާތައް އުފާވެރިއެވެ. ފަހަރަކު މަލެއްގައި ޖައްސަމުން، ފޮނިބޮމުން ދިޔައީ މިނިވަންކަމާއި އެކުގައެވެ. "ގުޑް މޯނިންގް ޕްރިންސަސް..." އިވްލީންގެ ފުރަގަހުން ބައްދައިލަމުން އާކިލް ބުނެލިއެވެ. "ދެން މި މަންޒަރެއް ނުފެންނާނެ ދޯ؟..." އާކިލް އާއި ވީ ފަރާތަށް އެނބުރެމުން އިވްލީން ބުނެލިއެވެ. "އީވް ބޭނުމިއްޔާ މިއަދުގެ ދަތުރު ކެންސަލްކޮށްލަފާނަމޭ..." އާކިލް ބޭނުންވީ އަދި ކުޑަ ދުވަސްކޮޅަކު މެލޭޝިޔާގައި މަޑުކޮށްލާށެވެ. ކައިވެންޏަށްފަހު، އާކިލްމެން މެލޭޝިޔާއަށް ދިޔައީ، ދެހަފްތާއަށެވެ. ނޭނގި ތިއްބައި ދެ ހަފުތާ ފާއިތުވެގެން ދިޔައީ ހީވެސް ނުކުރާހާ އަވަހަށެވެ. މަޑުކުރަން ބޭނުންވިޔަސް، ބޮލުގައި އެޅިފައިވާ ޒިންމާ ގިނަކަމުން، މަޑުކުރަން އިވްލީންގެ ހިތް ދެކޮޅު ހަދަނީއެވެ. "ރަށަށް ދާންވެސް ބޭނުން..." އާކިލްގެ މޭގައި ލައްވެލަމުން އިވްލީން ބުނެލިއެވެ. "މާލޭގަ ހުރެހުރެ، ބައްޕަ ހުންނާނީ މިހާރު ފޫހިވެފަ... އަނެއްކާ މިރާހްއާ ރިމްޝާ އެކަނި ކެފޭގެ މަސައްކަތް ކުރަން ތިބޭނީވެސް... އެ ދެމީހުން ތިބީ އަހަރެމެން ރަށަށް ނުގޮސްގެން މެރީ ނުކުރެވިފަ..." "އޭރުވެސް އަހަރެން ބުނީމެއްނު، ކާމިޔާބުވާނޭ..." އާކިލް މަޖާވެލާފައި ބުނެލިއެވެ. "އަހަރެން ދިން ސްޓޯން އެއީ އާދައިގެ އެއްޗެއް ނޫނޭ..." "އާކް ވަރަށް މޮޅޭ... ދެން ދީބަ އަހަރެމެންނަށް ކައިރީ ތިބެވޭ ކަހަލަ ސްޓޯންއެއްވެސް..." އިވްލީން ތައުރީފު ކޮށްލިއެވެ. "ދެރަވަނީ، ރަށަށް ގޮސް އާކްއާ ދުރުގަ އުޅެންޖެހޭނެތީ..." ރަށް ދޫކޮށްފައި، މާލެ ބަދަލުވާކަށް އިވްލީން ބޭނުމެއް ނުވެއެވެ. ހަމައެގޮތަށް އާކިލްގެ އޮފީސް ހުރީ މާލޭގައެވެ. އަމިއްލަ އާއިލާ އާއި ވަޒީފާ ދޫކޮށް، އިވްލީންގެ ރަށަށް ބަދަލުވުން އާކިލްއަށްވެސް ފަސޭހަ ކަމަކަށް ނުވާނެއެވެ. "އުފާވެރި ހަބަރެއް ދެންތަ؟..." އިވްލީންގެ ދެކޯތާފަތުގައި ހިފައި، ކުޑަކޮށް ދުރުކޮށްލަމުން އާކިލް ބުނެލިއެވެ. "އަސްލު އުޅުނީ މާލެ ގޮއްސަ ބުނަން... އެކަމަކު، މިކުއްޖާ ދެރަވާކަން އެނގުނީމަ، ދެން ނުބުނެ ނުހުރެވޭނެ..." "ރަށުން ހޯދަން އުޅުނު ބިންކޮޅު ހަމަޖެހިއްޖެ... ދެން އީވް ކައިރީ ހުރެގެން ވޯކް ކުރަންވީ..." އާކިލް ބުނެލިއެވެ. "އަސްލުވެސްތަ؟..." އިވްލީން އުފަލުން އާކިލްގެ ގައިގައި ބައްދައިލިއެވެ. "ތޭންކްޔޫ... ތޭންކް ޔޫ ތޭންކް ޔޫ..." "މިހާ ލޯބި ކުއްޖަކާ ދުރުގަ އަހަރެން ކެތްކުރާނީ ކިހިނެއް؟..." އިވްލީންގެ ގައިގައި ދެއަތް ވަށައިލަމުން އާކިލް ބުނެލިއެވެ. "އަހަރެން ނެތިއްޔާ މިކުއްޖާ އަމިއްލަ ނަފުސަށް އަޅާނުލާނެކަން އެނގޭ... މިހާރުވެސް މިހުރީ އުމުރަށް ބޭސްކާން ނުޖެހި ކިރިޔާ ސަލާމަތްވެފަ... އަހަރެން އީވްގެ ލައިފަށް ނުދިޔަނަމަ، މިކުއްޖާގެ ދުވަސް ދިޔައީސް.." "ދުވަހަކުވެސް ދެން ނުދައްޗޭ..." އިވްލީން މައުސޫމު ގޮތަކަށް ބުނެލިއެވެ. "ނުދާނަން..." އާކިލް ޔަގީންކަން ދިނެވެ. "އޭރުވެސް، މިއަދުވެސް، އަބަދުވެސް މި ހިތުގައި ވީ ހަމައެކަނި ތިޔަ ނަން..." "އަހަރެންގެ ހިތުގަވެސް ހަމައެކަނި ވީ އާކްގެ ނަން..." އިވްލީން ބުނެލިއެވެ. އިވްލީންގެ ކަރުގައި އަޅާފައިވާ ފަށުގެ ފޫ މަޑު އައްޔަކުން ދިއްލިލާފައި ނިވުނެވެ. ދެމަފިރިންގެ އެކަކު އަނެކަކަށް ވަމުންދިޔަ ވައުދާއި، އަހުދުތަކަށް ހެކިވަމޭ ބުނިފަދައެވެ. ދިރިއުޅުން އައު ބާބަކުން ފެށުމަށް ދެމަފިރިންވެސް ތައްޔާރުވިއެވެ. އެކަކު އަނެކެއްގެ ނަން ދުވަހަކުވެސް ހިތުން ފިލުވައިނުލުމަށް އަޒުމުކަނޑައަޅައިގެންނެވެ. (ނިމުނީ)