ރައީސް މުއިއްޒު އާއި އަބްދުއްރަހީމް އާއި ދެމެދު އޮތް ގުޅުން ވަނީ ހީނަރުވެފައެވެ. މި ގުޅުން ހީނަރުވުމަށް މެދުވެރި ވެފައިވާ އެއް ސަބަބަކީ ރައީސް ނަޝީދު އާއި އަބްދުއްރަހީމް އާއި އެކު ބަރުލަމާނީ ގެނައުމަށްޓަކައި އެކުގައި ސިއްރުން ކުރަމުންދާ މަސައްކަތެވެ.
މިކަން ކޮންމެވެސް ވަރަކަށް ރައީސް މުއިއްޒަށް އެނގި ވަޑައިގެންފައިވާތީ، މަޖިލީސް ރައީސް އަބްދުއްރަހީމް އޭނާގެ ސިޔާސީ ކުރިމަގަށް ސަރުކާރުތެރެއިން ކުރަމުންދާ މަސައްކަތަށް ހުރަސް އެޅިދާނެތީ، ރައީސް ނަޝީދާއި، އަބްދުއްރަހީމް އާއި ދެމެދުގައި އޮތް ގާތް ގުޅުން މުއިއްޒަށް އޮޅުވާލުމަށް، ރައީސް ނަޝީދު އަންގައިގެން، ހަސަން ލަތީފް ވަނީ ރާއްޖެ ޓީވީ އަށް ވަޑައިގެން އަބްދުއްރަހީމް އާއި ދެކޮޅަށް ވާހަކަ ދައްކާފައެވެ.
ރައީސް ނަޝީދާއި ޑިމޮކްރެޓްސް އަކީ މުއިއްޒުގެ ސަރުކާރު ގެނައުމުގެ މައިގަނޑު ދައުރު އަދާކުރި ޕާޓީއެވެ. ޑިސައިޑިންގ ފެކްޓާރ އަކަށްވީ ޑިމޮކްރެޓްސްގެ ވޯޓުކޮޅެވެ. ރައީސް އަބްދުއްރަހީމް އަށް މިކަން ވަރަށް ރަނގަޅަށް އެނގިލައްވައެވެ. ރައީސް ނަޝީދު ބޭނުންވި މަގާމުތައް (ފޮރިން މިނިސްޓްރީ ހިމެނޭހެން) ޑިމޮކްރެޓްސްއަށް ނުދިނުމުން ރައީސް ނަޝީދު ޑީލް ހެއްދެވީ މުއިއްޒުގެ ސަރުކާރުގެ އެންމެ ވަރުގަދަ ފަރާތް ކަމުގައިވާ އަބްދުއްރަހީމް އާއި އެވެ.
ނަމަވެސް ދެ ބޭފުޅުންގެ މަސައްކަތުގެ ޅަފަތުގައި މިކަމަށް މުއިއްޒު ހުރަސް އެޅުމަކީ ރައީސް ނަޝީދަށްވެސް އަދި އަބްދުއްރަހީމްގެ މަސައްކަތް ވެސް ނާކާމިޔާބު ވެދާނެ ކަމެއް ކަމަށް ބަލައި، އަބްދުއްރަހީމް އާއި ރައީސް ނަޝީދާއި ގުޅުމެއް ނެތް ކަމަށް ދެއްކުމަށް ހަސަން ލަތީފް ރާއްޖެ ޓީވީ އަށް އަރުވައި މިވަނީ އަބްދުއްރަހީމް އަށް އެއްޗެހި ކިޔުއްވާފައެވެ.
ކުޑަ ގެއްލުމެއް ބޮޑު ފައިދާ އަކަށް ޓަކައި ތަހައްމަލު ކޮށްލުމަކީ މައްސަލައެއް ނޫންތާއެވެ. މިގޮތުން ހަސަން ލަތީފްގެ ވާހަކަތައް ހުރީ، މީގެ ކުރިން ސަރުކާރުގެ ބައިވެރިއެއް ކަމަށް ބުނެ ހަސަންލަތީފް މުއިއްޒުގެ ސަރުކާރު ދެމެހެއްޓުމަށް މަސައްކަތް ކުރަންޖެހޭ ކަމަށްބުނެ ދައްކަމުން ދިޔަ ވާހަކަތަކާއި މުޅިން ޚިލާފަށެވެ.
ރައީސް ނަޝީދުގެ ބޭނުމަކީ އަބްދުއްރަހީމަށް ސަރުކާރުތެރެއިން ބާރުތައް ނެގުމަށް ވަގުތު ދިނުމާއި، ޓުއަރިޒަމް މިނިސްޓަރ ފައިސަލް ވަކި ކުރުމަށް މުއިއްޒު ކުރަމުންދާ މަސައްކަތް މިވަގުތަށް ހުއްޓުވުމާއި، ރައީސް މުއިއްޒުގެ ވެރިކަން ވެއްޓޭވަރަށް ބަލިކަށިކޮށްލުމެވެ.
އަބްދުއްރަހީމް ވެރިކަމަށް ފައްކާ ކުރަމުން ދަނީ ރައީސް ނަޝީދުގެވެސް އިރުޝާދާއި އެކީ އެވެ. އެހެން ނޫންނަމަ ދުވަހަކު އިނގިރޭސިން ތަނެއްގައި ވާހަކަ ނުދައްކަވާ ބޭފުޅަކު ބޭރު ދުނިޔޭގައި ރާއްޖެ ތަމްސީލް ކުރުމަށް ވަޑައިގެން، މުއިއްޒަށް ވުރެ ފުރިހަމަ އަށް ފަރިތަކޮށް އިނގިރޭސިން ތަގުރީރުދެއްވައި، ރާއްޖެ ތަމްސީލްކޮށް، އޭގެ ސަބަބުން އާންމުގެ މަގުބޫލުކަން އިތުރުވެ، ވެރިކަމުގެ ޝަހުސިއްޔަތު ގެ ސިފަޖެހި އަބްދުއްރަހީމްގެ ކިބައިން މިފެންނަ މާތްކަމެއް ނުފެނުނީސްތާއެވެ.