ރާއްޖޭގައި ހަނީމޫން ހޭދަކުރަމުން ދަނިކޮށް މިޔަރެއް ހަމަލާދީ ފައި ބުރިވި މީހަކު، އެ "ނުރައްކާތެރި" ހާދިސާއާ ބެހޭގޮތުން ފުރަތަމަ ފަހަރަށް އާންމުކޮށް ވާހަކަދައްކައިފިއެވެ.
ސްޕެއިންގެ އަލިކާންޓޭއަށް ނިސްބަތްވާ ބޯޖާ ގާސިއާ ސޫސާ އާއި އޭނާގެ އާ އަނބިމީހާ އަނާ، ރާއްޖޭގައި ހަނީމޫން ހޭދަކުރަމުން ދަނިކޮށް މިޔަރެއް ހަމަލާދީފައިވަނީ އޭޕްރީލް 11 ވަނަ ދުވަހުއެވެ.
މި ހާދިސާ ހިނގާފައިވަނީ ގއ.ކޫއްޑޫ ކައިރީގައި މޫދަށް ގޮސް އުޅުނު ގްރޫޕް އެކްސްކާޝަނެއްގެ ތެރެއިން، އުމުރުން 31 އަހަރުގެ ބޯޖާއަށް މިޔަރު ހަމަލާދިނުމުންނެވެ. އަނާގެ އާއިލާގެ މެންބަރަކު ޑެއިލީ މެއިލްއަށް މައުލޫމާތު ދެމުން ބުނެފައިވަނީ، "އެންމެ ހަމަލާއަކުން މިޔަރު ވަނީ އޭނާގެ ކަކުލުން ތިރީގެ ހުރިހާ މަސްގަނޑެއް ކާލާފައި" ކަމަށެވެ.
އަންހެނުންގެ ބަލިތަކާ ބެހޭ ޑޮކްޓަރެއްގެ އިތުރުން ސެމީ ޕްރޮފެޝަނަލް ފުޓްބޯޅަ ކުޅުންތެރިއެއް ކަމަށްވާ ގާސިއާ ސޫސާ، އިތުރު ފަރުވާއަށް މާލެއަށް ގެނެވުނު ނަމަވެސް، ޑޮކްޓަރުންނަށް އޭނާގެ ފައި ސަލާމަތެއް ނުކުރެވުނެވެ. އެހެންކަމުން ފައި ބުރިކޮށްލަން ޖެހުނީއެވެ.
މި ހާދިސާއަށް ދެ ހަފުތާއަށްވުރެ ގިނަ ދުވަސް ފަހުން، އަނާއާއެކު އިންސްޓަގްރާމްގައި ހިއްސާކުރި ޕޯސްޓެއްގައި އޭނާ ވަނީ ކައިވެނީގެ ފުރަތަމަ މަސްދުވަހާއި ގުޅޭ ގޮތުން ވާހަކަދައްކާފައެވެ. "ކީކޭ ބުނާނީ... އަހަރެމެންގެ ފެށުން ވަރަށް ފުރިހަމަ ދޯ؟" ސްޕެއިން ބަހުން ލިޔެފައިވާ ޕޯސްޓުގައި އޭނާ މަޖާޒީ ގޮތަކަށް ބުނެފައިވެއެވެ.
"ދިރިއުޅުން މިހާ އަވަހަށް އަހަރެމެން އިމްތިހާނު ކުރާނެ ކަމަށް ކާކު ހީކުރާނީ؟" އޭނާ ސުވާލުކުރިއެވެ. އަދި މި މިޔަރުގެ ހަމަލާއަކީ އެމީހުންގެ ދިރިއުޅުމުގައި ކުރިމަތިވި "އެންމެ އަނިޔާވެރި އަދި ބިރުވެރި ހާދިސާ" ކަމަށް ސިފަކުރިއެވެ.
"މިއީ ހަމައެކަނި ދިރިއުޅުމުގެ މަގުމަތީގައި ދިމާވި ހުރަހެއް ކަމަށް ގަބޫލުކުރުން އެންމެ ހިނދުކޮޅަކަށްވެސް އަހަރެމެން ހުއްޓައެއް ނުލަން،" އޭނާ އިތުރަށް ބުންޏެވެ.
"އިންސާނާ މުޅި އުމުރަށް ބަދަލުކޮށްލާ ވަގުތުތައް އާދޭ. ދިރިއުޅުމަކީ ކިހާ ނާޒުކު އެއްޗެއްކަން އިހުސާސްވާ ވަގުތުތައް، އެކަމަކު ހުރިހާ ކަމެއް ވިއްސައިގެންދާހެން ހީވާ ވަގުތު ތިމާގެ ކިބައިން ފެންނަ ވަރުގަދަ ހިތްވަރުވެސް އިހުސާސްވާ ވަގުތުތައް އާދޭ."
ހޮސްޕިޓަލުގައި އޮތްއިރު ގާސިއާ ސޫސާ އޮތީ އައިސީޔޫގައެވެ. އޭނާ ވަނީ ފަރުވާ ހޯދަމުންދިޔަ ދުވަސްވަރު އެހީތެރިވި އެންމެނަށް ޝުކުރު އަދާކޮށްފައެވެ. "އެހީތެރިވި ހުރިހާ އަތްތަކާއި، ހުރިހާ މެސެޖުތަކާއި، އަދި އަހަންނަށްޓަކައި ކުރި ކޮންމެ ދުއާއަކާއިއެކު ކޮންމެވެސް ގޮތަކުން އަހަރެން އަނބުރާ ގެނެސްދީފި،" އޭނާ ލިޔެފައިވެއެވެ.
އޭނާގެ އަނބިމީހާއަށް ތައުރީފު ކުރަމުން އޭނާ ބުނީ، މި ހިތްދަތި ތަޖުރިބާގެ ސަބަބުން އޭނާއަށް އެހީތެރިވުމަށް "އެއަށްވުރެ ވަކި ރަނގަޅު މީހަކު ނުހުންނާނެ" ކަން ޔަގީންވެއްޖެ ކަމަށެވެ. އަދި އެނބުރި ސްޕެއިނަށް ގޮސް އާއިލާގެ މީހުންގެ ގައިގައި ބައްދާލައި ބޮސްދިނުމަށް ކެތްމަދުވެފައިވާ ކަމަށް ބުންޏެވެ.
"އެންމެ ފަހުން، ތިމާގެ އަތުން ދޫކޮށްނުލާ މީހުންގެ ލޯބި އިހުސާސްކުރަމުން ގެއަށް ދިއުމަށްވުރެ އަގުބޮޑު އެއްވެސް ކަމެއް ނެތްކަން ގަބޫލުކުރެވޭ،" އޭނާ ނިންމާލަމުން ބުންޏެވެ.